2 Samuel 4 - BIBLIA - traduson antigu in Krioulo

Isboset matadu

¹ Oca Isboset, fiju di Saul, obi kuma Abner muri na Ebron, i pirdi animu; tudu Israel panta.

² Isboset teneba dus omi, kapitons di si tropas; nomi di un i Baaná, di utru i Rekab, fijus di Rimon di Beerot, di jorson di Benjamin, pabia Beerot i konsideradu di Benjamin.

³ I tenba un tempu ku jinti di Beerot kuri e bai Jitain; e bai fika la te aos.

⁴ Jonatas, fiju di Saul, i teneba un fiju comadu Mefiboset, manku na tudu dus pe. I teneba sinku anu di idadi oca noba di Saul ku Jonatas ciga na Jizreel. Minjer ku ta tomaba konta del i lambul, i kuri. Oca ki na janti pa bai, rapas kapli, i kai, i fika manku.

⁵ Rekab ku Baaná, fijus di Rimon di Beerot, e bai me-dia pa kasa di Isboset, e ojal i dita i na durmi, na ora ku sol ta kinti.

^6-7 E yentra te dentru di kasa, suma e na bai toma trigu, e pasa pa kuartu di durmi nunde ku Isboset dita na kama; e fidil na bariga, e matal, e korta si kabesa, e toma kila, e kapli, e yanda tudu ki di noti na terenu rasu,

⁸ e leba kabesa pa Davi na Ebron, e falal: “Ali kabesa di Isboset, fiju di Saul, bu inimigu ku na buskaba matau. Aos SIÑOR juda Ñu Rei vinga Saul ku si familia.”

⁹ Davi ruspundi Rekab ku si ermon Baaná, fijus di Rimon di Beerot, i fala elis: “N jurmenta na nomi di SIÑOR bibu ku libran di tudu kasabi!

¹⁰ Ki algin ku bin pa mi na Ziklag, i kontan kuma Saul muri, i pensa kuma i na tisin bon noba, ma N pañal, N mata. Es i pagamentu ku N dal pa si bon noba!

¹¹ Ku fadi gora omis malvadu ku mata un omi inosenti riba di si kama na si propi kasa! Nta N ka dibi di torna vingansa na bos pa ki sangi ku bo darma, pa N kaba ku bos na mundu?”

¹² Davi da si omis ordi pa e mata elis. E korta elis pe ku mon, e pindra elis lungu di lagua di Ebron. E toma kabesa di Isboset, e nteral na koba di Abner na Ebron.