3 Jon 1 - BIBLIA - traduson antigu in Krioulo

Kumsada ku manteña

¹ Ami, garandi di igreẑa, N na skirbi pa ña kiridu Gaiu ku N ama na bardadi.

² Ña kiridu ermon, N pidi Deus pa tudu kuri ben na bu vida, pa bu tene saudi, suma ku bu alma na bai ben.

³ N kontenti dimas oca ku ermons bin, e konta kuma ku bu sedu fiel; bu na yanda na bardadi.

⁴ I ka ten alegria mas garandi pa mi suma es, di N obi kuma ña fijus na yanda na bardadi.

Jon ngaba Gaiu

⁵ Ña kiridu ermon, abo i fiel na tudu ku bu fasi pa ermons, kontudu elis i strañu.

⁶ E da tustumuñu na igreẑa di bu amor. Si bu kontinua juda elis na bias na manera ku Deus ta kontenti, bu ta fasi ben,

⁷ pabia i pa amor di Nomi di Deus ke sai; e ka toma nada na mon di jinti ku ka kunsi Deus.

⁸ Asin no dibi di juda jinti suma elis, pa no pudi junta ku elis na tarbaju di bardadi.

Diótrefes ku Demétriu

⁹ N skirbi karta pa igreẑa, ma Diótrefes, ku ta buska purmeru lugar, i ka misti ten nada ku nos.

¹⁰ Ora ku N ciga la, N na pui klaru tudu si manobra, manera ki papia palabra mau kontra nos. I ka kontenti ku es; inda i ta nega risibi ki ermons; si utru misti risibi elis, i ta tuji, tok i ta misti tira elis fora di igreẑa.

¹¹ Ña kiridu ermon, ka bu remenda kusa mau, ma son kil ki bon. Algin ku ta fasi ben i di Deus, ma kil ku ta fasi mal i ka oja Deus.

¹² Tudu jinti ta fala ben di Demétriu; te bardadi propi ta fala ben del. Anos tambi no ta da bon tustumuñu del; bo sibi kuma kil ku no fala i bardadi.

Manteña di kabantada

¹³ N tene manga di kusa pa skirbi bos, ma N ka misti fasil pa karta.

¹⁴ N fia kuma N ka na tarda pa ojau; asin no ta papia uju ku uju.

¹⁵ N dijau pas. Bu amigus mandau manteña. Da manteña pa kada un di no amigus pa se nomi.