2 Samuel 8 - BIBLIA - traduson antigu in Krioulo

Vitorias di Davi

¹ Mas tardi, Davi ngaña filisteus, i domina elis, i tira Meteg-Ama na se mon.

² Tambi Davi ngaña moabitas, i ditanda elis na con, i midi elis ku korda. Kilis ku dus midida di korda paña, e ta matadu; dipus kilis ku un midida ntidu di korda paña, e ta disadu ku vida. Asin moabitas fika bas di Davi, e ta pagal mpustu.

³ Tambi Davi ngaña Adad-Ezer, fiju di Reob, rei di Zobá, ku na baiba pa toma konta di tera lungu di riu Eufrates.

⁴ Davi toma na si mon mil i seizentus tropa di kabalu ku vinti mil tropa di pe. I korta nervus di pe di tudu kabalus di karu, fora di sen ki fika ku el.

⁵ Sirus di Damasku bin sakura Adad-Ezer, rei di Zobá, ma Davi mata vinti i dus mil delis.

⁶ Davi pui kampamentus di tropas na se tera; sirus bin fika bas del, e ta pagal mpustu. SIÑOR ta da Davi vitoria na kualker kau ki bai.

⁷ Davi toma tajaderas di uru ku ŝefis di Adad-Ezer ta usaba, i leba elis pa Jerusalen.

⁸ I toma tambi manga di bronzi di Betá ku Berotai, prasas di Adad-Ezer.

⁹ Oca Toi, rei di Amat, obi kuma Davi ngaña tudu tropas di Adad-Ezer,

¹⁰ i manda si fiju Joran pa rei Davi pa i bai falal manteña, tambi pa i dal parabens manera ki geria kontra Adad-Ezer i ngañal, pabia Adad-Ezer ta fasiba gera sempri sempri kontra Toi. Tambi Joran leba Davi pursentis di prata, uru ku bronzi.

¹¹ Davi leba ki kusas pa bai dedika pa SIÑOR, juntu ku ki prata ku uru ki dedikaba ja, ki toma na mon di tudu nasons ki ngañaba, ku sedu

¹² Siria, Moab, fijus di Amon, filisteus ku amalekitas, ku kusas ki toma na gera kontra Adad-Ezer, fiju di Reob, rei di Zobá.

¹³ Tambi Davi ngaña fama oca ki riba di mata disoitu mil siru na Kobon di Sal.

¹⁴ I pui kampamentus di tropas na tudu ladu di Edon; tudu edomeus bin fika bas di Davi. SIÑOR ta judaba Davi na tudu ladu ki ta baiba.

¹⁵ Asin Davi bin rena riba di tudu Israel, i ta julgaba tudu si pobu ku bon justisa.

¹⁶ Joab, fiju di Zeruia, seduba ŝef di tropas; Jeosafá, fiju di Ailud, seduba algin ku ta skirbi tudu kusas ku na pasaba na renu;

¹⁷ Zadok, fiju di Aitub, ku Aimelek, fiju di Abiatar, e seduba saserdotis; Seraias seduba sekretariu.

¹⁸ Tambi Benaia, fiju di Jeoiada, staba riba di kereteus ku peleteus, ma fijus di Davi e seduba ŝefis.