Apokalipsi 13 - BIBLIA - traduson antigu in Krioulo

Besta ku subi na mar

¹ N oja un besta subi na mar, ku teneba des cifri ku seti kabesa. Riba di si cifris i teneba des koroa. Na kada kabesa i tenba palabra mau kontra Deus.

² Besta ku N oja i parsi suma onsa; si pe parsi ku pe di ursu, si boka suma di lion. Dragon pasanta pa el si puder, si tronu ku si garandi otridadi.

³ I tene na un di si kabesas un sinal ku parsi pankada di mortu, ma ki molostu di mortu san. Tudu jinti di mundu fika dimiradu, e bai tras di besta.

⁴ E adora dragon suma ki pasanta besta si puder. E adora besta tambi, e punta: “Kin ku parsi ku besta? Kin ku pudi geria ku el?”

⁵ I disadu papia palabras di njatamentu ku palabra mau kontra Deus. I dadu puder pa manda korenta i dus mis.

⁶ I yabri boka son pa mal kontra Deus, pa fala mal di si nomi, mal di si morada, ku kilis ku mora na seu.

⁷ Tambi i disadu pa i geria kontra pobu di Deus, i ngaña elis. I dadu otridadi riba di tudu rasa, pobu, lingua ku nason.

⁸ Tudu jinti ku sta na tera adoral, menus kilis ku se nomi sta skritu disna di kumsada di mundu na libru di Karnel ku matadu, ki libru ku tene nomi di jinti ku tene vida.

⁹ Kin ku tene oreja, pa i obi.

¹⁰ Kin ku markadu pa bai katiberasku, i ten ku bai. Kin ku markadu pa muri ku spada, i ten ku muri ku spada. Pa es i pirsis pa pobu di Deus ten koraẑen ku fe.

Besta ku sai na con

¹¹ I sai na con utru besta ku tene dus cifri ku parsi cifri di fiju di karnel, ma i ta papiaba suma dragon.

¹² I ta sta dianti di purmeru besta; i ta usa tudu otridadi di kila. I ta obriga tera ku tudu si moraduris pa e adora purmeru besta, kil ku teneba molostu di mortu ku kuradu.

¹³ I ta fasi garandi milagris, tok i ta fasi fugu disi di seu pa tera dianti di uju di jinti.

¹⁴ Pabia di milagris ki disadu fasi dianti di besta, i ta ngana jinti ku sta na tera. I fala elis pa e fasi un imaẑen di besta ku molostadu ku spada, ma i bibu.

¹⁵ I dadu puder pa pui folgu na imaẑen di besta pa kila pudi papia; i pudi manda pa mata tudu kilis ku ka adora ki besta.

¹⁶ I obriga pa tudu jinti, pikininus ku garandis, rikus ku pobris, libris ku katibus, pa e pudu un sinal na se mon direita o na se testa,

¹⁷ pa ka ningin pudi kumpra nin bindi nada, son kilis ku tene sinal di nomi di besta, o numeru di si nomi.

¹⁸ Es pirsisa di jiresa. Kil ku ten ntindimentu i pudi kalkula numeru di besta, pabia i numeru di un omi. Si numeru i 666.