2 Samuel 15 - BIBLIA - traduson antigu in Krioulo

Rebelion di Absalon

¹ Mas tardi Absalon bin ranja karus ku kabalus, ku sinkuenta omi pa kuri si dianti.

² Tambi i ta lantaba parmaña sedu, i bai para lungu di kamiñu ku ta bai pa porton di prasa. Ora ku kualker omi ku tene keŝa na baiba nunde rei pa i fasil justisa, Absalon ta comal, i puntal nos i di kal prasa. Kila ta ruspundi: “Bu servu i di tal jorson di Israel.”

³ Absalon ta falal: “Jubi, bu ten roson; bu kasu i sertu, ma bu ka tene algin na kau di rei ku na obiu.”

⁴ I ta fala mas: “Pañan pa N seduba juis ne tera, pa tudu omis ba ta tisi se keŝa o se purblema nunde mi pa N pudi fasi elis justisa.”

⁵ Ora tambi ku algin bai pertu del pa mpina si dianti, i ta distindi mon, i pega nel, i beẑal.

⁶ Asin ki ta fasi tudu jinti di Israel ku na baiba nunde rei pa bai fasi justisa. Asin Absalon ngaña korson di omis di Israel.

⁷ Na fin di kuatru anu, Absalon fala rei: “Disan bai Ebron pa N bai kumpri purmesa ku N fasi pa SIÑOR,

⁸ pabia, oca ku N staba na Jesur, na Siria, N fasi un purmesa pa SIÑOR, N falal: ‘Si SIÑOR ribantan pa Jerusalen, N na bai adoral.’ ”

⁹ Rei falal: “Bai ku pas.” Asin i lanta i bai pa Ebron.

¹⁰ I manda jinti ku rekadu pa tudu jorson di Israel, pa e fala: “Ora ku bo obi kornetas na toka, bo ta fala: ‘Absalon na rena na Ebron.’ ”

¹¹ Duzentus omi kumbidadu sai na Jerusalen, e bai ku Absalon. E bai inosenti, sin sibi nada di ke ku na pasa.

¹² Tambi, oca ki na fasi sakrifisius, i manda coma Aitofel, ki jilonita, konsijadur di Davi, na si prasa di Jilu. Ravolta mas na buri forsa; numeru di jinti ku staba ku Absalon mas na ciu.

Davi kuri

¹³ Oca algin bin konta Davi kuma korson di jinti di Israel staba ku Absalon,

¹⁴ Davi fala tudu si ŝefis ku staba ku el na Jerusalen: “Bo lanta, no kuri, pabia si i ka asin, nin un son di nos ka na kapli dianti di Absalon. Bo janti no bai, pa ka i bin dipresa i bin pañanu, i fasinu mal, i mata tudu jinti na prasa.”

¹⁵ Ŝefis di rei falal: “Ali bu servus sta pruntu pa fasi kil ku Ñu Rei oja i bon.”

¹⁶ Rei pega kamiñu, ku tudu jinti di si kasa si tras, ma i fika des kumadri pa e guarda kasa.

¹⁷ Oca rei sai ku tudu jinti si tras, e bai para na ultimu kasa di prasa.

¹⁸ Tudu si ŝefis firmaba lungu del, ma tudu kereteus ku peleteus, ku tudu jiteus, ku sedu ki seizentus omi ku binba si tras di Gat, e pasa dianti di rei.

¹⁹ Rei punta Itai, ŝef di jiteus: “Pabia di ke ku bu na bai ku nos tambi? Riba, bu bai fika ku rei Absalon, pabia abo i stranjeru, refuẑiadu di bu propi tera.

²⁰ Bu ka tarda li; nta N na lebau pa bu yanda-yanda ku nos? N ka sibi nunde ku N na bai. Riba pa bu kau, bu leba bu parentis ku bo. Deus ta mostrau si bondadi ku fidelidadi.”

²¹ Itai ruspundi rei i falal: “N jurmenta pa vida di SIÑOR, ku vida di Ñu Rei, kuma, na kualker kau ku Ñu Rei na sta, la tambi ku bu servu na sta, nin si i pa mortu o pa vida.”

²² Davi fala Itai: “Nta no bai po! Pasa dianti.” Asin ki jiteu Itai pasa, ku tudu si omis, ku tudu familia ku staba ku el.

²³ Tudu pobu di ki areas na coraba risu oca tudu ki jinti na pasa. Rei tambi kamba riusiñu di Sedron; elis tudu e pasa pa ladu di lala.

²⁴ Zadok tambi staba la, ku tudu levitas ku na lebaba arka di kontratu di Deus. E finkandal la; Abiatar fika i na fasi sakrifisiu tok tudu jinti kaba sai na prasa.

²⁵ Rei fala Zadok: “Torna leba arka di Deus pa prasa. Si N oja fabur dianti di SIÑOR, i na ribantan la pa N pudi oja arka ku lugar nunde ki ta sta nel,

²⁶ ma si i fala kuma i ka kontenti ku mi, alin li; i pudi fasin kil ki oja kuma i bon.”

²⁷ Rei torna fala saserdoti Zadok: “Nta abo i ka videnti? Riba ku pas pa prasa. Bo tene la bo dus fiju ku sedu Aimaaz, bu fiju, ku Jonatas, fiju di Abiatar.

²⁸ N na pera na kambansa di lala tok N obi bo rekadu.”

²⁹ Asin Zadok ku Abiatar riba pa Jerusalen, ku arka di Deus, e fika la.

³⁰ Davi na cora i na subi monti di Olivera, sin sapatu, ku kabesa kubridu. Tudu jinti ku staba ku el, kada kin kubri si kabesa; e na subi monti, e na cora sin para.

³¹ Jinti konta Davi kuma Aitofel tambi sta juntu ku kilis ku ravolta ku Absalon. Asin Davi ora, i fala: “SIÑOR, kunfundi konsiju di Aitofel.”

³² Oca ku Davi ciga riba di monti, nunde ku jinti kustuma adora Deus, i oja un omi arkita, Usai, ku bai kontra ku el, ku ropa rumpidu, ku reia na kabesa.

³³ Davi falal: “Si bu bai ku mi, bu na sedu kargu pa mi.

³⁴ Ma bu pudi judan dana konsiju di Aitofel si bu riba pa prasa, bu fala Absalon: ‘Ñu Rei, N na sedu bu servu. Suma ku N seduba servu di bu pape, asin ku N na sedu gosi bu servu.’

³⁵ Saserdotis Zadok ku Abiatar e na sta ku bo la. Tudu kil ku bu obi na kasa di rei, bu ta konta elis.

³⁶ Se dus fiju, ku sedu Aimaaz, fiju di Zadok, ku Jonatas, fiju di Abiatar, sta ku elis la. Bu pudi manda elis pa e kontan tudu kusa ku bu obi.”

³⁷ Asin Usai, amigu di Davi, ciga na prasa di Jerusalen na ora ku Absalon na yentra la.