2 Samuel 5 - BIBLIA - traduson antigu in Krioulo

Davi fasidu rei di tudu Israel

¹ Dipus, tudu jorsons di Israel bai pa Davi na Ebron, e falal: “Anos no junta sangi ku bo.

² Mesmu na ki tempu ku Saul seduba inda no rei, i abo ku ta baiba dianti di tropas di Israel. Tambi SIÑOR falau kuma bu na sedu gia di si pobu Israel; bu na sedu se rei.”

³ Asin tudu garandis di Israel bai pa rei Davi na Ebron; rei fasi kontratu ku elis la, dianti di SIÑOR; e unji Davi suma rei riba di Israel.

⁴ Davi teneba trinta anu oca ki kumsa rena; i rena korenta anu.

⁵ I rena riba di Judá na Ebron pa seti anu ku seis mis; i rena na Jerusalen riba di tudu Israel ku Judá trinta i tris anu.

Davi ngaña Jerusalen

⁶ Rei bai ku si omis kontra jebuseus ku moraba na Jerusalen. Jebuseus pensaba kuma Davi ka pudi yentra la; e falal: “Bu ka na yentra li; nin ki segus ku mankus, e pudi tujiu yentra!”

⁷ Ma Davi toma ki kau forti di Sion, ku bin sedu prasa di Davi.

⁸ Davi fala na ki dia: “Kualker ku na ngaña jebuseus ten ku pasa na kanal pa yangasa ki mankus ku segus ku Davi nfastia.” Di la ki sai ki ditu ku fala: “Nin segu nin manku ka na yentra ne kasa.”

⁹ Asin Davi bai mora na ki kau forti, i comal prasa di Davi. I kumsa kumpu prasa na roda, desdi Milu te dentru di prasa.

¹⁰ Asin Davi fika i na torna kada bias mas forti, pabia SIÑOR Deus di tudu puder staba ku el.

Davi fasi kontratu ku rei Iron

¹¹ Iron, rei di Tiru, manda jinti pa e bai kombersa ku Davi; i mandal madera di sedru, karpinterus ku pedrerus ku bin kumpu kasa pa Davi.

¹² Asin Davi ntindi kuma SIÑOR konfirmal ja pa i sedu rei di Israel; i ntindi tambi kuma SIÑOR garandisi si renu pa amor di si pobu.

Fijus ku Davi padi na Jerusalen

¹³ Dipus ku Davi munda di Ebron, i ranja mas kumadris ku minjeris na Jerusalen, i padi mas fijus macu ku femia.

¹⁴ Es i nomis di kilis ku padidu na Jerusalen: Samua, Sobab, Natan, Salomon,

¹⁵ Ibar, Elisua, Nefeg, Jafia,

¹⁶ Elisama, Eliada ku Elifelet.

Davi ngaña filisteus

¹⁷ Oca filisteus obi kuma Davi unjidu rei di Israel, e bai ku tudu se tropas pa bai buskal. Davi obi kila, i bai pa kau forti.

¹⁸ Filisteus ciga, e toma konta di tudu kobon di Refain.

¹⁹ Davi konsulta SIÑOR, i puntal: “N pudi bai kontra filisteus? Bu na ntregan elis na ña mon?” SIÑOR falal: “Bai, pabia N na ntrega filisteus na bu mon.”

²⁰ Asin Davi bai pa Baal-Perazin, i ngaña elis la, i fala: “SIÑOR bai ña dianti, i rebenta ku ña inimigus suma korenti di yagu.” E ku manda ki lugar comadu Baal-Perazin.

²¹ Filisteus disa se idulus la; Davi ku si omis leba elis.

²² Filisteus torna bin toma konta di tudu kobon di Refain.

²³ Davi punta SIÑOR; SIÑOR falal: “Ka bu bai pa elis ne ladu, ma boltia se tras, bu bin pa elis na ladu di amoreras.

²⁴ Ora ku bu obi un baruju suma jinti na marŝa la riba, na metadi di amoreras, bu ta bai kinti-kinti, pabia i ta kontra SIÑOR sai bu dianti pa ngaña tropas di filisteus.”

²⁵ Asin Davi fasi konformi SIÑOR mandal; i mata-mata elis desdi Jibeon te na Jezer.