2 Samuel 22 - BIBLIA - traduson antigu in Krioulo

Davi kanta pa ngaba Deus

¹ Oca SIÑOR libra Davi na mon di Saul, tambi na mon di tudu si inimigus, i kanta kantiga pa SIÑOR ku e palabras:

² “SIÑOR i ña roca, ña lugar forti, ña libertadur.

³ Ña Deus i ña kau suguru ku N fiansa nel; el i ña tajadera; i forti pa salban. El i ña kau altu di sukundi, nunde ku N ta fika suguru nel. O ña Salbadur, bu salban di violensia!

⁴ N coma SIÑOR ku mersi ngabadu, N fika libri di ña inimigus.

⁵ “Ondas di mortu rola na ña roda; maron meduñu kubrin.

⁶ Kordas di mortu mbaransan; armadilias di mortu pudu pa e pañan.

⁷ “Na ña foronta N coma SIÑOR; N yalsa fála pa ña Deus. El, la na si kasa, i obi ña vos; ña gritu ciga na si oreja.

⁸ “Con bulbuli i tirmi, alisersu di seu balansa i bulbuli, pabia Deus staba ku raiba.

⁹ Fumu sai na si naris; na si boka i sai fugu ku ta kaba ku tudu kusa; brasas di fugu sai nel.

¹⁰ I yabri seu, i ria; nuven sukuru staba bas di si pe.

¹¹ I monta na un kirubin, i bua; i yanda na asa di bentu.

¹² I pui sukuru na si roda suma kurtina; i kubri ku nuvens di seu ku inci yagu.

¹³ Raius di fugu sai na lus ku na lampra si dianti.

¹⁴ La na seu SIÑOR yalsa si fála; Deus ku sta riba di tudu i papia risu suma turbada.

¹⁵ I manda fleŝas, i pajiga inimigus; i manda raius ku serka elis.

¹⁶ Oca SIÑOR raprindi, folgu forti rebenta na si naris; fundura di mar ojadu; alisersu di mundu diskubridu.

¹⁷ “El, na si kau altu, i distindi si mon, i pegan, i tiran na yagu fundu.

¹⁸ I libran di ña inimigu forti, di kilis ku odian, ku sedu mas forti di ki mi.

¹⁹ E atakan na dia di ña foronta, ma SIÑOR sedu ña forsa.

²⁰ I libran di pirigu pabia i kontenti ku mi; i tiran fora, pa un kau largu.

²¹ “SIÑOR tratan diritu suma ña vida i justu; i pagan konformi puresa di ña mon,

²² pabia N yanda na kamiñus di SIÑOR; N ka disvia di ña Deus pa fasi mal.

²³ Tudu si leis sta ña dianti; N ka disvia di si regras.

²⁴ N fika sin kulpa si dianti; N libra di fasi pekadu.

²⁵ SIÑOR tratan diritu suma ña vida i justu, konformi ña vida puru si dianti.

²⁶ “Ku jinti fiel, bu ta mostra kuma abo i fiel; pa jinti di bardadi, bu ta mostra kuma abo i bardadi.

²⁷ Pa jinti puru, bu ta mostra kuma abo i puru, ma pa jinti tortu, bu ta mostra kuma abo i risu.

²⁸ Bu ta salba jinti umildi, ma bu uju ta sta kontra jinti orgulyosu, pa bati elis.

²⁹ SIÑOR, abo i ña kanderu, bu ta numian na sukuru.

³⁰ Ku bu ajuda N ta fura na metadi di tropas; ku ña Deus N ta salta riba di mura.

³¹ “Kamiñu di Deus i pirfitu; palabra di SIÑOR i sertu. SIÑOR i tajadera pa tudu jinti ku fiansa nel.

³² Kin ki Deus si i ka SIÑOR? Kin ku sedu Roca si i ka no Deus?

³³ Deus i kil ku ta dan forsa, i ta pui ña kamiñu pa i sedu pirfitu.

³⁴ I ta fasi ña pe suma di gazela; i ta firmantan na kau altu.

³⁵ I ta trena ña mon pa gera, di manera ki ten forsa pa usa mansasa di kobri.

³⁶ Bu ta difindin, bu ta salban; bu mansesa pun pa N sedu garandi.

³⁷ Bu fasi ña kamiñu mas largu pa N yanda nel; asin ña pe fika suguru.

³⁸ “N serka ña inimigus, N ngaña elis; N ka riba tras tok N kaba ku elis.

³⁹ N bati elis, N pocoli elis, tok e ka pudi lanta mas; e kai bas di ña pe.

⁴⁰ Bu dan forsa pa gera; kilis ku lanta kontra mi, bu baŝa elis ña dianti.

⁴¹ Bu pui ña inimigus pa e kuri di mi; N kaba ku kilis ku odianba.

⁴² E buska ajuda, ma i ka ten kin ku na libra elis; e coma SIÑOR, ma i ka kudi elis.

⁴³ N mui elis suma puera, N masa elis suma lama na rua, N pajiga elis.

⁴⁴ “Bu libran oca ña pobu lanta kontra mi; bu guardan suma kabesa di nasons; jinti ku N ka kunsi e na sta bas di mi.

⁴⁵ Stranjerus fika bas di mi; ora ke obi ña fála, e ta obdisin.

⁴⁶ E pirdi koraẑen, e sai na se kaus forti ku medu.

⁴⁷ “SIÑOR sta bibu! Kil ku sedu ña Roca dibi di ngabadu! Deus, ña Salbadur forti, pa i garandisidu!

⁴⁸ I Deus ku ta vinga pa mi, i pui nasons bas di mi;

⁴⁹ i ta libran na mon di ña inimigus. Bu ta yalsan riba di kilis ku lanta kontra mi; bu ta libran di omis violentu.

⁵⁰ Asin, SIÑOR, N na ngabau na metadi di nasons; N na kanta pa ngaba bu nomi.

⁵¹ I el ku ta da garandi vitorias pa si rei; i ta mostra bondadi pa rei ki kuji, ku sedu Davi ku si jorson pa sempri.”