Atus 10 - BIBLIA - traduson antigu in Krioulo

Kornéliu coma Pedru

¹ I tenba un omi na Sesareia ku comadu Kornéliu. I seduba kapiton di un kompañia di tropas ku comadu italianu.

² I seduba omi riliẑiosu ku rispitaba Deus; el ku si familia tudu e ta adoraba Deus di judeus. I ta da ciu pa judeus pobri, i ta oraba Deus sempri.

³ Un dia, pertu di tris ora di tardi, i oja klaru na un vison un anju di Deus ku na binba pa el, i comal: “Kornéliu!”

⁴ I yabri uju pa anju ku medu, i puntal: “I ke, Siñor?” I ruspundi i falal: “Bu orason ku bu simola i subi dianti di Deus pa lembransa.

⁵ Agora, manda omis pa Jope, bu manda coma Simon ku tene tambi nomi di Pedru.

⁶ I ospri na kasa di utru Simon ku ta tarbaja ku kuru, ku tene si kasa pertu di mar. El i ta kontau kil ku bu dibi di fasi.”

⁷ Anju ku papia ku el bai. Kornéliu coma dus di si kriadus ku un soldadu riliẑiosu ku staba na si sirvis.

⁸ Oca i konta elis tudu ku pasa, i manda elis pa Jope.

Vison di Pedru

⁹ Oca sol mansi, ke staba ja na kamiñu pertu di Jope, Pedru subi riba di kasa kuas me-dia pa bai ora.

¹⁰ I sinti fomi, i misti kume. Oca kumida na purparadu, sintidu bai lunju ku el; i sinti kuma i ka sta nel.

¹¹ I oja seu yabri; un kusa na ria ku parsi suma lensol garandi, maradu na kuatru ponta; i ria te na con.

¹² Dentru del i staba tudu limarias di kuatru pe, ku kilis ku ta rasta na con, ku kacus ku ta bua.

¹³ Un vos falal: “Pedru, lanta, bu mata, bu kume.”

¹⁴ Pedru fala: “Di nin un manera, Siñor! Nunka N ka kume kusa ku ka puru, ku anos judeus no ka dibi di kume.”

¹⁵ Vos falal sugundu bias: “Kusa ku Deus fala bu pudi kume, ka bu fala i ka ta kumedu.”

¹⁶ I kontisi te tris bias. Dipus, ki kusa torna rukuji na seu.

¹⁷ Pedru na punta si kabesa ke ku signifika ki vison ki oja. Na ki ora, omis ku Kornéliu manda e punta pa kasa di Simon, e bin firma na porton,

¹⁸ e coma, e punta si Simon sta la na osprindadi, ku tene tambi nomi di Pedru.

¹⁹ Oca Pedru inda na kuda na ki vison, Spiritu falal: “Ala tris omi na buskau.

²⁰ Lanta, bu ria, bu bai ku elis. Ka bu duvida, pabia i ami ku manda elis.”

²¹ Pedru ria, i kontra ku ki omis, i fala elis: “I ami ku bo na buska. Ke ku tisi bos li?”

²² Omis ruspundi e falal: “I Kapiton Kornéliu ku mandanu, omi justu ku ta adora Deus di judeus, ku ten bon tustumuñu na uju di tudu pobu judeu. Un anju santu falal pa i comau pa si kasa, pa i pudi obi bu palabra.”

²³ Pedru kumbida elis pa e yentra, e fika e durmi la. Sol mansi, Pedru lanta i bai ku elis. Utru ermons di Jope kumpañal.

Pedru na kasa di Kornéliu

²⁴ Sol mansi mas, e ciga Sesareia. Kornéliu juntaba si parentis ku amigus mas pertu, i na pera elis.

²⁵ Oca ku Pedru bai pa yentra, Kornéliu kontra ku el, i mpina dianti di Pedru te na con pa adoral.

²⁶ Pedru lantandal, i falal: “Lanta, pabia ami tambi i omi suma bo.”

²⁷ I yentra, suma ke na kombersa, i oja manga di jinti junta,

²⁸ i fala elis: “Abos bo sibi diritu kuma i kontra lei di un judeu pa i visita stranjerus o junta ku elis, ma Deus mostran kuma N ka dibi di fala kuma un algin i ka puru o i ka bali.

²⁹ Asin, oca ku N comadu, N bin sin purfia. N misti punta pabia di ke ku bo manda coman.”

³⁰ Kornéliu falal: “I fasi aos kuatru dia ku N staba na junjun, N na ora na ña kasa ne ora, tris ora di tardi.

³¹ Di repenti i parsi ña dianti un omi ku bisti ropa ku na lampra. I falan: ‘Kornéliu, Deus obi bu orason, i lembra di simolas ku bu ta da pobris.

³² Manda algin na Jope pa i bai coma Simon ku tene tambi nomi di Pedru; i ospri na kasa di utru Simon ku ta tarbaja ku kuru, pertu di mar.’

³³ Logu N manda comau. Bu fasi diritu bu bin. Agora no sta li tudu juntu dianti di Deus pa no obi tudu ku Deus mandau pa bu kontanu.”

Palabra di Pedru

³⁴ Pedru toma palabra, i fala: “Agora N rapara kuma, na bardadi, Deus ka ta fasi skuju di jinti,

³⁵ ma i ta seta tudu, di kualker rasa, ku rispital, ku ta fasi kil ki justu.

³⁶ I manda si palabra pa pobu di Israel, pa konta Bon Noba di pas ku ta bin pa meiu di Jesus Kristu. (El i Siñor di tudu jinti.)

³⁷ Bo sibi diritu ke ku kontisi na tudu tera di judeus. I kumsa na Galileia, dipus di batismu ku Jon anunsia.

³⁸ Bo sibi aserka di Jesus di Nazaré, kuma ku Deus unjil ku Spiritu Santu ku puder. I yanda tudu parti, i na fasi ben, i na kura tudu ku sta bas di puder di diabu, pabia Deus staba ku el.

³⁹ “Anos no sedu tustumuñas di tudu ki fasi na tera di judeus, suma na Jerusalen. Dipus e matal, e pindral na krus di madera,

⁴⁰ ma na terseru dia Deus lantandal, i pul pa i ojadu.

⁴¹ I ka tudu jinti ku ojal, son tustumuñas ku Deus kujiba ja, ku sedu anos ku kume no bibi ku el juntu dipus ki lanta di mortu.

⁴² I mandanu pa no konta pobu aserka del, kuma i el ku Deus pui pa i sedu juis di bibus ku mortus.

⁴³ Tudu anunsiaduris da tustumuñu del, kuma tudu kil ku setal, se pekadus ta purdadu pabia di si nomi.”

Jintius risibi Spiritu Santu

⁴⁴ Oca Pedru na papiaba inda, Spiritu Santu ria riba di tudu kilis ku na sukutaba palabra.

⁴⁵ Tudu krentis judeu ku baiba ku Pedru e fika dimiradu suma ku don di Spiritu Santu darmadu tambi riba di jinti ki ka judeus,

⁴⁶ pabia e na obi elis na papia na utru linguas, e na garandisi Deus.

⁴⁷ Pedru punta: “Nta algin na tuji e jinti pa e batisadu ku yagu? E risibi Spiritu Santu suma nos.”

⁴⁸ I manda pa e batisadu na nomi di Jesus Kristu. E pidi pa Pedru fika ku elis pa puku dias.