Apokalipsi 2 - BIBLIA - traduson antigu in Krioulo

Karta pa igreẑa di Éfesu

¹ “Skirbi pa anju di igreẑa di Éfesu, bu falal: ‘Es i palabra di kil ku tene na si mon direita seti strela, ku na yanda na metadi di seti kanderu di uru.

² N sibi ke ku bu fasi, bu tarbaju ku bu pasensa. N sibi kuma bu ka pudi nguenta jinti mau; bu proba kilis ku fala kuma elis i apostolus, ma e ka sedu; bu oja kuma ke munturus.

³ Bu sufri pabia di ña nomi, bu kontinua firmi, bu ka fraksi.

⁴ “‘Ma N tene un kusa kontra bo: bu ka aman gosi suma ku bu amanba na kumsada.

⁵ Lembra di ki kau altu ku bu kai nel. Ripindi, bu fasi suma ku bu ta fasiba na kumsada. Si i ka asin, N ka na tarda N na bin pa bo, N na tira bu kanderu na si lugar, si bu ka ripindi.

⁶ Ma i ten inda un kusa bon na bo: bu nuju kusa ku nikolaitas ta fasi, suma ku ami tambi N nuju el.

⁷ “‘Kin ku tene oreja, pa i obi ke ku Spiritu na fala igreẑas. Kil ku vensi, N na dal diritu di kume fruta di arvuri di vida ku sta na jardin di Deus.’

Karta pa igreẑa di Smirna

⁸ “Skirbi pa anju di igreẑa di Smirna, bu falal: ‘Es i palabra di kil ki purmeru, ki ultimu, kil ku matadu, ku torna bibu.

⁹ N oja bu kansera ku bu koitadesa, ma bu riku. N obi palabra mau kontra bo di kilis ku fala kuma elis i judeus, ma e ka sedu gora; elis i di kasa di juntamentu di Satanas.

¹⁰ Ka bu medi kil ku bu na bin sufri. Diabu na bota utru di bos na kalabus, pa proba bos. Kansera na bin pa bos pa des dia. Fika fiel te na mortu; N ta dau koroa di vida.

¹¹ “‘Kin ku tene oreja, pa i obi ke ku Spiritu na fala igreẑas. Kil ku vensi, sugundu mortu ka na fasil mal.’

Karta pa igreẑa di Pérgamu

¹² “Skirbi pa anju di igreẑa di Pérgamu, bu falal: ‘Es i palabra di kil ku tene spada moladu na dus ladu.

¹³ N kunsi kau ku bu mora; i nunde ku tronu di Satanas sta nel. Bu fika fiel na ña nomi, bu ka nega bu fe na mi, mesmu na dias di Antipas, ña fiel tustumuña, ku matadu na bo metadi nunde ku Satanas ta mora.

¹⁴ Ma N ten utru kusas kontra bo, pabia bu tene la utrus ku na sigi nsinamentu di Balaon ku nsina Balak pa i pui fijus di Israel kai na pekadu di kume karni ku matadu pa idulus, tambi di kai ku minjeris.

¹⁵ Na mesmu manera bu tene tambi utrus ku na sigi nsinamentu di nikolaitas.

¹⁶ Ripindi de! Si i ka asin, N ka na tarda, N na bin pa bo; N ta geria ku elis ku spada di ña boka.

¹⁷ “‘Kin ku tene oreja, pa i obi ke ku Spiritu na fala igreẑas. Kil ku vensi, N na dal utru maná sukundidu. N na dal tambi pedra branku ku skirbidu nobu nomi ku ningin ka kunsi, son kil ku risibil.’

Karta pa igreẑa di Tiatira

¹⁸ “Skirbi pa anju di igreẑa di Tiatira, bu falal: ‘Es i palabra di Fiju di Deus ku tene uju ku na lampra suma fugu, ku pe suma metal ku na lampra.

¹⁹ N sibi ke ku bu fasi; N kunsi bu amor, bu fe, bu tarbaju ku bu pasensa. N sibi kuma bu na tarbaja gosi mas di ki na kumsada.

²⁰ Ma kusa ku N tene kontra bo, suma ku bu disa ki minjer Jezabel ku fala kuma i anunsiadur. I na nsina, i na ngana ña servus pa e fasi pekadu seksual, tambi pa e kume karni ku matadu pa idulus.

²¹ N dal tempu pa i ripindi, ma i nega disa peka ku omis.

²² Asin N na botal na kama, ku dur. Kilis ku ta fasi pekadu ku el e na sufri garandi kastigu si e ka ripindi di kusas ke ta fasi ku el.

²³ N na mata si fijus. Tudu igreẑas na bin sibi kuma ami i kil ku ta rabista korson ku pensamentu di jinti; N na da kada un di bos konformi kil ki fasi.

²⁴ “‘N na fala pa bos utrus ku sta na Tiatira ku ka seta e nsinamentu, nin bo ka kunsi ke ku comadu fundura di Satanas: N ka na pui bos utru kargu.

²⁵ Kil ku bo tene, bo pega nel tok N bin.

²⁶ Kil ku vensi, kil ku fasi ña vontadi te na fin, N na dal otridadi riba di nasons,

²⁷ suma ku N risibi di ña Pape. I na guberna elis ku vara di feru; e na kebra-kebradu suma puti.

²⁸ N ta dal tambi strela di parmaña.

²⁹ “‘Kin ku tene oreja, pa i obi ke ku Spiritu na fala igreẑas.’