Atus 12 - BIBLIA - traduson antigu in Krioulo

Mas pirsigison

¹ I na ki tempu ku rei Erodis prindi utru jinti di igreẑa pa maltrata elis.

² I manda mata Tiagu, ermon di Jon, ku spada.

³ I oja kuma judeus kontenti ku ki kusa; i kontinua, i manda prindi tambi Pedru. I seduba na ki dias di pon sin fermentu.

⁴ Oca ki prindil, i fical na kalabus, i ntregal na mon di kuatru grupu di kuatru soldadu pa e guardal. I mistiba pursental dianti di pobu dipus di festival di Paskua.

⁵ Asin Pedru staba guardadu na kalabus, ma igreẑa ka para pidi Deus pa el.

Pedru tiradu na kalabus

⁶ Na noti ku Erodis na mansiba pa pursental dianti di pobu, na ki mesmu noti, Pedru na durmiba na metadi di dus soldadu, maradu ku dus korenti; guardas staba dianti di porta, e na guarda kalabus.

⁷ Di repenti un anju di Siñor parsi; lus lampra na kalabus. Anju panga Pedru na ombra, i kordal, i falal: “Lanta dipresa!” Korenti kai na si mon.

⁸ Anju falal: “Mara panu, bu kalsa sandalias.” I fasi asin. Anju falal mas: “Kubri ku bu kapa, bu bin ña tras.”

⁹ Anju sai; Pedru sai si tras, sin i ka ntindi kuma kusa ku anju na fasi i bardadi. I na kudaba kuma i un vison.

¹⁰ Oca ke pasa purmeru ku sugundu guarda, e ciga na porton di feru ku ta da pa prasa. Porton yabri el son. E sai, e yanda un rua ntidu. Anju disparsi, i disal.

¹¹ Sintidu di Pedru bin riba pa el; i fala: “Gosi N sibi na bardadi kuma Siñor manda si anju pa libran na mon di Erodis, di tudu ku pobu judeu na peraba.”

¹² Dipus di ntindi klaru, i bai pa kasa di Maria, mame di Jon ku tene tambi nomi di Markus, nunde ku manga di jinti juntaba, e na ora.

¹³ Oca ki konki porta di kintal, un bajuda ku comadu Rodi sai pa sukuta.

¹⁴ I rapara fála di Pedru; pa kontentamentu i ka yabri porta, ma i kuri pa dentru, i konta kuma Pedru staba la fora.

¹⁵ E falal: “Bu ka sta diritu!” Ma el i na ntemaba kuma i bardadi. E fala: “I si anju.”

¹⁶ Pedru kontinua na konki. Oca ke yabri porta, e ojal, e fika spantadu.

¹⁷ I sana elis mon pa e kala, i konta elis kuma ku Siñor tiral na kalabus; i fala: “Bo fika bo konta Tiagu ku utru ermons.” I sai ki ora, i bai pa utru lugar.

¹⁸ Oca ku sol mansi, i tenba garandi tarpajamentu na metadi di soldadus pabia e ka sibi ke ku kontisi ku Pedru.

¹⁹ Erodis buska-buskal, i ka ojal. I punta guardas di tudu manera; dipus i manda mata elis. I sai di Judeia, i bai pa Sesareia, i tarda la.

Mortu di Erodis

²⁰ Erodis staba ku garandi raiba kontra jinti di Tiru ku Sidon, ma elis e junta pa bin papia ku el. E fasi kamaradia ku Blastu, kil ku ten konta di palasiu. E pidi pas, pabia se tera ta risibi kumida di tera di rei.

²¹ Na un dia markadu, Erodis bisti si ropa di rei, i sinta na tronu, i fasi diskursu.

²² Pobu na gritaba: “Es i vos di Deus, i ka di omi!”

²³ Na ki ora anju di Siñor batil, pabia i ka da Deus gloria. Bicus kumel, i muri.

²⁴ Ma palabra di Deus mas na kirsi, i na spaja.

²⁵ Barnabé ku Saulu kaba ki sirvis di leba oferta pa Jerusalen, e riba di la, e leba Jon ku ta comadu Markus juntu ku elis.