Apokalipsi 12 - BIBLIA - traduson antigu in Krioulo

Minjer ku dragon

¹ Dipus i parsi un garandi sinal na seu, di un minjer bistidu di sol, ku lua bas di si pe, ku un koroa ku dozi strela na si kabesa.

² I preña, i staba ku dur di partu, tok i na grita ku dur di padi.

³ Utru sinal ojadu na seu, di un garandi limaria burmeju suma lagartu, ku comadu dragon, ku teneba seti kabesa ku des cifri. Riba di si kabesa i tene seti koroa.

⁴ Si rabu rasta tersa parti di strelas na seu, i bota elis riba di tera. Dragon firma dianti di minjer ku sta pa padi, pa ora ki padi, i ta kume si fiju.

⁵ Minjer padi un fiju macu ku ten ku bin manda na tudu nason ku vara di feru. Si fiju rabatadu, i lebadu pa Deus na si tronu.

⁶ Minjer kuri pa lala, pa un lugar ku Deus purparaba pa el, nunde ki na sustentadu duranti 1.260 dia.

⁷ I rebenta gera na seu. Migel ku si anjus geria kontra dragon. Dragon ku si anjus e geria,

⁸ ma e ka pudi ngaña; nin lugar ka ten mas pa el na seu.

⁹ Ki garandi dragon fercadu, ku sedu antigu serpenti ku comadu diabu ku Satanas, ku ta ngana tudu mundu. I fercadu na tera, tudu ku si anjus.

¹⁰ N obi un garandi vos na seu ku na fala: “Salbason di no Deus ciga. Gosi i mostra si puder suma Rei. Otridadi sta ja na mon di si Kristu, pabia kil ku firma dianti di no Deus pa akusa no ermons, di noti ku di dia, i durbadu ja.

¹¹ E ngañal pabia di sangi di Karnel, ku palabra di se tustumuñu. E ka ama se vida, ma e sta pruntu pa muri.

¹² Seu, ku abos ku mora la, bo kontenti pabia de kusa ku kontisi! Ma ai di kilis ku mora na tera ku mar! Diabu disi pa bos ku garandi raiba; i sibi kuma i sobral puku tempu.”

¹³ Oca ku dragon oja kuma i fercadu na tera, i kumsa foronta minjer ku padi ki fiju macu.

¹⁴ Ma minjer dadu dus asa di un agia garandi pa i bua, i bai pa lala, pa si lugar nunde ki na sustentadu tris anu i meiu, lunju di uju di serpenti.

¹⁵ Serpenti tira yagu na si boka suma un riu tras di minjer, pa ki yagu pudi rasta minjer.

¹⁶ Con sakura minjer, pabia i yabri si boka, i nguli ki riu ku dragon tira na si boka.

¹⁷ Dragon paña raiba kontra minjer, i bai geria ku restu di si fijus, kilis ku obdisi mandamentu di Deus, ku fika firmi na se tustumuñu di Jesus.

¹⁸ Dipus ki dragon firma na reia na roda di mar.