2 Samuel 7 - BIBLIA - traduson antigu in Krioulo

Davi misti kumpu kasa pa SIÑOR

¹ Dipus di rei Davi sinta ja na si kasa, SIÑOR dalba ja diskansu di tudu inimigus na si roda,

² rei fala anunsiadur Natan: “Jubi, N mora na kasa ku kumpudu ku sedru, ma arka di Deus sta inda dentru di kurtinas.”

³ Natan ruspundi i fala rei: “Bai bu bai fasi tudu ku sta na bu korson, pabia SIÑOR sta ku bo.”

⁴ Na ki di noti propi, SIÑOR bin papia ku Natan, i falal:

⁵ “Bai konta ña servu Davi kuma N na puntal: ‘Abo, bu na kumpun kasa pa N mora nel?

⁶ N ka mora na nin un kasa disna di dia ku N tira fijus di Israel na Ejitu te aos, ma N yanda di un ladu pa utru son ku tenda.

⁷ Nta na kualker lugar ku N yanda ku tudu fijus di Israel, N ciga di papia ku kualker di se ŝefis ku N pui pa e gia ña pobu Israel, o N punta elis ke ku manda e ka kumpun kasa di sedru?’

⁸ “Asin bu ta fala ña servu Davi kuma, asin ku SIÑOR ku ten tudu puder fala: ‘N tirau na kau ku bu ta bakiaba karnel nel, pa bu sedu rei di ña pobu Israel.

⁹ N staba ku bo na tudu kau ku bu yanda, N bai bu dianti, N kaba ku bu inimigus. N na fasi bu nomi pa i kunsidu, suma nomi di jinti mas garandi na mundu.

¹⁰ N na ranja kau pa ña pobu Israel, N na paranta elis pa e mora na se tera, pa e ka torna bulbulidu, pa nunka mas jinti mau ka kastiga elis suma ke ta fasiba

¹¹ disna di dia ku N pui ŝefis riba di ña pobu Israel, ma N na diskansau di tudu bu inimigus. Tambi SIÑOR na kontau kuma el propi i na firmanta bu jorson.

¹² “‘Ora ku bu vida kaba, bu muri, bu diskansa ku bu papes, N na lantanda un di bu familia, ku sedu bu fiju propi, pa i toma bu lugar; N na firmanta si renansa.

¹³ I el ku na kumpun kasa pa ña nomi; N na konfirma tronu di si renansa pa sempri.

¹⁴ N na sedu si pape; i na sedu ña fiju. Si i fasi mal, N na kastigal suma ku pape ta kastiga si fiju; N ka na maina sutal,

¹⁵ ma N ka na para judal suma ku N para juda Saul, kil ku N tira pa bu pudi toma si lugar.

¹⁶ Bu familia ku bu renansa na sta sempri ña dianti; bu tronu na konfirmadu pa sempri.’ ”

¹⁷ Natan ripiti pa Davi tudu ki palabras, ku kusa ku Deus mostral.

Orason di Davi

¹⁸ Rei Davi yentra, i toma si lugar dianti di SIÑOR, i falal: “SIÑOR Deus, ami i kin? Ña familia i ke, manera ku bu tisin te li?

¹⁹ Suma tudu ku bu fasin ja i sedu pikininu bu dianti, gosi bu fala tambi na familia di bu servu na tempus ku na bin. O SIÑOR Deus, nta asin ku bu kustuma ta fasi ku jinti?

²⁰ “Ke mas ku N pudi falau? Bu kunsi bu servu Davi diritu, o SIÑOR Deus!

²¹ Pa kumpri bu palabra, konformi bu vontadi, bu fasi e kusa garandi, bu manda kontan el.

²² “O SIÑOR Deus, abo i garandi dimas! I ka ten utru suma bo, nin i ka ten utru deus si i ka abo, konformi tudu kusas ku no obi ku no orejas.

²³ Kin ku sedu suma bu pobu, Israel, ki un pobu son ku Deus bai liberta pa e sedu si pobu? Ki kusas garandi, meduñu, ku bu fasi pa elis, e pui pa bu nomi kunsidu na tudu mundu. Bu tira fora utru nasons ku se deusis pa da se tera pa bu pobu ku bu liberta di Ejitu.

²⁴ Bu konfirma bu pobu Israel pa e sedu bu pobu pa sempri; abo, SIÑOR, bu bin sedu se Deus.

²⁵ “Gosi, o SIÑOR Deus, kumpri pa sempri ki palabra ku bu fala aserka di bu servu ku si familia; fasi konformi bu palabra,

²⁶ pa bu nomi pudi sedu garandi pa sempri, pa jinti pudi fala: ‘SIÑOR ku ten tudu puder i Deus riba di Israel.’ Jorson di bu servu Davi na konfirmadu bu dianti.

²⁷ “SIÑOR ku ten tudu puder, Deus di Israel, bu mostran e kusa, bu fala kuma bu na konfirma renansa na ña jorson. E ku manda N ngaña koraẑen pa fasiu e orason.

²⁸ Asin, o SIÑOR Deus, abo ki Deus, bu da e bon palabra pa bu servu; bu palabra i di fiansa.

²⁹ Asin N pidiu fabur pa bu bensua ña jorson pa i pudi sta bu dianti pa sempri, pabia abo, SIÑOR Deus, bu da bu palabra; bu benson na sta sempri riba di jorson di bu servu.”