2 Tesalonisensis 3 - BIBLIA - traduson antigu in Krioulo

Bo ora pa nos

¹ Pa kabanta, ermons, bo ora pa nos, pa palabra di Siñor spaja rapidu, pa i dadu balur, suma ki dadu na bo metadi.

² Bo ora tambi pa Deus libranu di omis mau di fiu kabesa, pabia i ka tudu ku ten fe.

³ Siñor i fiel; i na fortifika bos, i na guarda bos di ki malvadu.

⁴ No ten fiansa na Siñor aserka di bos, kuma bo na fasi, bo na kontinua fasi, kil ku no manda bos.

⁵ N pidi pa Siñor diriẑi bo korson na amor di Deus, ku firmesa ku Kristu ta da.

Obrigason pa tarbaju

⁶ Ermons, no manda bos na nomi di no Siñor Jesus Kristu pa bo lunjusi di tudu ermon ku na yanda na prigisa, ku ka ta sigi nsinamentu ku no dal.

⁷ Abos propi bo sibi kuma ku bo dibi di remendanu, pabia no ka seduba prigisosu na bo metadi.

⁸ No ka kume na kasa di ningin di grasa, ma no tarbaja ku fadiga; di dia ku di noti no tarbaja, pa ka no sedu kargu pisadu pa nin un di bos.

⁹ I ka kuma no ka tenba diritu di risibi sustentu di bos, ma no fasi asin pa sedu isemplu pa bo remenda.

¹⁰ Ocanu ku bos, no da bos e ordi: “Si algin nega tarbaja, i ka dibi di kume tambi.”

¹¹ No na fala asin pabia no obi kuma na bo metadi i ten kilis ku na yanda na prigisa, e ka na fasi nada, son miti na vida di utru jinti.

¹² No na manda fala elis, no pidi na nomi di no Siñor Jesus Kristu, pa e susega, e tarbaja, e sustenta se kabesa.

¹³ Abos, ermons, ka bo kansa fasi ben.

¹⁴ Si algin ka seta palabra de karta, bo rapara si dunu diritu. Ka bo ten kumitison ku el, pa i pudi burguñu.

¹⁵ N ka na fala pa bo tratal suma inimigu, ma pa bo konsijal suma ermon.

Palabra di kabantada

¹⁶ Siñor propi, ki fonti di pas, pa i da bos pas sempri na tudu tempu, na tudu manera. Siñor ta sta ku bos tudu.

¹⁷ N skirbi es ku ña mon propi: Manteña di Paulu. Es i manera ku N ta sina tudu karta. I asin ku N ta skirbi.

¹⁸ Fabur di no Siñor Jesus Kristu ta sta ku bos tudu. Amen.