2 Timótiu 2 - BIBLIA - traduson antigu in Krioulo

Soldadu fiel di Kristu Jesus

¹ Abo, ña fiju, sedu forti pa fabur ku no ten na Kristu Jesus.

² Bu obi ña nsinamentu dianti di manga di tustumuña. Da ki nsinamentu pa omis fiel, ku sedu kapas tambi di nsina utrus.

³ Toma bu parti na sufrimentu suma bon soldadu di Kristu Jesus.

⁴ Soldadu na sirvis militar i ta misti pa si kapiton kontenti ku el. Asin i ka ta mbaransa ku kusas di vida sivil.

⁵ Tambi un lutadur ka ta risibi premiu si i ka luta diritu, suma ki regra di lutu.

⁶ Labradur ku tarbaja i dibi di sedu purmeru pa goza di frutu di si tarbaju.

⁷ Kuda na kil ku N falau, pabia Siñor ta dau ntindimentu na tudu.

⁸ Lembra di Jesus Kristu ku sedu di jorson di Davi, ku lantandadu na metadi di mortus, konformi Bon Noba ku N ta konta.

⁹ Pabia di konta e Bon Noba ku manda N na sufri, tok N pudu korenti, suma kin ku fasi mal, ma palabra di Deus ka sta maradu.

¹⁰ Asin N na sufri tudu pa amor di kilis ku Deus kuji, pa elis tambi e yangasa salbason ku sta na Kristu Jesus, ku gloria ku ka ta kaba.

¹¹ Es i palabra ku bu pudi fia nel: “Si no muri ku el, tambi no na vivi ku el.

¹² Si no fika firmi, tambi no na rena ku el. Si no negal, el tambi i na neganu.

¹³ Si no ka sedu fiel, el i na sedu fiel na mesmu, pabia i ka pudi nega si kabesa.”

Un bon tarbajadur

¹⁴ Lembranta elis e kusas; bu avisa elis ku tudu seredadi dianti di Deus pa e para purfia aserka di palabras, pabia i ka ta juda nada, ma i ta dana kilis ku na obi.

¹⁵ Fasi forsa pa bu sedu algin ku Deus kontenti ku el, suma un tarbajadur ku ka tene nada ku ta pul burguñu, ku sibi tarbaja diritu ku palabra di bardadi.

¹⁶ Libra di kombersas amonton di mundu, pabia kilis ku ta sta nel e ta fika e na lunjusi son di Deus.

¹⁷ Se palabra i suma caga ku ta lastra. Imeneu ku Filetu i di ki koldadi;

¹⁸ e disvia di bardadi, e fala kuma resureison pasa ja. Asin e dana fe di utru krentis.

¹⁹ Deus pui un alisersu firmi ku ka pudi bulbulidu; riba del i skirbidu e palabra: “Siñor kunsi kil ki di sil.” Tambi i fala: “Kil ku ta coma nomi di Siñor dibi di lunjusi di fasi mal.”

²⁰ Na kasa garandi i ka ta ten son losa di uru ku prata, ma tambi i ta ten di madera ku di lama. Utru i pa usa na bon lugar, utru na lugar mas bas.

²¹ Si un algin limpa si vida de kusas mau, i ta sedu suma ki losa di lugar di onra, separadu pa Mestre usal, purparadu pa tudu bon tarbaju.

²² Libra di diseẑu forti di nobresa, bu buska yanda diritu, ku fe, amor ku pas, juntu ku kilis ku ta coma nomi di Siñor ku korson puru.

²³ Lunjusi di purfias di tulesa di kilis ku ka sibi nada, ku bu sibi i ta tisi son jus.

²⁴ Servu di Siñor ka dibi di jusia, ma pa i sedu bon ku tudu jinti, bon pursor, ku ten pasensa,

²⁵ mansu pa raprindi kilis ku sta kontra, pa talves Deus ta da elis ripindimentu, pa e pudi kunsi bardadi.

²⁶ Asin se juisu ta torna diritu, e ta kapli di lastru di diabu ku prindiba elis, i pui elis pa e obdisi si vontadi.