2 Samuel 23 - BIBLIA - traduson antigu in Krioulo

Ultimu palabras di Davi

¹ Davi, fiju di Jesé, i sedu omi ku Deus garandisi, omi ku Deus di Jakó kuji pa i sedu rei, omi di Israel ku ta kanta sabi pa ngaba Deus. Es i si ultimu palabra:

² “Spiritu di SIÑOR papia na ña boka; si palabra staba na ña lingua.

³ Deus di Israel papia; Roca di Israel falan: ‘Si i ten un algin justu ku na rena riba di omis, ku na rena ku rispitu pa Deus,

⁴ i suma lus di parmaña sin nuven, ora ku sol na sai, ku ta pui paja lanta, i lampra dipus di cuba.’

⁵ “Nin ku ña familia ka bin na yanda de manera, ma Deus fasi ku mi un kontratu ku ka na kaba, ku rumadu diritu, ku sta suguru. Ña salbason ku ña kontentamentu na sedu kompletu, nin ki ka sta inda maduru.

⁶ Ma jinti malvadu na botadu fora suma fidida ku ka pudi pegadu ku mon.

⁷ Algin ku na toka nel i ten ku usa feramentu o kañaku; e na kemadu ku fugu na kau ke sta nel.”

Omis balenti di Davi

⁸ Esis i nomis di omis balenti di Davi: Joseb-Basebet, di Takemoni, i sedu ŝef di ki tris kapiton. I el ku bai ku kañaku kontra oitusentus omi, i mata elis na un nkontru son.

⁹ Sugundu di ki tris balenti i seduba Eleazar, fiju di Dodó, fiju di Aoi. I staba ku Davi oca ke disafia filisteus ku juntaba pa gera. Omis di Israel rakua pa tras,

¹⁰ ma Eleazar fika firmi, i mata-mata filisteus, tok si mon kansa, i kola na spada. Na ki dia SIÑOR da elis un garandi libramentu. Omis di Israel riba pa el, ma son pa disarma difuntus.

¹¹ Terseru di ki tris seduba Samá, fiju di Ajé, di Arar. Oca manga di filisteus junta na un lugar di lentilias, israelitas kuri delis,

¹² ma Samá fika firmi na metadi di ki lugar, i difindil, i mata filisteus. SIÑOR da un garandi libramentu.

¹³ Na tempu di kebur, tris di ki trinta ŝef e bai pa Davi na kaverna di Adulan. Multidon di filisteus staba kampadu na kobon di Refain.

¹⁴ Davi staba na un lugar forti; kampamentu di filisteus staba na Belen.

¹⁵ Davi sinti saudadis, i fala: “Pañan algin pa i tisin yagu di ki fonti ku sta lungu di porton di Belen pa N bibi!”

¹⁶ Ki tris balenti fura na kampamentu di filisteus, e kata yagu na fonti lungu di porton di Belen, e lebal pa Davi, ma i nega bibil; i darmal na con suma oferta pa SIÑOR,

¹⁷ i fala: “SIÑOR, N ka pudi fasi un kusa suma es! I ta sta suma N na bibi sangi de omis ku pui se vida na pirigu.” Asin Davi nega bibil. Es i kusas ku ki tris balenti fasi.

¹⁸ Abisai, ermon di Joab, fiju di Zeruia, seduba ŝef di ki trinta. I lantanda si kañaku kontra trizentus omi, i mata elis; i ngaña fama na metadi di ki trinta,

¹⁹ tok i bin sedu se ŝef. Utrus ta pensa kuma i tenba fama mas di ki ki tris, ma i ka ciga di kontadu na se metadi.

²⁰ Benaia tambi, fiju di Jeoiada, di Kabzeel, un omi balenti ku ta fasiba manga di kusa di fama, i mata dus omi di Moab, forti suma lion. I disi tambi na un koba na tempu di nevi, i mata un lion la.

²¹ I mata tambi un omi di Ejitu, geriadur di fama ku teneba kañaku na mon. Benaia bai pa el ku manduku na mon, i rabata kañaku na mon di ki ejipsiu, i matal ku el.

²² Es i kusas ku Benaia, fiju di Jeoiada, fasi; e ku manda i tenba fama suma ki tris.

²³ Na metadi di ki trinta, el ku mas tenba fama, ma i ka kontadu ku ki tris. Davi pul suma ŝef di si guarda kosta.

²⁴ Asael, ermon di Joab, seduba un di ki trinta, ku e utrus tambi: El-Anan, fiju di Dodó, di Belen;

²⁵ Samá, arodita; Elika, arodita;

²⁶ Elez, paltita; Ira, fiju di Ikes, di Tekoa;

²⁷ Abiezer, anatotita; Mebunai, usatita;

²⁸ Zalmon, aoita; Maarai, netofatita;

²⁹ Eled, fiju di Baaná, netofatita; Itai, fiju di Ribai, di Jibeá di Benjamin;

³⁰ Benaia, piratonita; Idai di kobon di Gaás;

³¹ Abi-Albon, arbatita; Azmavet, barunita;

³² Eliaba, saalbonita; fijus di Jasen; Jonatas;

³³ Samá, ararita, Aion, fiju di Sarar, ararita;

³⁴ Elifelet, fiju di Aasbai, maakatita; Elian, fiju di Aitofel, jilonita;

³⁵ Ezrai, karmelita; Paarai, arbita;

³⁶ Igal, fiju di Natan, di Zobá; Bani, gadita;

³⁷ Zelek, amonita; Naarai, di Beerot, ku ta lebaba feramentus di gera di Joab, fiju di Zeruia.

³⁸ Ira, itrita; Gareb, itrita;

³⁹ Urias, eteu. Na tudu e seduba trinta i seti.