2 Samuel 2 - BIBLIA - traduson antigu in Krioulo

Davi unjidu rei di Judá

¹ Mas tardi Davi konsulta SIÑOR i punta: “N dibi di bai pa un prasa di Judá?” SIÑOR falal pa i bai. Davi puntal pa nunde ki na bai. SIÑOR falal: “Pa Ebron.”

² Asin Davi bai pa la, tudu ku si dus minjer, Ainoan di Jizreel ku Abigail, viuva di Nabal, di Karmelu.

³ Davi leba tambi ki omis ku staba ku el, kada kin ku si familia. E bai fika na Ebron ku prasas na roda.

⁴ Omis di Judá bai unji Davi suma rei di jorson di Judá. Oca Davi kontadu kuma, i omis di Jabes-Jilead ku ntera Saul,

⁵ i manda jinti ku rekadu pa e bai fala elis: “SIÑOR ta bensua bos manera ku bo fasi e bondadi di ntera Saul, bo mestre.

⁶ N misti pa SIÑOR sedu bon i fiel pa bos; ami tambi N na trata bos diritu, manera ku bo fasi e kusa.

⁷ Gosi ja, bo dibi di sedu omis forti di koraẑen. Saul, bo mestre, muri ja, ma jinti di Judá unjin rei riba delis.”

Isboset fasidu rei di Israel

⁸ Oca ke kusas na kontisi, Abner, fiju di Ner, ŝef garandi di tropas di Saul, i toma Isboset, fiju di Saul, i kamba Jordon ku el pa Maanain,

⁹ i fasil rei riba di Jilead, ku jinti di Asuri, Jizreel, Efrain, Benjamin ku tudu Israel.

¹⁰ Isboset, fiju di Saul, i teneba korenta anu oca ki kumsa rena riba di Israel; i rena dus anu. Ma jorson di Judá fika ku Davi,

¹¹ ku rena na Ebron riba di jorson di Judá pa seti anu ku seis mis.

Gera entri jorson di Judá ku restu di Israel

¹² Abner, fiju di Ner, juntu ku omis di Isboset, fiju di Saul, e sai di Maanain, e bai pa Jibeon.

¹³ Joab, fiju di Zeruia, ku omis di Davi, e sai tambi; e bai kontra ku ŋutru lungu di lagua di Jibeon, e sinta la, un grupu ne ladu, utru grupu na utru ladu.

¹⁴ Abner fala Joab: “Disa utrus di no rapasis lanta pa e bin juga spada ku ŋutru no dianti.” Joab falal: “E pudi lanta.”

¹⁵ Asin e lanta; e fasi konta di dozi rapas di jorson di Benjamin di ladu di Isboset, fiju di Saul, ku dozi rapas di ladu di omis di Davi.

¹⁶ Kada kin pega kabesa di kil ki na lutaba ku el, i fidil ku spada na pontada; asin elis tudu e kai mortu. E ku manda e coma ki lugar lungu di Jibeon Kampu di Spada.

¹⁷ I bin ten un gera meduñu na ki dia, ma omis di Davi ngaña Abner ku omis di Israel.

¹⁸ Tris fiju di Zeruia staba la, ku sedu Joab, Abisai ku Asael. Asael, ku seduba lestu na kurida suma kabra-matu,

¹⁹ i pega tras di Abner, i ka jingi, nin pa direita nin pa skerda.

²⁰ Abner jubi pa tras, i puntal: “Es i abo, Asael?” I falal: “I ami.”

²¹ Abner falal: “Para serkan, bu pega tras di kualker rapas, bu pañal, bu toma si feramentus di gera.” Ma Asael nega sai si tras.

²² Abner torna falal: “Para serkan. Pabia di ke ku bu na pun pa N matau? Si N fasi asin, ku kal rostu ku N na jubi bu ermon Joab?”

²³ Suma Asael nega sai si tras, Abner rabida mon pa tras, i fidil ku kañaku na bariga, tok i sai tras. I kai la na ki mesmu kau, i muri. Tudu algin ku ciga nunde ku Asael dita mortu, i ta paraba la.

²⁴ Joab ku Abisai pega tras di Abner. Oca sol na kai, e ciga na monti di Amá, ku sta dianti di Jia, lungu di kamiñu ku ta bai pa lala di Jibeon.

²⁵ Fijus di Benjamin junta tras di Abner, e toma pusison di gera la riba di un monti.

²⁶ Abner grita pa Joab, i puntal: “Nta spada na kontinua mata pa sempri? Bu ka sibi kuma kabantada de gera i na sedu son kasabi? Kal tempu ku bu na fala bu jinti pa e para serka se ermons?”

²⁷ Joab falal: “N jurmenta na nomi di Deus bibu kuma, si bu ka falalba, ña jinti ka na paraba serka se ermons tok sol mansi.”

²⁸ Asin Joab toka korneta; tudu si omis para serka Israel, e ka geria mas.

²⁹ Abner ku si omis e yanda tudu ki di noti na kobon, e kamba Jordon, e yanda tambi tudu ki parmaña, e ciga na Maanain.

³⁰ Dipus di Joab para serka Abner, i junta tudu si tropas, i oja kuma, fora di Asael, disanovi omi falta na ladu di Davi.

³¹ Ma tropas di Davi mataba trizentus i sesenta omi di tropas di Abner, di jorson di Benjamin.

³² Joab ku si omis lambu Asael, e bai nteral na koba di si pape, na Belen; e yanda tudu ki di noti, e ciga na Ebron oca sol na mansi.