2 Samuel 24 - BIBLIA - traduson antigu in Krioulo

Davi fasi konta di tropas

¹ Raiba di SIÑOR torna sindi kontra Israel. Satanas cuci Davi pa i fasi konta di Israel ku Judá; asin i tisi mal kontra elis.

² Rei fala Joab, ŝef di tropas: “Pasa na tera di tudu jorson di Israel desdi Dan te na Berseba, bu fasi konta di omis di gera, pa N pudi sibi elis i kantu.”

³ Joab fala rei: “I ta bon ba pa SIÑOR bu Deus buri tropas te sen bias mas di ki es ke sedu gosi, pa i da Ñu Rei vida tok i ojal ku uju! Pabia di ke ku Ñu Rei misti fasi e kusa?”

⁴ Ma palabra di rei tenba mas forsa di ki palabra di Joab ku utru ŝefis di tropa. Asin Joab ku ŝefis sai nunde rei, e bai fasi konta di omis di gera di Israel.

⁵ E kamba Jordon, e pui se kampamentu na Aroer, na kobon di Gad na ladu di sul di prasa, e pasa pa Jazer,

⁶ e bai pa Jilead, pa con di Tatin-Odsi, pa Dan Jaan; dipus, e da volta di Sidon.

⁷ E bai pa lugar forti di Tiru, pa tudu prasas di eveus ku kananeus, e sai pa Berseba na ladu di sul di Judá.

⁸ Asin e da volta di tudu tera; dipus di novi mis ku vinti dia e riba pa Jerusalen.

⁹ Joab konta rei numeru di jinti ku kontadu. Na Israel i tenba 800.000 omi ku pudiba geria ku spada; na Judá i tenba 500.000 omi.

¹⁰ Dipus ki fasi konta di jinti, konsiensia di Davi akusal, i fala SIÑOR: “N peka ciu ne kusa ku N fasi. SIÑOR, N pidiu pa bu tira kulpa di bu servu, pabia N fasi kusa suma tulu.”

^11-12 SIÑOR bin papia ku anunsiadur Gad, videnti di Davi, i mandal pa i fala Davi kuma SIÑOR fala: “N na pui tris kusa bu dianti; kuji un son delis pa N fasiu el.” Davi lanta parmaña sedu.

¹³ Gad bai pa el, i kontal ke ku SIÑOR fala, i puntal: “Bu misti pa tris anu di fomi bin pa bu tera, o pa bu kuri tris mis dianti di inimigus ku na serkau, o pa i ten tris dia di duensa meduñu na bu tera? Pensa diritu, bu jubi kal rasposta ku N na leba pa kil ku mandan.”

¹⁴ Davi fala Gad: “N foronta dimas! Ma i bon pa no kai na mon di SIÑOR, pabia i ta ten garandi pena di jinti; libran di N kai na mon di omis!”

¹⁵ Asin SIÑOR manda duensa meduñu riba di Israel, disna di ki parmaña te na tempu ki falaba, desdi Dan te na Berseba. 70.000 jinti muri.

¹⁶ Oca ku anju na distindi mon riba di Jerusalen pa kaba ku el, SIÑOR muda ideia ki teneba di fasi mal; i fala anju ku na kastigaba pobu: “I justa! Bu pudi para ja.” Anju di SIÑOR staba lungu di kau di masa arus di ki jebuseu Arauna.

¹⁷ Oca ku Davi oja anju ku na mata jinti, i fala SIÑOR: “I ami ku fasi pekadu; kulpa i di mi. E koitadis, ke ke fasi? Bu mon dibi di sta kontra mi ku ña familia.”

¹⁸ Na ki mesmu dia Gad bai pa Davi, i falal: “Subi pa kau di masa arus di ki jebuseu Arauna, bu kumpu altar pa SIÑOR la.”

¹⁹ Davi obdisi ordi di SIÑOR, i bai fasi kil ku Gad falal.

²⁰ Arauna jubi, i oja Davi ku si omis na bin pa el; i sai, i mpina ku rostu na con dianti di rei,

²¹ i punta: “Pabia di ke ku Ñu Rei bin visita si servu?” Davi falal: “N bin pa kumpra bu kau di masa, pa kumpu altar pa SIÑOR, pa e kastigu ku sta riba di pobu pudi para.”

²² Arauna fala Davi: “Ñu Rei pudi toma tudu ki misti pa sakrifika. Ali turus pa oferta kemadu, ku se kangas ku pos di masa pa fasi leña.”

²³ Arauna mistiba da rei tudu ki kusas, i falal: “SIÑOR bu Deus ta setau.”

²⁴ Rei fala Arauna: “Nau. Bu ta pui pres; N na kumpral, pabia N ka na sakrifika oferta kemadu pa SIÑOR ña Deus ku ka kustan nada.” Asin Davi kumpra kau di masa arus tudu ku ki turus pa sinkuenta mueda di prata;

²⁵ i kumpu altar pa SIÑOR la, i sakrifika ofertas kemadu ku ofertas di pas. Asin SIÑOR ruspundi orason pa tera; ki duensa ku na kastigaba Israel i para.