2 Samuel 9 - BIBLIA - traduson antigu in Krioulo

Bondadi di Davi pa fiju di Jonatas

¹ Un dia Davi punta: “Nta i ten inda algin ku sobra di familia di Saul pa N fasil ben pa amor di Jonatas?”

² I tenba un servu di familia di Saul ku ta comadu Ziba; e comal pa i bai nunde Davi. Kila puntal: “Abo i Ziba?” I ruspundil: “I ami, bu servu.”

³ Rei puntal: “I ka sobra inda algin di familia di Saul ku N pudi mostra bondadi di Deus pa el?” Ziba fala rei: “I ten inda un fiju di Jonatas ku manku na tudu dus pe.”

⁴ Rei puntal: “Nunde ki sta nel?” Ziba fala rei: “I sta na kasa di Makir, fiju di Amiel, na Lo Debar.”

⁵ Asin rei Davi manda tisil na kasa di Makir, fiju di Amiel, di Lo Debar.

⁶ Oca Mefiboset, fiju di Jonatas, fiju di Saul, bin nunde Davi, i mpina si dianti ku rispitu. Davi comal: “Mefiboset!” I kudil i fala: “Ali bu servu li.”

⁷ Davi falal: “Ka bu ten medu, pabia, di sertesa, N na tratau ku bondadi pa amor di bu pape Jonatas. N na tornau tudu terenus di bu dona Saul; sempri bu na ba ta kume na ña mesa.”

⁸ I torna mpina, i puntal: “Kin ki ami, bu servu, pa bu pudi nota pa mi, ku sedu suma un kacur mortu?”

⁹ Davi coma Ziba, servu di Saul, i falal: “Tudu ku pertensiba Saul ku tudu si familia, N dal pa netu di bu mestre.

¹⁰ Abo ku bu fijus ku bu kriadus bo na tarbaja lugaris, bu na rukuji prudutus, pa familia di bu mestre pudi tene di kume, ma Mefiboset, netu di bu mestre, i na kume sempri na ña mesa.” (Ziba teneba kinzi fiju ku vinti kriadu.)

¹¹ Ziba fala rei: “Ami bu servu N na fasi tudu kil ku Ñu Rei mandan.” Asin Mefiboset fika i na kume na mesa suma un di fijus di rei.

¹² Mefiboset teneba un fiju pikininu comadu Mika. Tudu kilis ku moraba na kasa di Ziba e seduba servus di Mefiboset.

¹³ Mefiboset, ku manku ba na tudu dus pe, bai mora na Jerusalen, pabia i ta kumeba sempri na mesa di rei.