Apokalipsi 15 - BIBLIA - traduson antigu in Krioulo

Kastigus di kabantada

¹ N oja na seu utru sinal garandi di dimira: seti anju ku teneba seti kastigu di kabantada ku ta kompleta raiba di Deus.

² N oja kusa ku parsi mar di vidru jagasidu ku fugu. N oja tambi kilis ku ngaña besta ku si imaẑen ku numeru di si nomi. E firma pertu di ki mar di vidru, e pega arpas ku Deus da elis.

³ E na kantaba kantiga di Moisés, servu di Deus, ku kantiga di Karnel, e fala: “O Siñor Deus ku ten tudu puder, kusas ku bu fasi i garandi, i di dimira! O Rei di nasons, bu kamiñus i justu, i di bardadi.

⁴ Siñor, kin ku ka na medi bo? Kin ku ka na ngaba bu nomi? Abo son ki puru. E ku manda tudu nasons na bin, e na kai bu dianti pa adorau, pabia kusas justu ku bu fasi, tudu jinti pudi ojal.”

⁵ Dipus N jubi, N oja lugar sagradu di tenda di tustumuñu na seu i yabri.

⁶ I sai di lugar sagradu seti anju ku teneba seti kastigu. Se bistimentu i di liñu puru ku na lampra, ku sintu di uru maradu na pitu.

⁷ Un di ki kuatru kriatura bibu da ki seti anju seti tiẑela di uru ku inci ku raiba di ki Deus ku na bibu pa tudu sempri.

⁸ Lugar sagradu bin inci ku fumansa di gloria ku puder di Deus. Ningin ka pudi yentra la tementi seti kastigu ka kaba ku ki seti anju na manda.