2 Samuel 11 - BIBLIA - traduson antigu in Krioulo

Davi ku Bateseba

¹ Dipus di un anu, na tempu ku reis kustuma ta bai gera, Davi manda si ŝefis ku Joab, ku tudu tropas di Israel. E bai ngaña fijus di Amon, e taja Rabá. Davi fika na Jerusalen.

² Un dia di tardi, oca Davi lanta na kama, i na pasia-pasia riba di palasiu. Di la i oja un minjer ku na lababa kurpu. Ki minjer i bonitu ba dimas.

³ Davi manda punta aserka di ki minjer. E falal: “Sertamenti es i Bateseba, fiju di Elian, minjer di ki eteu Urias.”

⁴ Asin Davi manda jinti ku rekadu pa e bai tisil. Oca i ciga, i dita ku el. (Minjer purifikaba ja di si impuresa.) Dipus i riba pa si kasa.

⁵ Minjer bin paña bariga, i manda konta Davi kuma i preña.

⁶ Davi manda fala Joab: “Mandan ki eteu Urias.” Asin Joab manda Urias pa Davi.

⁷ Oca Urias ciga, Davi puntal kuma ku Joab ku tropas staba, tambi kuma ku gera na bai.

⁸ Dipus i fala Urias: “Bai pa kasa, bu bai laba pe.” Oca Urias sai na palasiu, rei manda algin si tras ku kumida.

⁹ Ma Urias ka bai pa si kasa; i dita na porton di palasiu juntu ku tudu servus di rei.

¹⁰ Oca jinti konta Davi kuma Urias ka bai pa si kasa, i punta Urias: “Nta bu ka bin di un bias kumpridu? Ke ku manda bu ka bai pa kasa?”

¹¹ Urias fala Davi: “Arka sta na tenda, tudu ku tropas di Israel ku Judá; ña ŝef Joab ku ŝefis di Ñu Rei e sta la kampadu na matu. Kuma ku ami N na bai pa ña kasa pa kume, pa bibi, pa dita ku ña minjer? N jurmenta pa bu vida kuma N ka na fasi kusa suma es!”

¹² Davi falal: “Fika li aos; amaña N ta dispidiu.” Asin Urias fika na Jerusalen ki dia ku mas utru dia.

¹³ Davi kumbidal; i bai kume i bibi ku el; Davi camintil, ma di tardi Urias sai, i bai dita na si stera ku servus di rei; i ka bai pa kasa.

¹⁴ Parmaña Davi skirbi un karta pa Joab, i mandal na mon di Urias.

¹⁵ Na karta i skirbi asin: “Pui Urias la dianti na kau ku gera mas forti nel; bo ta rakua, bo disal pa i matadu.”

¹⁶ Suma ku Joab tardaba na jubi kuma ku prasa sta, i pui Urias na kau ki sibi kuma inimigus tenba mas forsa nel.

¹⁷ Oca omis di prasa sai pa geria ku Joab, utru tropas di Davi kai mortu; ki eteu Urias muri tambi.

¹⁸ Joab manda konta Davi tudu kusa ku pasa na gera.

¹⁹ I da ordi pa ki algin ku na leba rekadu, i falal: “Ora ku bu kaba konta rei tudu ku pasa na gera,

²⁰ rei pudi paña raiba, i puntau: ‘Ke ku manda bo bai pertu di prasa pa bai geria? Bo ka sibiba kuma jinti ku sta riba di mura ten ku manda fleŝas?

²¹ Kin ku mata Abimelek, fiju di Jidion, na Tebez? I ka un minjer ku staba riba di mura ku toma pedra di muiñu, i pui pa i kai riba di si kabesa, i matal? Ke ku manda bo ciga pertu di mura?’ Si i fala asin, bu ta falal: ‘Ki bu servu eteu, Urias, i muri tambi.’ ”

²² Ki omi bai ku rekadu, i yentra, i konta Davi tudu kusa ku Joab mandal pa i fala.

²³ I fala Davi: “Na bardadi ki omis seduba mas forti di ki nos; e sai pa nos la na matu, ma no bai kontra elis, no pinca elis te na entrada di porton di prasa.

²⁴ Tropas ku mansasa ku staba riba di mura e manda fleŝas pa nos; utru ŝefis di rei muri; ki bu servu eteu, Urias, i muri tambi.”

²⁵ Davi fala ki omi ku tisiba rekadu pa i bai fala Joab asin: “Ka bu fika tristi pabia de kusa, pabia ningin ka pudi sibi kin ku na muri na gera. Geria ku mas forsa inda kontra ki prasa, bu ngañal. Mara koraẑen!”

²⁶ Oca minjer di Urias obi kuma si omi muri, i cora pa el.

²⁷ Oca tempu di cur pasa, Davi manda tisil pa si kasa; i bai sedu si minjer, i padi un fiju ku el, ma SIÑOR ka kontenti ku ki kusa ku Davi fasi.