2 Timótiu 1 - BIBLIA - traduson antigu in Krioulo

Kumsada ku manteña

¹ Ami Paulu, apostolu di Kristu Jesus pa vontadi di Deus, ku ta konta aserka di vida ku Deus fala i na da, ku sta na Kristu Jesus,

² N na skirbi pa Timótiu, ña fiju ku N ama. N misti pa Deus no Pape ku Kristu Jesus no Siñor dau fabur, miserikordia ku pas.

Paulu konsija Timótiu pa i fika firmi

³ N ta fala Deus obrigadu, kil ku N ta sirbi ku bon konsiensia suma ku ña papes antigu fasi; N ta gardisil sempri, ora ku N na coma bu nomi na orason di noti ku di dia.

⁴ N ta lembra di bu larmas; N tene garandi vontadi pa ojau, pa N pudi inci di kontentamentu.

⁵ N lembra di fe puru ku bu ten, ku staba purmeru na bu dona Loida ku bu mame Eunisi. N fia sertu kuma i sta tambi na bo.

⁶ E ku manda N ta lembrantau pa bu disperta ki don ku Deus dau oca N pui mon riba di bo.

⁷ Spiritu ku Deus danu i ka ta fasinu kobardu, ma i ta danu puder, amor, ku forsa pa guberna no kurpu.

⁸ Asin, ka bu sinti borgoña di testifika di no Siñor, nin di mi ku sta prezu pa amor del, ma toma parti na sufrimentu pabia di Bon Noba konformi Deus danu forsa.

⁹ I salbanu, i comanu pa no sedu si pobu. I ka pabia di kil ku no fasi, ma pabia di si planu, ku si fabur. I danu e fabur pabia di Kristu Jesus, antis di kumsada di tempu,

¹⁰ ma gosi i mostradu klaru suma ku no Salbadur Kristu Jesus bin bin mundu. El i kaba ku puder di mortu; na Bon Noba i mostranu vida ku ka na kaba mas.

¹¹ Deus distinan pa N sedu apostolu ku pursor pa konta e Bon Noba.

¹² E ku manda N na sufri e kusas, ma N ka na burguñu del, pabia N sibi na kin ku N fia nel; N sta sertu kuma i ten puder pa guarda kil ku N ntregal te na ki dia.

¹³ Pega tesu na palabra di bardadi ku N nsinau, pabia i isemplu pa bo. Fika na fe ku amor ku no ten na Kristu Jesus.

¹⁴ Ku ajuda di Spiritu Santu ku mora na nos, guarda ki rikesa ku bu ntregadu.

¹⁵ Bu sibi kuma tudu kilis ku sta na pruvinsia di Asia e bandonan, tudu ku Fijelu ku Ermójenis.

¹⁶ N ta pidi pa Siñor mostra miserikordia pa familia di Onesíforu, pabia manga di bias i animan. I ka burguñu suma N sta na kalabus,

¹⁷ ma logu ki ciga na Roma i buskan ku mpeñu, tok i ojan.

¹⁸ Siñor ta obin, i ta mostra miserikordia pa el na ki dia. Abo bu sibi muitu ben kantu tarbaju ki fasi pa mi na Éfesu.