Amos 6 - BIBLIA - traduson antigu in Krioulo

Kastigu di Israel

¹ Ai di kilis ku fika a vontadi na Sion, kilis ku sta suguru na monti di Samaria, omis ku ten fama na nason ki mas tudu nason, ku tudu pobu di Israel ta bai pa elis.

² Bo bai pa Kalné, bo jubi; di la bo ta bai pa prasa garandi di Amat; dipus bo ta ria pa Gat, prasa di filisteus. Nta bo sedu minjor di ki ki renus? O bo tera i mas garandi di ki di selis?

³ Abos ku pensa kuma dia mau i lunju, bo na pui renu di violensia pa i ciga.

⁴ Bo ta durmi na kamas di marfin, bo ta distindi kurpu na bo divans, bo ta kume karni di fiju di karnel ku fiju di baka gurdu.

⁵ Bo ta kanta, bo toka viola; bo ta kumpu nobu instrumentus di musika pa bos, suma Davi.

⁶ Bo ta bibi biñu ku inci na tiẑelas; bo ta unta purfumu mas bonitu, ma bo ka ta fika tristi pabia di kastigu di Israel.

⁷ Asin bo na sta na purmeru grupu ku na bai pa katiberasku; bo festas di parodia na para.

⁸ SIÑOR Deus, SIÑOR Deus ku ten tudu puder, i jurmenta pa si propi kabesa, i fala: “N nuju orgulyu di Jakó, N odia si palasius. N na ntrega e prasa ku tudu ku sta nel.”

⁹ Si i sobra des omi na un kasa, e na muri.

¹⁰ Un parenti mas pertu, ku ten ku bin kema elis, i na toma difuntus, i leba pa fora di kasa. I na papia ku algin ku sta mas pa dentru, i puntal: “I ten mas algin ku bo?” I na falal: “Nau.” Ki parenti na falal: “Kala! No ka dibi di coma nomi di SIÑOR.”

¹¹ Ali SIÑOR na da ordi; kasas garandi ku pikininu na kebra-kebradu padasiñu.

¹² Nta kabalus pudi kuri na pedras garandi? Algin pudi labra la ku bakas? Ma abos bo bidanta justisa venenu; bo pui retidon pa i sedu kusa malgos.

¹³ Bo sta kontenti manera ku bo toma prasa di Lo-Debar, bo fala: “No toma Karnain ku no propi forsa.”

¹⁴ SIÑOR, Deus ku ten tudu puder, i fala: “O pobu di Israel, ali N na lantanda un nason kontra bos, ku na kastiga bos na tudu bo kamiñu desdi entrada di Amat na norti te na riusiñu di Arabá na sul.”