Apokalipsi 20 - BIBLIA - traduson antigu in Krioulo

Mil anu

¹ N oja un anju ku disi di seu. Na si mon i teneba cabi di abismu ku garandi korenti.

² I prindi dragon, ki antigu serpenti ku comadu diabu o Satanas, i maral pa mil anu.

³ I botal na abismu nunde ki fical, i pui selu, pa ka i ngana nasons mas tok i kompleta ki mil anu. Dipus di kila, i ten ku largadu un bokadu di tempu.

⁴ Dipus, N oja tronus, ku kilis ku sinta nelis; e dadu puder pa julga. N oja almas di kilis ku dogoladu pabia e testifika di Jesus, ku palabra di Deus, e ka adora besta, nin si imaẑen, e nega risibi sinal na testa o na mon. E torna bibu, e rena ku Kristu mil anu,

⁵ ma utru mortus ka torna bibu tok mil anu kompleta. Es i purmeru resureison.

⁶ Kilis ku ten parti na purmeru resureison i sortiadu, e pertensi Deus. Sugundu mortu ka ten puder riba delis, ma e na sedu saserdotis di Deus ku di Kristu. E na rena ku el mil anu.

Satanas vensidu

⁷ Ora ku mil anu pasa, Satanas na largadu di kalabus.

⁸ I na sai pa ngana nasons na tudu parti di mundu, pa junta elis pa gera, ku sedu Gog ku Magog, ku ciu suma reia di mar.

⁹ E inci tudu largura di tera, e avansa, e taja kampamentu di pobu di Deus, ku prasa ku Deus ama, ma fugu disi di seu, i kaba ku elis.

¹⁰ Diabu ku ngana elis i botadu na lagua di fugu ku nŝofri, nunde ku besta ku falsu anunsiadur sta. E na kastigadu di dia ku di noti pa sempri.

Julgamentu di kabantada

¹¹ Dipus, N oja un garandi tronu branku, ku kil ku sta sintadu nel. Tera ku seu kuri si dianti. I ka tenba ja lugar pa elis.

¹² N oja mortus, garandis ku pikininus, sikidu dianti di tronu. Librus yabridu. I yabri mas utru libru, kil ku tene nomi di bibus. Mortus julgadu pa kusas ku skirbidu na ki librus, konformi kusas ke fasi.

¹³ Mar ntrega mortus ku staba nel. Mortu ku lugar di mortus ntrega tambi mortus ke teneba. Kada un julgadu konformi kusas ki fasi.

¹⁴ Mortu ku lugar di mortus botadu na lagua di fugu. Ki lagua di fugu i sugundu mortu.

¹⁵ Tudu kil ku si nomi ka ojadu skritu na libru ku tene nomi di bibus, i botadu na lagua di fugu.