2 Timótiu 3 - BIBLIA - traduson antigu in Krioulo

Na kabantada de tempu

¹ Lembra kuma, na fin de tempu li, i na bin dias di kansera,

² pabia jinti na ama se kabesa, e ta sedu faimadu, kunfiadu, korsonudu, faladur di mal, ku ka ta obi se pape ku se mame, ingratu, ku ka mporta ku Deus,

³ ku ka ten amor pa ningin, di korson risu, kontaduris di mintida pa utru, brabu, salvás, ku ka ten amor pa kil ki bon,

⁴ falsiaduris, ntemus, orgulyosu. Te pa e ama Deus, e na ama sabura de mundu.

⁵ E na parsi suma e ten riliẑion, ma e na nega si puder. Lunjusi di ki koldadi jinti.

⁶ Na se metadi i ten kilis ku ta ranja manera di kibi na kasas di jinti, pa ngaña minjeris di kabesa lebi ku ta sinti pesu di se pekadu, e ta lebadu pa tudu koldadi diseẑu;

⁷ sempri e ta misti sibi, ma nunka e ka ta ciga di ten ntindimentu di bardadi.

⁸ Suma ku Janes ku Jambres purfiaba ku Moisés, asin tambi esis ta purfia ku bardadi, e pirdi ntindimentu, e raproba na fe.

⁹ E ka na bai dianti, pabia tudu jinti na rapara se tulesa, suma ki kontisi ku Janes ku Jambres.

Konsiju di kabantada

¹⁰ Ma abo, bu rapara sempri ña nsinamentu, manera di yanda, sintidu ku N ten, fe, pasensa, amor, firmesa,

¹¹ pirsigison ku sufrimentu ku N pasa. Bu sibi tudu ku N pasa na Antiokia, Ikóniu ku Listra. Kantu pirsigison ku N nguenta la, ma Deus libran di tudu!

¹² Na bardadi, tudu kil ku misti vivi un vida puru na Kristu Jesus i ten ku sufri pirsigison.

¹³ Jinti mau, nganadur, e ta bai kada bias mas mau, e ta ngana utrus; e ta nganadu tambi,

¹⁴ ma abo, kontinua na ki kusas ku bu nsinadu, ku bu ten sertesa nel. Lembra di kin ku nsinau,

¹⁵ kuma disna di bu mininesa bu sibi Skritura Sagradu ku pudi fasiu jiru pa salbason pa fe na Kristu Jesus.

¹⁶ Tudu Skritura, i Deus ku nspiral; i ten purbitu pa nsina, pa raprindi, pa kuriẑi, pa mostra manera di yanda diritu,

¹⁷ pa omi di Deus pudi sta kompletu, trenadu diritu pa tudu bon tarbaju.