Atus 15 - BIBLIA - traduson antigu in Krioulo

Asembleia na Jerusalen

¹ Utru jinti ku bin di Judeia e kumsa nsina ermons kuma, si e ka sirkunsidadu suma kustumu di Moisés, e ka na pudi salba.

² Paulu ku Barnabé bin ten garandi diskutison ku jus ku elis. Jinti di igreẑa rezolvi kuma Paulu ku Barnabé ku utrus di Antiokia ta bai pa Jerusalen pa bai ruma e kombersa ku apostolus ku garandis.

³ Igreẑa juda elis ne bias. Na kamiñu e pasa na Fenísia ku Samaria; e na konta kuma ku jintius konverti. E noba pui tudu ermons fika kontenti.

⁴ Oca e ciga Jerusalen, igreẑa, tudu ku apostolus ku garandis, risibi elis. E konta tudu ku Deus fasi pa se mon.

⁵ Utru krentis di grupu di fariseus lanta, e fala kuma i pirsis pa e sirkunsidadu, tambi pa e mandadu obdisi lei di Moisés.

⁶ Apostolus ku garandis junta pa jubi e asuntu li.

⁷ Oca e teneba garandi diskutison, Pedru lanta i fala elis: “Ermons, bo sibi diritu kuma i tarda ja ku Deus kujin na bo metadi pa jintius obi palabra di Bon Noba na ña boka, pa e seta.

⁸ Deus, ku kunsi korson di jinti, i mostra si kontentamentu ku elis, i da elis Spiritu Santu suma ki danu tambi.

⁹ I ka fasi nin un diferensa entri elis ku nos. Suma e fia, i purifika se korson.

¹⁰ Asin, ke ku manda bo na tenta Deus, bo na pui riba di ombra di krentis garandi kargu ku nin no papes nin anos no ka pudi nguenta?

¹¹ No fia kuma no sta salbu pa fabur di Siñor Jesus Kristu, suma elis tambi.”

¹² Tudu jinti kala pa sukuta Barnabé ku Paulu ku na konta di garandi sinal ku milagris ku Deus fasi pa se mon na metadi di jintius.

¹³ Oca ke kaba, Tiagu kumsa papia, i fala: “Ña ermons, bo sukutan.

¹⁴ Simon konta kuma, purmeru, Deus visita jintius pa tira na se metadi un pobu pa el, Deus.

¹⁵ Palabras di anunsiaduris konkorda ku es, suma ki sta skritu:

¹⁶ ‘Dipus des, N na riba, N na torna kumpu renu di Davi ku kai; N na lantandal di si stragu; N na torna firmantal,

¹⁷ pa jinti di utru nasons buska Siñor, tudu jintius ku N coma ña nomi riba delis. Asin ku Siñor fala, ku fasi tudu e kusas

¹⁸ ku tarda kunsidu.’

¹⁹ “E ku manda N oja kuma, no ka dibi di kansa kilis ku na konverti pa Deus na metadi di jintius,

²⁰ ma no dibi di skirbi elis, pa fala elis pa e libra di kume karni di limaria ku roniadu ku el, ku kil ku tursidu garganti, nin pa e ka kume se sangi, tambi pa e libra di yanda na pekadu seksual.

²¹ Lei di Moisés ta anunsiadu na tudu prasas disna di tempu antigu; i ta leidu kada dia di diskansu na kasas di juntamentu.”

Karta pa igreẑas

²² Apostolus ku garandis ku tudu igreẑa e oja kuma i bon pa kuji omis na se metadi pa manda pa Antiokia ku Paulu ku Barnabé. E kuji Judas comadu Barsabás, ku Silas, omis di rispitu na metadi di ermons,

²³ e ntrega elis karta ku fala asin: “Anos apostolus ku garandis, bo ermons, no manda manteña pa ermons jintiu ku sta na Antiokia, Siria ku Silísia.

²⁴ Suma ku no obi kuma, utru jinti ku sai na no metadi (kontudu no ka manda elis) e kansa bos ku se palabra, e tarpaja bo pensamentu,

²⁵ no junta, no konkorda pa kuji omis pa manda ku no amadu ermons Barnabé ku Paulu,

²⁶ ku pui se vida na pirigu pabia di nomi di no Siñor Jesus Kristu.

²⁷ Asin no na manda Judas ku Silas, ku na konta bos klaru ku boka kil ku no skirbi.

²⁸ Spiritu Santu ku anos no rezolvi pa ka pui bos mas kargu fora de regras ki pirsis:

²⁹ Ka bo kume karni ku roniadu ku el, nin sangi, nin karni di limaria ku tursidu garganti. Ka bo fasi pekadu seksual. Si bo libra de kusas, bo ta fasi ben. Adeus.”

³⁰ Judas ku Silas dispidi kilis ku manda elis, e bai pa Antiokia. Oca ke ciga, e junta krentis, e ntrega elis karta.

³¹ Dipus de lei, e fika kontenti ku ki palabras di konsiju.

³² Suma Judas ku Silas seduba anunsiaduris tambi, e konsija ermons ku manga di palabra ku fortifika elis.

³³ E tarda la un bokadu; ermons dispidi elis, e riba ku pas pa kilis ku manda elis. [

³⁴ Ma Silas oja kuma i dibi di fika inda la.]

³⁵ Paulu ku Barnabé tarda na Antiokia. Elis, ku manga di utru jinti, e na nsinaba, e na konta palabra di Siñor.

Paulu ku Barnabé rapati

³⁶ Dipus di un tempu Paulu fala Barnabé: “No bai visita no ermons na tudu prasas ku no konta nel palabra di Siñor, pa no jubi kuma ke sta.”

³⁷ Barnabé mistiba pa e leba Jon Markus ku elis,

³⁸ ma Paulu oja kuma i ka bon pa e lebal ku elis, suma ki bandona elis na Panfília, i ka kumpaña elis te na fin di tarbaju.

³⁹ I bin ten na se metadi garandi purfia, tok e rapati di ŋutru; Barnabé leba Markus ku el, i mbarka pa Ŝipri.

⁴⁰ Paulu kuji Silas, i bai. Ermons ntregal na fabur di Siñor.

⁴¹ I pasa na Siria ku Silísia, i na fortifika igreẑas.