Apokalipsi 17 - BIBLIA - traduson antigu in Krioulo

Minjer di fama, di mau vida

¹ Un di ki seti anju ku tene tiẑela bin pa mi, i falan: “Bin, N na mostrau kastigu di ki minjer di fama ku tene mau vida, ku sinta riba di manga di yagu.

² I el ku reis di tera ta pekaba ku el. Jinti di mundu ntidu camiba ku biñu di si mau vida.”

³ Dipus i leban na spiritu pa un lala. N oja un minjer montadu riba di un besta di kor burmeju, ku kubridu ku nomis fiu kontra Deus; i teneba seti kabesa ku des cifri.

⁴ Ki minjer bistiba ropa kor di purpura ku burmeju, fajadu ku uru, pedras di balur, ku pérolas. I teneba na mon un kopu di uru ku inci indisensia ku susidadi di si mau vida.

⁵ I staba skritu na si testa un nomi ku tenba sintidu di sigridu, ku fala: “Garandi Babilonia, mame di mau vida ku kusas fiu di mundu.”

⁶ N oja kuma ki minjer cami ku sangi di pobu di Deus, ku sangi di kilis ku matadu pabia e da tustumuñu di Jesus. Oca N ojal, N pasma ku garandi dimirason.

⁷ Anju puntan: “Pa ke ku bu dimira? N na splika sigridu di minjer, ku besta ki monta, ku tene seti kabesa ku des cifri.

⁸ Ki besta ku bu oja i bibuba, ma gosi i ka bibu, ma i ten ku bin subi di abismu, pa i bai pa pirdison. Jinti ku sta na tera (kilis ku se nomi ka sta skritu, desdi ku mundu kumpudu, na libru di nomi di bibus) e na dimira ora ke oja besta ku bibuba, ku ka bibu gosi, ma i na torna bin.

⁹ “Es i sintidu ku algin jiru ta pudi ntindi. Ki seti kabesa sedu seti monti ku minjer sinta riba del.

¹⁰ Tambi e sedu seti rei; sinku kai ja, un na rena inda, ki utru inda ka bin. Ora ki bin, si renu ka na tarda.

¹¹ Besta ku bibuba, ku ka bibu gosi, el tambi i ta kompleta oitu rei. El i di ki seti rei; i na bai pa pirdison.

¹² “Ki des cifri ku bu oja i des rei ku ka rena inda, ma e na dadu puder pa rena un ora juntu ku besta.

¹³ Elis tudu e tene un mesmu sintidu; e na ntrega se forsa ku otridadi na mon di besta.

¹⁴ E na geria kontra Karnel; Karnel na ngaña elis, pabia el i Siñor riba di tudu siñoris, Rei riba di tudu reis. Kilis tambi ku sta ku el, ki coma, i kuji, e sedu fiel, e na ngaña tambi.”

¹⁵ Anju falan inda: “Ki yagu ku bu oja nunde ku ki minjer di mau vida sinta, i multidon di jinti, rasas, nasons ku linguas.

¹⁶ Ki des cifri ku bu oja, ku besta, elis e na odia ki minjer di mau vida. E na tiral tudu ki tene, e na disal nun. E na kume si karni, e na kemal na fugu,

¹⁷ pabia Deus pui na se korson pa e fasi ke ki teneba na si sintidu pa fasi; i pui elis pa e ten un sintidu son, pa e ntrega besta se otridadi, tok kil ku Deus fala bin sedu.

¹⁸ “Ki minjer ku bu oja i ki garandi prasa ku ta manda riba di reis di mundu.”