2 Samuel 13 - BIBLIA - traduson antigu in Krioulo

Amnon ku Tamar

¹ Absalon, fiju di Davi, teneba un irma bonitu dimas ku teneba nomi di Tamar. Amnon, fiju di Davi, gostaba ciu del.

² Amnon fika tarpajadu dimas tok i duensi pabia di si irma Tamar. Manera ki seduba inda bajuda, i torna kansadu pa Amnon ten kualker kusa ku el.

³ Amnon teneba un amigu, un omi jiru dimas na fasi mal, ku comadu Jonadab, fiju di Simeia, ermon di Davi.

⁴ Es fala Amnon: “Abo i fiju di rei, ma kada dia bu na magru. Pabia di ke? Bu ka na kontan?” Amnon falal: “N misti Tamar, irma di ña ermon Absalon.”

⁵ Jonadab falal: “Dita na kama, bu finji duensi. Ora ku bu pape bin visitau, bu ta falal kuma bu misti pa bu irma Tamar bin dau di kume, pa i purpara kumida bu dianti, pa bu pudi ojal, bu kume na si mon.”

⁶ Asin Amnon dita, i finji duensi. Oca rei bin visital, Amnon falal: “Di fabur, disa ña irma Tamar bin pa purpara dus bulu ña dianti, pa N kume na si mon.”

⁷ Davi manda rekadu pa Tamar, na palasiu, pa falal: “Bai pa kasa di bu ermon Amnon, pa purparal kusa di kume.”

⁸ Asin Tamar bai pa kasa di si ermon Amnon, ku staba ditadu. I toma masa, i masal, i fasi bulus si dianti, i kusña elis,

⁹ i toma panela, i sirbi si dianti, ma i nega kume; i manda pa tudu jinti sai. Asin e sai tudu.

¹⁰ Amnon fala Tamar: “Tisin kumida li na kama, bu ñukunin el.” Tamar toma ki bulus ki fasi, i leba elis pa si ermon Amnon na kama.

¹¹ Oca ki na dal ki bulus pa i kume, Amnon pegal, i falal: “Ña irma, bin dita ku mi.”

¹² Tamar falal: “Nau, ña ermon, ka bu forsijan, pabia e kusa ka ta fasidu na Israel. Ka bu fasi e tulesa.

¹³ Nunde ku N pudi bai ku ña borgoña? Abo tambi, bu ta sedu suma un di ki tulus di Israel. Di fabur, papia ku rei, pabia i ka na tujin kasa ku bo.”

¹⁴ Amnon ka seta obi ke ku Tamar fala. Suma i mas el forsa, i forsijal, i dita ku el.

¹⁵ Dipus, Amnon disgosta del dimas, tok ki disgustu bin mas ki amor ki amalba ku el. Amnon falal: “Lanta, bu bai.”

¹⁶ Tamar falal: “Bu ka ten roson di dispidin asin, pabia e mal i ta sedu pior di ki ki utru ku bu fasin ja.” Ma i ka seta obil.

¹⁷ I coma rapas ku ta sirbil, i falal: “Tira es fora, bu fica porta si tras.”

¹⁸ Kriadu tiral fora, i fica porta si tras. Tamar bistiba un bistidu di manga di kor, pabia asin ku fijus femia di rei ku sedu inda bajudas ta bistiba.

¹⁹ I toma sinsa, i pul na kabesa, i rumpi ki bistidu di manga di kor ki bistiba, i pui mon na kabesa, i na cora pa bai.

²⁰ Si ermon Absalon puntal: “Nta bu ermon Amnon staba ku bo? Keta, ña irma; i bu ermon. Ka bu pui es na sintidu.” Asin Tamar fika tristi na kasa di si ermon Absalon.

²¹ Rei Davi obi tudu ki kusas, i paña raiba ciu.

²² Absalon ka fala Amnon nada, nin po nin pedra, pabia i odial, manera ki forsija si irma Tamar.

Absalon mata Amnon

²³ I pasa dus anu ntidu. Absalon teneba jinti ku na tiskia karnel na Baal-Azor, pertu di Efrain. Absalon kumbida tudu fijus di rei.

²⁴ I bai pa rei i falal: “Ali bu servu tene tiskiaduris; N misti kumbida rei ku si ŝefis pa e bai ku mi.”

²⁵ Rei fala Absalon: “Nau, ña fiju, no ka na bai tudu, pa ka no sedu kargu pa bo.” Absalon ngodal, ma i nega bai; i dal son benson.

²⁶ Absalon falal: “Si bu ka na bai, disa ña ermon Amnon bai ku nos.” Rei puntal: “Ke ki na bai ku bo pa el?”

²⁷ Absalon ngodal; i disa Amnon bai ku el, ku tudu fijus di rei.

²⁸ Absalon da ordi pa si rapasis, i fala elis: “Bo sta ku atenson! Ora ku Amnon caskia ja ku biñu, si N da bos ordi, bo ta matal. Ka bo ten medu. Nta i ka ami ku da ordi? Bo mara koraẑen, bo sedu omis!”

²⁹ Rapasis di Absalon mata Amnon suma ku Absalon da elis ordi. Asin tudu fijus di rei lanta, e bai se kamiñu, kada kin montadu na si buru.

³⁰ Oca ke staba inda na kamiñu, notisia ciga nunde Davi kuma Absalon mata tudu fijus di rei; nin un son delis ka sobra.

³¹ Rei lanta, i rumpi si ropa, i mborka na con. Si servus tudu e firma tambi lungu del ku ropa rumpidu.

³² Jonadab, fiju di Simeia, ermon di Davi, fala: “Ñu Rei ka dibi di kuda kuma e mata tudu ki jovens, fijus di rei, pabia son Amnon ku muri. I pudi notadu na rostu di Absalon kuma i pui sintidu pa mata Amnon disna di ki dia ki forsija si irma Tamar.

³³ Ka Ñu Rei fia na palabra ku fala kuma tudu fijus di rei muri, pabia i son Amnon ku muri.”

³⁴ Absalon kuri i bai. Rapas ku staba na sirvis di guarda i yalsa uju, i oja manga di jinti na bin na kamiñu na ladu di monti.

³⁵ Jonadab fala rei: “Ala fijus di rei na bin; suma ku bu servu fala, asin ki sedu.”

³⁶ Oca ki kaba papia son, fijus di rei ciga, e yalsa se fála, e cora. Tambi rei ku tudu si servus cora ku forsa.

^37-38 Absalon kuri, i bai pa Talmai, fiju di Amiur, rei di Jesur; i fika la tris anu. Davi fika i na cora si fiju kada dia.

³⁹ Oca ki konsola di mortu di Amnon, i sinti saudadis di Absalon.