Amos 7 - BIBLIA - traduson antigu in Krioulo

Vison di gamfañotis

¹ SIÑOR Deus pun pa N oja un vison. N ojal i na forma nuven di gamfañotis, oca jinti kaba ja kebra parti di fenu ku sedu di rei; paja na kirsiba ja mas.

² Dipus di ki gamfañotis kaba kume tudu paja na tera, N fala: “SIÑOR Deus, purda! Kuma ku jorson di Jakó pudi torna lanta? El i pikininu!”

³ SIÑOR disa, i fala: “I ka na bin sedu.”

Vison di fugu

⁴ Es i kusa ku SIÑOR Deus mostran: SIÑOR Deus na comaba fugu pa i bin julga; ki fugu seka ki garandi kau fundu, i mistiba kaba ku tera.

⁵ N fala: “SIÑOR Deus, para ja! Kuma ku jorson di Jakó pudi torna lanta? El i pikininu!”

⁶ SIÑOR Deus disa, i fala: “Es tambi i ka na bin sedu.”

Vison di prumu

⁷ Es i utru kusa ki mostran tambi: N oja SIÑOR i staba riba di un mura ku filantadu ku prumu. I teneba prumu na si mon.

⁸ SIÑOR puntan: “Amos, ke ku bu na oja?” N falal: “N oja prumu.” SIÑOR falan: “Ali N na pui prumu na metadi di ña pobu Israel. N ka na torna maina kastiga elis.

⁹ Ma kaus altu di Isak na danadu; lugaris sagradu di Israel na kabadu ku el. N na lanta ku spada kontra familia di rei Jeroboan.”

Amos ku Amazias

¹⁰ Amazias, saserdoti di Betel, i manda fala Jeroboan, rei di Israel: “Amos na fasi planus kontra bo na metadi di Israel; tera ka na pudi nguenta tudu si palabras.

¹¹ Amos na fala: ‘Jeroboan na bin matadu ku spada; Israel, sin duvida, i na lebadu fora di si tera, pa katiberasku.’ ”

¹² Dipus, Amazias fala Amos: “Bai, videnti! Bai kinti-kinti pa tera di Judá; bu pudi kume la, bu anunsia la,

¹³ ma ka bu torna anunsia mas na Betel, pabia i kau sagradu di rei, i templu di renansa.”

¹⁴ Amos ruspundi i fala Amazias: “Ami N ka seduba anunsiadur nin fiju di anunsiadur, ma N sedu bakiadur, N ta toma konta di pes di figera brabu.

¹⁵ SIÑOR tiran na tarbaju di bakia, i falan: ‘Bai anunsia ña rekadu pa ña pobu Israel.’

¹⁶ Gosi, sukuta palabra di SIÑOR. Bu fala: ‘Ka bu anunsia kontra Israel, nin ka bu papia kontra jorson di Isak.’

¹⁷ Pabia di kila, SIÑOR fala asin: ‘Bu minjer na bin sedu minjer di mau fama na prasa, bu fijus macu ku femia na muri ku spada. Bu tera na rapatidu ku korda, bu na muri na un tera ku ka kunsi Deus. Israel, sin duvida, i na lebadu katibu fora di si tera.’ ”