Apokalipsi 6 - BIBLIA - traduson antigu in Krioulo

Purmeru seis selu yabridu

¹ N oja oca ku Karnel kebra un di ki seti selu. N obi un di ki kriaturas bibu fala ku vos forti suma turbada: “Bin.”

² N jubi, i staba la un kabalu branku. Kil ku monta riba del teneba un arku di mansasa; i dadu un koroa. I sai vensidur pa torna vensi.

³ Oca Karnel kebra sugundu selu, N obi sugundu kriatura bibu fala: “Bin.”

⁴ I sai utru kabalu; i burmeju. Kil ku monta riba del i dadu puder pa tira pas na tera, pa pui jinti mata ŋutru. I dadu un spada garandi.

⁵ Oca ki kebra terseru selu, N obi terseru kriatura fala: “Bin.” Oca ku N jubi, i sta un kabalu pretu. Kil ku montaba riba del i tene un balansu na mon.

⁶ N obi suma un vos na metadi di ki kuatru kriatura bibu ku fala: “Un kilu di trigu na kusta vensimentu di un dia; tris kilu di sevada na kusta tambi vensimentu di un dia, ma ka bu dana pe di azeitona nin di uva.”

⁷ Oca ki kebra kuartu selu, N obi vos di kuartu kriatura fala: “Bin.”

⁸ Oca ku N jubi, i staba un kabalu amarelu. Kil ku montal i comadu Mortu. Lugar di mortus na baiba si tras. E dadu puder riba di kuartu parti di tera, pa e mata jinti ku spada, ku fomi, ku duensa, ku limarias brabu.

⁹ Oca ku Karnel kebra kintu selu, N oja na pe di altar almas di kilis ku matadu pabia di palabra di Deus, tambi pabia di tustumuñu ke da.

¹⁰ E grita ku garandi vos, e punta; “Siñor ku ten tudu puder, santu, di bardadi, kantu tempu ku no na pera pa bu julga, bu vinga kilis ku sta na tera ku darma no sangi?”

¹¹ Kada un delis dadu kamisoti branku kumpridu; e faladu pa e diskansa inda un bokadu, tok i kompleta numeru di se ermons na tarbaju di Kristu, kilis inda ku ten ku matadu tambi suma elis.

¹² N jubi oca ki kebra sestu selu. Con tirmi ku garandi forsa; sol bida pretu nok suma un lona pretu. Lua bida burmeju suma sangi.

¹³ Strelas di seu kai na tera, suma ora ku bentu forti bulbuli figera, si fijus verdi konkoñi.

¹⁴ Seu disparsi suma libru ku roladu; tudu montis ku jius e munda di se lugar.

¹⁵ Reis di tera ku garandis, ŝefis militar, rikus, ku kilis di puder, tudu katibus ku libris, e sukundi na kobas, ku burakus di pedra na montañas;

¹⁶ e fala montis ku rocas pa e kai riba delis, pa sukundi elis di rostu di kil ku sinta na tronu, pa sukundi elis tambi di raiba di Karnel.

¹⁷ I ciga dia garandi di se raiba. Kin ku pudi nguental?