Atus 2 - BIBLIA - traduson antigu in Krioulo

Spiritu Santu bin

¹ Oca dia di Pentekostis ciga, e staba tudu juntadu na mesmu lugar.

² Di repenti i bin di seu un baruju suma di bentu forti di turbada; i inci dentru di kasa ke staba sintadu nel.

³ I parsi elis suma lingua di fugu ku rapati, i sinta riba di kada un delis.

⁴ Na ki ora elis tudu e fika incidu ku Spiritu Santu; e kumsa na fala na utru linguas, suma ku Spiritu da elis puder di fala.

⁵ Na ki dias i staba na Jerusalen judeus, omis riliẑiosu ku bin di tudu nason di mundu.

⁶ Oca ke obi ki baruju, i junta garandi multidon. E fika tudu kunfundidu, pabia kada kin na obi ki jinti na fala na lingua di si tera.

⁷ E fika tudu ntrumpidu, e dimira, e punta ŋutru: “Es i ke? Tudu e jinti ku na papia e ka sedu di Galileia?

⁸ Kuma ku kada un di nos na obi elis na lingua ku no padidu nel?

⁹ Anos di Pártia, Media, Elan, Mesopotamia, Judeia, Kapadósia, Pontu, Asia,

¹⁰ Fríẑia, Panfília, Ejitu ku reẑions di Libia ku fika pertu di Sireni, stranjerus di Roma, judeus, tudu ku kilis ku seta riliẑion di judeus,

¹¹ utrus di Kreta ku Arabia, anos tudu no obi elis na no lingua propi e na fala di kusas garandi ku Deus fasi!”

¹² Tudu elis e dimira, e ka sibi ke ke na pensa. E na punta ŋutru: “Es i ke?”

¹³ Utrus na fasi trosa, e na fala kuma e cami nan!

Pedru diskursa pa jinti

¹⁴ Pedru lanta, i firma juntu ku ki utru onzi apostolu, i yalsa vos, i fala jinti: “Ermons judeu, ku abos tudu ku mora na Jerusalen, bo pera N splika bos e kusa. Bo sukuta ña palabra.

¹⁵ E omis ka cami suma ku bo na pensa; i son novi ora di parmaña.

¹⁶ Ma es i kil ku anunsiadur Joel kontaba ja, kuma

¹⁷ Deus fala asin: ‘Na ultimu tempu N na darma ña Spiritu riba di tudu jinti. Bo fijus macu ku femia na anunsia rekadu di Deus; bo jovens na oja visons; bo omis garandi na ba ta suña.

¹⁸ Na ki dia tambi N na darma ña Spiritu riba di ña servus macu ku femia; e na ba ta anunsia.

¹⁹ N na mostra milagris la riba na seu, N mostra tambi sinal li bas na mundu, di sangi, fugu ku nuvens di fumu.

²⁰ Sol na bida sukuru; lua na bida sangi antis di ciga ki dia garandi i gloriosu di Siñor.

²¹ Na ki tempu, tudu algin ku coma nomi di Siñor i na salba.’

²² “Ermons israelita, bo sukuta e palabra. Deus rikuñisi Jesus di Nazaré bo dianti, ku kusas garandi, ku milagris, ku sinal ki fasi na bo metadi pa mon di Jesus. Abos propi bo sibi kila diritu.

²³ Deus sibiba ja ke ku na sedu. Konformi si planu, bo ntregadu Jesus. Bo tomal, bo krusifikal, bo matal pa mon di omis malvadu,

²⁴ ma Deus lantandal, i libertal di agunia di mortu, pabia mortu ka pudiba tenel prezu.

²⁵ Davi fala aserka del: ‘Sempri N ta ojaba Siñor ña dianti, pabia i sta na ña mon direita pa nada ka bulbulin.

²⁶ E ku manda ña korson kontenti, ña lingua papia palabra di alegria; tambi ña sintidu na diskansa na speransa ku N tene,

²⁷ pabia bu ka na disa ña alma na kau di mortus; bu ka na disa tambi kurpu di bu santu pa i podri.

²⁸ Bu pun pa N kunsi kamiñus di vida; ku bu rostu bu na incin di alegria.’

²⁹ “Ña ermons, bo peran N konta bos klaru aserka di Davi, no antigu pape, manera ki muri, i nteradu; si difuntu sta na si koba na no tera te gosi.

³⁰ El i anunsiadur, tambi i sibi kuma Deus falaba ku juramentu kuma Kristu na padidu na si jorson, pa bin sinta na si tronu.

³¹ Suma ki oja e kusas dianti, i na papiaba na manera ku Kristu na bin lanta di mortu oca i fala kuma si alma i ka disadu na kau di mortus, nin i ka disa si kurpu pa i podri.

³² “E Jesus ku no na fala del, Deus lantandal di mortu. Anos tudu i tustumuñas de kusa.

³³ Manera ki sta ja riba, na mon direita di Deus si Pape, i risibi na si mon Spiritu Santu ku Deus falaba i na manda; i darma e kusa ku bo na oja gosi, bo na obil.

³⁴ Davi ka subi pa seu, ma el propi i fala: ‘Siñor fala ña Siñor pa i sinta na si mon direita

³⁵ tok i pui si inimigus pa e sedu tapeti ki na diskansa si pe nel.’

³⁶ E ku manda i bon pa tudu pobu di Israel sibi sertu kuma, e Jesus ku bo prega na krus, Deus fasil Siñor, i fasil Kristu tambi.”

Purmeru konvertidus

³⁷ Oca jinti obi ki kusa, se korson fika tristi dimas; e punta Pedru ku ki utru apostolus: “Ermons, ke ku no dibi di fasi?”

³⁸ Pedru fala elis: “Bo ripindi, kada un di bos, bo batisadu na nomi di Jesus Kristu, pa bo pekadu pudi purdadu. Asin bo ta risibi Spiritu Santu ku Deus na da bos,

³⁹ pabia purmesa i pa bos, ku bo fijus, ku tudu jinti ku sta lunju — tudu algin ku no Siñor Deus coma.”

⁴⁰ Pedru konsija elis ku manga di palabra, i avisa elis, i fala: “Bo libra bo kabesa di jinti mau de tempu.”

⁴¹ Asin, kilis ku seta si palabra di bon manera, e batisadu. Na ki dia kuas tris mil jinti junta ku elis na kamiñu di Deus.

Vida di purmeru krentis

⁴² E kontinua sempri na risibi nsinamentu di apostolus; e ta tenba sempri kumuñon ku ŋutru; e ta rapati pon juntu, e fasi orason.

⁴³ Apostolus ta fasiba manga di milagri ku sinal. Tudu jinti ta fika dimiradu.

⁴⁴ Tudu krentis fika juntu; kusas ke tene, tudu juntadu.

⁴⁵ E ta bindiba se kusas di balur ku se terenu, e rapati entri elis tudu, konformi kada kin pirsisa.

⁴⁶ E kontinua junta na kasa di Deus kada dia, ku un sintidu son; e ta rapati pon na kasa, e ta kume juntu ku kontentamentu, di korson limpu,

⁴⁷ e ta ngaba Deus. Tudu jinti ta fika kontenti ku elis. Kada dia Siñor ta buriba kilis ki na salba, pa si igreẑa kirsi.