2 Timótiu 4 - BIBLIA - traduson antigu in Krioulo

¹ Dianti di Deus, ku Kristu Jesus ku ten ku julga bibus ku mortus, pabia i ten ku bin pa rena, N mandau

² pa bu konta palabra di Deus; si tempu i bon o i ka bon, ntema nel. Raprindi, bu kuriẑi, bu anima, bu nsina ku tudu pasensa.

³ Tempu na bin ke ka na seta bon nsinamentu, ma e na sigi se vontadi propi; e na junta manga di pursor ku na konta elis kusas ku se oreja na kosa elis pa obi.

⁴ E na nega obi bardadi; e na rabida pa storias,

⁵ ma abo, fika kalmu na tudu ku na kontisi, bu sufri kansera, bu fasi tarbaju di un ivanjelista, bu fasi tudu sirvis ku bu comadu pa el.

Paulu konta aserka di si mortu

⁶ Ami N sinti kuma ña ora di bai sta ja pertu. Ña vida na darmadu ja suma limaria di ronia.

⁷ N luta bon lutu, N kaba ña kurida, N guarda fe.

⁸ Gosi pa dianti koroa na peran, ku sedu premiu di un vida puru, ku Siñor, justu juis, na dan na ki dia. I ka ami son, ma tambi tudu kilis ku se korson na pera ora ki na bin.

⁹ Fasi forsa pa bu bin oja ku mi dipresa,

¹⁰ pabia Demas ama e mundu di gosi, i bandonan, i bai pa Tesalónika. Kresenti bai pa Galásia, Titu pa Dalmasia.

¹¹ Son Lukas ku sta ku mi. Coma Markus, bu bin ku el, pabia i pudi judan na tarbaju.

¹² N manda Tíkiku pa Éfesu.

¹³ Ora ku bu na bin, bu ta tisi ña kapa ku N fika na Troas na kasa di Karpu, ku librus; riba di tudu, kilis ku kumpudu di pergamiñu.

¹⁴ Alŝandri, latueru, i fasin muitu mal. Siñor ta pagal suma ki fasi.

¹⁵ Abo tambi, libra del, pabia i staba kontra no palabra dimas.

¹⁶ Purmeru bias ku N julgadu, ningin ka staba na ña ladu, ma e bandonan tudu. Pa ka Deus kulpa elis pabia des.

¹⁷ Ma Siñor staba na ña ladu, i dan forsa pa N pudi konta si palabra klaru, pa tudu jintius obi. N libradu di boka di lion.

¹⁸ Siñor na libran tambi di tudu mal, i na leban salbu pa si renu na seu. Gloria pa el pa sempri. Amen.

Manteña di kabantada

¹⁹ Da manteña pa Priska ku Ákila ku familia di Onesíforu.

²⁰ Erastu fika na Korintu. N fika Trófimu duenti na Miletu.

²¹ Bin dipresa antis di tempu di friu. Eubulu, Pudens, Linu, Klaudia ku tudu ermons e mandau manteña.

²² Siñor ta sta ku bu spiritu. Fabur di Deus ta sta ku bos tudu.