Atus 16 - BIBLIA - traduson antigu in Krioulo

Timótiu junta ku Paulu ku Silas

¹ I ciga na Derbi ku Listra. I staba la un krenti ku comadu Timótiu, fiju di un minjer judeu, krenti, ma si pape i gregu.

² Tudu ermons ku staba na Listra ku Ikóniu e daba bon tustumuñu del.

³ Paulu mistiba lebal ku el; i tomal, i sirkunsidal pabia di judeus ku staba na ki lugar, pabia e sibi tudu kuma si pape i gregu.

⁴ Ora ke na pasa na kada prasa, e ta ntregaba ermons ki regras pa e obdisi, ku apostolus ku garandis na Jerusalen pui.

⁵ Asin igreẑas fika e na bida mas forti na fe; kada dia e na aumenta na numeru.

Vison di Paulu na Troas

⁶ E kortela Fríẑia ku reẑion di Galásia. Spiritu Santu tuji elis konta palabra na Asia.

⁷ Oca e ciga frontera di Mísia, e mistiba bai pa Bitínia, ma Spiritu di Jesus ka disa elis.

⁸ E pasa na Mísia, e ciga na Troas.

⁹ Na ki di noti Paulu oja un vison. Un omi di Masedonia staba sikidu si dianti, ku pidil i falal: “Bin pa Masedonia, bu judanu.”

¹⁰ Oca ki tene e vison, logu no buska pasaju pa bai Masedonia. No oja kuma Siñor comanu pa no konta elis Bon Noba.

Lidia konverti na Fílipus

¹¹ No mbarka na Troas, no bai diritu pa Samotrásia. Sol mansi, no ciga Neápolis.

¹² Di la no bai pa Fílipus, prasa mas importanti na ki parti di Masedonia; i un kolonia di Roma. No fika la puku dia.

¹³ Na dia di diskansu no sai na porton di prasa pa roda di riu, nunde ku no kuda kuma i pudi ten un lugar di orason. No sinta, no na papiaba ku minjeris ku junta la.

¹⁴ Un minjer ku comadu Lidia, di prasa di Tiatira, bindidur di fazenda purpura, ku ta adoraba Deus, i na sukutanuba. Siñor yabril korson pa i pui sintidu na kil ku Paulu na fala.

¹⁵ Oca ki batisadu, tudu ku si familia, i pidinu, i fala: “Si bo oja kuma ami i krenti fiel na Siñor, bo ta bai fika na ña kasa.” Asin ki ngodanu; no bai.

Paulu ku Silas na kalabus

¹⁶ Un dia, oca ku no na bai pa lugar di orason, no kontra ku un bajuda ku teneba spiritu di diviña. I ta ngañaba manga di diñeru pa si mestres ku si diviñason.

¹⁷ I ta pegaba tras di nos ku Paulu, i na grita: “E omis ku ta kontanu kamiñu di salbason i servus di Deus ku sta riba di tudu.”

¹⁸ I fasi asin ku nos pa manga di dia, tok Paulu ka pudi nguental mas; i rabida pa el, i fala spiritu: “N na dau ordi na nomi di Jesus Kristu pa bu sai nel!” Na ki ora i sai.

¹⁹ Oca si mestres oja kuma e pirdi speransa di ngaña diñeru, e prindi Paulu ku Silas, e rasta elis te na metadi di prasa dianti di otridadis.

²⁰ E leba elis dianti di juisis, e fala: “E omis li i judeus; e na kansa jinti dimas na no prasa,

²¹ e na nsina kustumus ki kontra lei pa no seta o pa no fasi, pabia anos i romanus.”

²² Tudu jinti lanta e junta kontra elis. Juisis rumpi elis ropa, e manda suta elis ku manduku.

²³ Dipus de suta elis ciu, e bota elis na kalabus, e da guarda ordi pa i tene elis suguru.

²⁴ Suma ki risibi ki ordi, i pui elis na kalabus di dentru, i fica elis pes na tronku.

²⁵ Pertu di me-noti, Paulu ku Silas na oraba, e na kanta kantiga pa Deus. Utru prezus na sukutaba elis.

²⁶ Di repenti con tirmi ku forsa, alisersu di kalabus bulbuli, portas tudu yabri, korenti kai na mon di tudu prezu.

²⁷ Guarda korda, i oja portas di kalabus yabridu, i toma spada pa mata si kabesa, i kuda kuma prezus kuri tudu,

²⁸ ma Paulu grita ku vos altu, i falal: “Ka bu fasi bu kabesa mal, pabia alinu li tudu.”

²⁹ Guarda pidi pa tisi lus, i salta pa dentru di kalabus, i na tirmi, i kai dianti di Paulu ku Silas.

³⁰ I tisi elis pa fora, i punta: “Siñoris, ke ku N dibi di fasi pa N salba?”

³¹ E ruspundil: “Seta Siñor Jesus, bu ta salba, abo ku tudu bu familia.”

³² E konta palabra di Siñor pa el ku tudu kilis ku staba na si kasa.

³³ Na ki ora di noti guarda toma elis, i laba se molostus. Logu i batisa, ku tudu si familia.

³⁴ I leba Paulu ku Silas pa si kasa, i pui elis kumida na mesa. El ku tudu si familia e kontenti suma ke pui ja se fiansa na Deus.

³⁵ Oca sol mansi, juisis manda polisias, e da elis ordi pa e larga elis.

³⁶ Guarda konta Paulu rekadu, i falal: “Juisis manda fala pa bo largadu. Bo sai, bo bai diskansadu.”

³⁷ Paulu ruspundi: “E sutanu dianti di jinti sin e ka fasinu justisa, kontudu no sedu sidadon romanu. E botanu na kalabus; gosi e misti tiranu sukundidu. I ka pudi sedu! Elis propi ku ten ku bin tiranu.”

³⁸ Polisias bai konta juisis ke ku Paulu fala. E panta oca e obi kuma elis i sidadon di Roma.

³⁹ E bai pidi elis diskulpa, e kumpaña elis te fora, e pidi elis pa e sai na ki prasa.

⁴⁰ Paulu ku Silas sai na kalabus, e bai pa kasa di Lidia, e oja ermons, e kaba da elis palabra di animu, e bai.