2 Samuel 14 - BIBLIA - traduson antigu in Krioulo

Absalon riba pa Jerusalen

¹ Joab, fiju di Zeruia, nota kuma rei puiba ja sintidu na Absalon.

² I manda tisi un minjer jiru na Tekoa, i falal: “Finji kuma bu sta di lutu, bu bisti ropa pretu; ka bu unta azeiti; bu na fasi suma un minjer ku, disna di manga di tempu, i na cora algin ku muri.

³ Bu ta yentra nunde rei, bu falal e palabra.” Asin Joab kontal ke ki na bai fala.

⁴ Ki minjer di Tekoa bai pa rei, i mpina ku rostu na con, i falal: “Ñu Rei, judan!”

⁵ Rei puntal: “Ke ku bu tene?” Minjer falal: “Na bardadi, ami i viuva, suma ku ña omi muri.

⁶ N teneba dus fiju. Un dia e geria na lugar; i ka ten kin ku na rapati elis. Asin un son mata si kumpañer.

⁷ Gosi tudu familia lanta kontra mi, e falan pa N ntrega elis kil ku mata si ermon, pa e matal tambi pa vinga vida di si ermon ki mata. Asin e misti kaba ku yarderu tambi; e na paga ki un brasa ku N tene ku na yardi inda; e na disa ña omi sin fiju pa kontinua si nomi ne mundu.”

⁸ Rei fala minjer: “Riba pa bu kasa; N na da ordi aserka di bo.”

⁹ Minjer di Tekoa fala rei: “Ñu Rei, si algin fala di injustisa, kulpa ta kai riba di mi, ku familia di ña pape; rei ku si tronu ta fika libri di kulpa.”

¹⁰ Rei falal: “Si algin fala kualker kusa kontra bo, bu ta tisin el; nunka mas i ka na ŝatiau.”

¹¹ Minjer falal: “Ñu Rei ta pidi SIÑOR si Deus pa vingaduris di sangi ka buri mal riba di mal, pa bin kaba ku ña fiju.” Rei falal: “N jurmenta pa vida di SIÑOR kuma nin un kabelu ka na kai na kabesa di bu fiju.”

¹² Minjer falal: “N pidi Ñu Rei pa i da si serva lisensa pa i fala mas un palabra.” Rei falal: “Papia.”

¹³ Minjer puntal: “Nta pabia di ke ku bu na pensa fasi kusa suma es kontra pobu di Deus? Pabia e palabra ku bu kaba papia i ta tornau kulpadu, manera ku bu ka torna tisi kil ku bu serka.

¹⁴ Sertesa kuma no na muri, suma yagu darmadu na con ku ka pudi juntadu mas, ma Deus ka na tira vida; i na ranja manera pa kil ku serkadu na si tera ka fika la lunju del.

¹⁵ “N bin papia e palabra ku Ñu Rei pabia jinti mitin medu; asin N fala kuma N na bai fala ku rei; talves i ta fasi kil ku N pidil.

¹⁶ N pensaba kuma rei ta obin, i libran na mon di ki omi ku misti kaba ku mi juntu ku ña fiju, pa tiranu na yardansa ku Deus danu.

¹⁷ N kuda tambi kuma palabra di Ñu Rei na dan diskansu, pabia Ñu Rei i suma un anju di Deus ku ta rapara ben ku mal. SIÑOR bu Deus ta sta ku bo.”

¹⁸ Rei ruspundi i fala minjer: “N na fasiu purgunta, ma bu ten ku kontan tudu bardadi.” Minjer falal: “Ñu Rei pudi punta.”

¹⁹ Rei puntal: “Nta i ka bardadi kuma Joab sta bu tras ne kusas tudu?” Minjer ruspundi i falal: “N jurmenta pa vida di Ñu Rei kuma ningin ka pudi vira pa direita nin pa skerda pa kapli di ruspundi purgunta di rei. Na bardadi i bu ŝef Joab ku dan ordi; i el ku pui tudu e palabra na boka di bu serva.

²⁰ I fasil pa i pudi minjoria manera ku kusas na kuri, ma Ñu Rei i jiru suma anju di Deus; i ta sibi tudu ku na pasa na tera.”

²¹ Mas tardi, rei fala Joab: “I sta bon; N na fasi kil ku bu misti. Bai bu bai tisi Absalon.”

²² Joab mpina ku rostu na con, i gardisi rei i falal: “Aos N sibi kuma N oja fabur dianti di Ñu Rei, pabia rei seta pididu di si servu.”

²³ Asin Joab lanta, i bai pa Jesur, i tisi Absalon pa Jerusalen,

²⁴ ma rei fala: “I ten ku bai pa si propi kasa; i ka na oja ña rostu.” Asin Absalon bai pa si kasa; i ka oja rostu di rei.

Absalon pui pas ku Davi

²⁵ Na tudu Israel i ka tenba omi ku ta ngabadu pa si bonitasku suma Absalon. Disna di planta di pe te na kabesa i ka teneba nin un difeitu.

²⁶ I teneba manga di kabelu ku ta fikal pisadu; e ku manda, na fin di kada anu, i ta tiral. Ora ku kabelu tiradu, i ta pesa mas di ki dus kilu, konformi pesu di reis.

²⁷ Absalon teneba tris fiju macu ku un femia comadu Tamar, ku seduba minjer bonitu.

²⁸ Absalon fika na Jerusalen dus anu ntidu, sin oja rostu di rei.

²⁹ I manda coma Joab pa mandal nunde rei, ma Joab ka seta bai kudil. I manda comal sugundu bias, ma i ka seta bai.

³⁰ Absalon fala si servus: “Bo bai pui fugu na ki parti di lugar di Joab ku tene dividimentu ku di mi, nunde ki ten sevada.” Servus bai e pui fugu na ki parti di lugar.

³¹ Joab lanta i bai pa kasa di Absalon, i puntal: “Pabia di ke ku bu servus pui fugu na ña lugar?”

³² Absalon fala Joab: “Jubi, N manda comau, N falau pa bu bin pa N mandau nunde rei pa puntal: ‘Ke ku manda N bin di Jesur? I minjor pa N sta la inda.’ Gosi, N misti oja rostu di rei. Si N ten kulpa, i pudi matan.”

³³ Asin Joab bai nunde rei, i kontal ke ku Absalon fala. Rei manda coma Absalon; kila bai nunde el, i mpina si dianti ku rostu na con. Rei beẑa Absalon.