Atus 17 - BIBLIA - traduson antigu in Krioulo

Na Tesalónika

¹ E pasa na Anfípolis ku Apolônia, e ciga na Tesalónika, nunde ki staba un kasa di juntamentu di judeus.

² Paulu, suma di kustumu, i bai nunde elis. Tris dia di diskansu i na diskutiba ku elis sertu lugaris di Skrituras,

³ i splika elis pa mostra kuma i pirsis ba pa Kristu sufri, i lanta na metadi di mortus. I fala elis: “E Jesus ku N na fala bos del, i el ki Kristu.”

⁴ Utrus fia, e junta ku Paulu ku Silas, suma tambi manga di gregu ku ta adoraba Deus, ku manga di minjer importanti.

⁵ Utru judeus ku inci ku nveẑa e toma utru omis mau na metadi di amontons, e junta pobu, e turmenta prasa, e bai pa bai romba kasa di Jason, e buska Paulu ku Silas pa tira elis pa ntrega na tribunal di pobu.

⁶ Suma e ka oja elis, e rasta Jason ku utru ermons, e leba elis dianti di juisis di prasa, e na grita: “Ki omis ku kria tarpajamentu na tudu parti e ciga li tambi.

⁷ Jason rukuji elis na si kasa. Elis tudu e ta nega lei di rei garandi, e fala kuma i ten utru rei comadu Jesus.”

⁸ Ku e palabra e turmenta ki multidon ku otridadis di prasa.

⁹ E pui Jason ku ki utrus pa e paga diñeru; e larga elis.

Na Bereia

¹⁰ Oca kau sukuru son, ermons manda Paulu ku Silas pa Bereia. E ciga la, e bai pa kasa di juntamentu di judeus.

¹¹ Esis e seduba mas abertu di ki kilis di Tesalónika, pabia e risibi palabra ku vontadi, e ta rabista Skritura kada dia pa jubi si e kusa ke na obi i bardadi.

¹² De manera manga delis seta, suma tambi un bon numeru di gregus, minjeris di altu katigoria, tudu ku omis.

¹³ Logu ku judeus di Tesalónika obi kuma Paulu na konta palabra di Deus na Bereia tambi, e bai la, e cuci pobu pa lantanda elis kontra el.

¹⁴ Na ki ora ermons mandal pa ladu di mar, ma Silas ku Timótiu fika.

¹⁵ Kilis ku kumpaña Paulu e lebal te na Atenas. Dipus e riba, ku rekadu pa Silas ku Timótiu pa e bai nunde el mas dipresa ke pudi.

Na Atenas

¹⁶ Nkuantu Paulu na peraba elis na Atenas, i fika ku kasabi na spiritu suma ki na oja prasa ku manga di idulu.

¹⁷ Asin, i ta diskutiba na kasa di juntamentu ku judeus ku gregus riliẑiosu; na prasa tambi, tudu dia, ku kilis ku ta staba la.

¹⁸ Utru filósofus, ku ta comadu epikureus ku stóikus, e ta diskutiba ku el. Utrus ta punta: “Ke ku e papiadur misti fala?” Utrus fala: “I parsi kuma i un propagandista di deusis strañu.” E fala asin pabia i na kontaba Bon Noba di Jesus ku resureison di mortu.

¹⁹ E tomal, e lebal pa un runion na Areópagu, e puntal: “No pudi sibi kal nobu nsinamentu i es ku bu na fala del?

²⁰ Bu tisinu na no oreja kusas strañu; e ku manda no misti sibi ke ki signifika.”

²¹ (Tudu jinti di Atenas ku stranjerus ku mora la e ka ta pasa tempu na utru kusa, son konta ku obi novidadi.)

²² Paulu firma na metadi di jinti na Areópagu, i fala: “Omis di Atenas, N oja kuma di tudu manera bo sedu riliẑiosu dimas.

²³ Oca N na pasa, N na jubi kusas ku bo ta adora, N oja la tambi un altar ku sta skritu nel: ‘PA DEUS KU KA KUNSIDU’. Es ku bo da rispitu sin bo ka kunsil, el ku N misti konta bos.

²⁴ “Deus ku kumpu mundu ku tudu ku sta nel, ku sedu Siñor di seu ku tera, i ka ta mora na kasas ku mon di omi fasi pa el.

²⁵ Mon di omi tambi i ka ta sirbil, suma kin ku misti kualker kusa, pabia el propi i ta da tudu jinti vida ku folgu ku tudu kusa.

²⁶ I kumpu un omi ku tudu rasas bin sai nel, pa e mora na tudu parti di mundu. I jumna marka elis tempu ku lugar nunde ke na mora.

²⁷ I fasi asin pa e pudi buskal. Talves e pudi ojal si e palpa-palpa. Kontudu i ka sta lunju di kada un di nos,

²⁸ pabia i nel ku no na vivi, no na bulbuli; i nel tambi ku no sedu. I suma ku utru di bo poetas fala: ‘No sedu tambi si fijus.’

²⁹ “Asin, suma no sedu fijus di Deus, no ka dibi di kuda kuma no pudi parsintil ku imaẑen di uru, prata o pedra, fasidu ku jitu na manera ku omi kuda.

³⁰ Na ki tempu ku pasa, Deus fica uju pa se falta di kuñisimentu, ma gosi i da ordi pa tudu omis na tudu lugar pa e ripindi,

³¹ pabia i marka un dia ki na bin julga mundu ku justisa, na mon di un omi ki distina pa i fasil. I da tudu jinti sertesa di kuma i na sedu, oca i lantanda ki omi na metadi di mortus.”

³² Oca e obil i fala di resureison di mortu, utrus fasi trosa; utrus fala: “Utru dia no na torna obiu aserka de asuntu li.”

³³ Asin Paulu sai na se metadi,

³⁴ ma utru omis bai pa el, e seta Siñor. Un delis coma Dionísiu, ku sedu membru di Konseliu di Areópagu, ku un minjer ku comadu Damaris, ku utru jinti.