Atus 11 - BIBLIA - traduson antigu in Krioulo

Pedru konta igreẑa ke ku pasa

¹ Apostolus ku utru ermons di Judeia e obi kuma jinti ki ka judeus tambi risibi palabra di Deus.

² Oca ku Pedru bai Jerusalen, kilis ku mas pui sintidu na sirkunsison e diskuti ku el,

³ e falal: “Bu yentra na kasa di omis ku ka sirkunsidadu, tok bu kume ku elis.”

⁴ Pedru kumsa na splika elis tudu manera ki pasa, i fala:

⁵ “Oca N na ora na prasa di Jope, sintidu bai lunju ku mi, N sinti kuma N ka sta na mi. N teneba un vison, N oja un kusa suma lensol garandi, maradu na kuatru ponta, ku na ria di seu, i ciga te pertu di mi.

⁶ N pui uju N jubi, N oja limarias di kuatru pe, di kasa ku di matu, ku kilis ku ta rasta, ku kacus ku ta bua.

⁷ N obi tambi un vos ku falan: ‘Pedru, lanta, bu mata, bu kume.’

⁸ N falal: ‘Di nin un manera, Siñor, pabia nunka N ka pui na boka kusa ku ka puru, ku anos judeus no ka dibi di kume.’

⁹ Ki vos ruspundin di seu sugundu bias: ‘Kusa ku Deus fala bu pudi kume, ka bu fala i ka ta kumedu.’

¹⁰ I kontisi te tris bias. Tudu torna rukuji pa seu.

¹¹ “Na ki ora i para dianti di kasa nunde ku N staba tris omi ku mandadu di Sesareia pa mi.

¹² Spiritu falan pa N bai ku elis, pa N ka duvida. Tambi e seis ermon bai ku mi; no yentra na kasa di ki omi.

¹³ I kontanu kuma ki oja na si kasa un anju sikidu ku falal: ‘Manda jinti pa Jope pa e bai coma Simon ku tene nomi di Pedru.

¹⁴ El i ta kontau palabras ku pudi salbau, abo ku bu familia tudu.’

¹⁵ “Logu ku N kumsa na fala, Spiritu Santu ria riba delis, suma ki ria na nos tambi na kumsada.

¹⁶ Na ki ora N lembra di palabra ku Siñor fala: ‘Na bardadi Jon batisa ku yagu, ma abos bo na batisadu ku Spiritu Santu.’

¹⁷ Asin, si Deus da elis mesmu don ki danu tambi, anos ku seta Siñor Jesus Kristu, ami i kin pa purfia ku Deus?”

¹⁸ E kaba di obi e kusas, e kalma, e da Deus gloria, e fala: “Na bardadi Deus da tambi jinti di utru rasa ripindimentu pa e pudi tene vida.”

Igreẑa na Antiokia

¹⁹ Kilis ku pajigadu na pirsigison ku lanta pabia di Stevon e pasa te Fenísia, Ŝipri ku Antiokia, e konta palabra son pa judeus.

²⁰ I tenba na se metadi utrus ki di Ŝipri ku Sireni. Oca ke bai Antiokia e papia ku gregus tambi, e konta elis Bon Noba di Siñor Jesus.

²¹ Mon di Siñor staba ku elis. Manga di jinti seta, e konverti pa Siñor.

²² Noba de kusas ciga na oreja di jinti di igreẑa di Jerusalen. E manda Barnabé pa Antiokia.

²³ Oca i ciga, i oja kuma Deus na tarbaja la, i fika kontenti, i konsija elis pa e pega tesu na Siñor ku tudu se korson.

²⁴ El i bon omi, ku inci ku Spiritu Santu, ku fe. Manga di jinti bai pa kamiñu di Siñor.

²⁵ Barnabé bai Tarsu pa buska Saulu. Oca ki ojal, i lebal pa Antiokia.

²⁶ Un anu ntidu elis dus e junta ku krentis di ki igreẑa, e nsina manga di jinti. I na Antiokia ku jinti kumsa coma krentis Kristons.

²⁷ Na ki dias utru anunsiaduris bai di Jerusalen pa Antiokia.

²⁸ Un delis, ku comadu Ágabu, i lanta, i konta na puder di Spiritu kuma, i na bin ten garandi fomi na tudu mundu. (E fomi bin na tempu di rei garandi Klaudiu.)

²⁹ Krentis konkorda pa kada un delis da konformi i pudi, pa manda juda ermons na fe ku staba na Judeia.

³⁰ Asin ke fasi. E manda oferta pa garandis di igreẑa na mon di Barnabé ku Saulu.