2 Samuel 21 - BIBLIA - traduson antigu in Krioulo

Vingansa di jibeonitas

¹ Na tempu di Davi i tenba fomi ku dura pa tris anu. Davi bai punta SIÑOR; SIÑOR falal: “I pabia di kulpa di sangi ku sta riba di Saul ku si familia, manera ki mata jibeonitas.”

² Jibeonitas ka seduba fijus di Israel, ma e seduba kilis di amoreus ku sobra. Fijus di Israel jurmentaba pa ka mata elis, ma Saul mistiba kaba ku elis, pabia di si interes pa ben di fijus di Israel ku Judá. Rei coma jibeonitas,

³ i punta elis: “Ke ku bo misti pa N fasi bos? O kal pagamentu ku bo misti pa N da bos pa bo pudi bensua pobu di SIÑOR?”

⁴ Jibeonitas ruspundi e fala rei: “I ka uru nin prata ku na rezolvi purblema ku no tene ku Saul ku si familia, nin no ka misti mata ningin na Israel.” Davi punta elis: “Ke ku bo misti pa N fasi bos?”

⁵ E ruspundi e fala rei: “Ki omi mistiba kaba ku nos pa no ka pudi ojadu na nin un kantu di Israel.

⁶ Danu seti omi na si familia pa no nforka elis dianti di SIÑOR na Jibeá, prasa di Saul, kil ku SIÑOR kujiba.” Rei fala elis: “N na da bos elis.”

⁷ Rei ka ntrega Mefiboset, fiju di Jonatas, fiju di Saul, manera ku el ku Jonatas e jurmentaba pa ŋutru na nomi di SIÑOR,

⁸ ma rei toma dus fiju ku Saul padi ku Rizpa, fiju femia di Aia, ku sedu Armoni, ku Mefiboset, suma tambi sinku fiju di Merab, fiju di Saul, ki padiba ku Adriel, ki meolatita, fiju di Barzilai.

⁹ Davi ntrega elis na mon di jibeonitas, ku nforka elis ku korda na monti dianti di SIÑOR. Tudu seti muri juntu. E matadu na tempu di kebur, oca jinti na kumsa korta sevada.

¹⁰ Rizpa, fiju di Aia, toma sakus, i distindi elis riba di un pedra garandi, i fika la disna di kumsada di kebur te na tempu ku cuba kai ku forsa riba delis; i ka disa kacus ria riba delis di dia, nin pa limarias di matu toka nelis di noti.

¹¹ Oca Davi kontadu ke ku Rizpa, kumadri di Saul, fiju di Aia, fasi,

¹² i bai toma os di Saul ku di si fiju Jonatas na mon di moraduris di Jabes-Jilead, ku furtaba ki kurpus na rua di Bet-San, nunde ku filisteus pindraba elis dipus de mata Saul na Jilboa.

¹³ I leba os di Saul ku di si fiju Jonatas di la; jinti junta tambi os di kilis ku nforkadu.

¹⁴ E ntera os di Saul ku di si fiju Jonatas na con di Benjamin na Zela, na koba di Kis, pape di Saul; e fasi tudu ku rei manda. Dipus di kila, Deus ruspundi se orason pa se tera.

Geras kontra filisteus

¹⁵ I bin ten mas utru gera na metadi di filisteus ku Israel. Davi ku si omis bai geria kontra filisteus, ma Davi fika kansadu.

¹⁶ Isbi-Benob, di jorson di jigantis, ku si kañaku ta pesaba serka di tris kilu i meiu, ku maraba un spada nobu na rabada, i staba kuas pa mata Davi.

¹⁷ Abisai, fiju di Zeruia, bai judal, i mata ki filisteu. Omis di Davi jurmenta e fala: “Nunka mas bu ka na sai ku nos pa bai geria, pa lus di Israel ka pagadu.”

¹⁸ Dipus di kila i bin ten utru gera kontra filisteus na Gob. Na ki gera un omi di Usa comadu Sibekai i mata Saf, di jorson di jigantis.

¹⁹ I bin ten mas utru gera kontra filisteus na Gob; El-Anan, fiju di Jaré-Orejin, di Belen, i mata ki jiteu Golias, ku po di si kañaku seduba suma ransi di fisial.

²⁰ I fasidu mas utru gera na Gat, nunde ki tenba un omi kumpridu dimas, ku teneba seis dedu na kada mon ku seis na kada pe, ku sedu vinti i kuatru na tudu. El tambi i di jorson di jigantis.

²¹ I fika i na koba Israel, i na disafia elis, ma Jonatas, fiju di Simei, ermon di Davi, matal.

²² Ki kuatru omi e seduba di jorson di jigantis di Gat. Elis tudu e muri na mon di Davi ku si omis.