2 Samuel 10 - BIBLIA - traduson antigu in Krioulo

Davi ngaña amonitas ku sirus

¹ Mas tardi, rei di amonitas muri; si fiju Anun rena na si lugar.

² Davi fala: “N ten ku mostra amisadi pa Anun, fiju di Naás, suma ku si pape mostraba amisadi pa mi.” Asin Davi bin manda jinti pa e bai falal manteña pabia di mortu di si pape. Oca ki omis ku Davi manda bin ciga na tera di amonitas,

³ ŝefis di amonitas punta se mestre Anun: “Bu kuda kuma i pabia di rispitu pa bu pape ku Davi manda falau manteña? Nta i ka manda nan elis pa e bin spia e prasa, pa kunsil, pa jubi manera di tomal?”

⁴ Asin Anun paña ki omis di Davi, i rapa elis metadi di barba, i korta se ropa te na rabada, i dispidi elis.

⁵ Oca Davi kontadu ki kusa, i manda jinti pa e bai kontra ku elis, pabia ki omis staba ku garandi borgoña; asin rei manda fala elis: “Bo fika na Jerikó tok barba kirsi; dipus bo ta bin.”

⁶ Oca amonitas nota kuma e fasi kusa nujenti pa Davi, e manda luga sirus di Bet-Reob ku di Zobá, ku sedu vinti mil soldadu di pe, ku mil soldadu di rei di Maaka, ku dozi mil omi di Tob.

⁷ Oca Davi obi es, i manda Joab ku tudu si tropas.

⁸ Amonitas sai, e toma pusison di gera na entrada di porton di prasa, ma sirus di Zobá ku di Reob, ku omis di Tob ku di Maaka, e formaba aparti fora di prasa.

⁹ Joab oja kuma tropas di inimigu na bin pa el dianti ku tras; i kuji utru di minjor tropas di Israel, i formanta elis kontra sirus;

¹⁰ i ntrega restu di tropas na mon di si ermon Abisai, ku formanta elis kontra amonitas.

¹¹ Joab fala Abisai: “Si sirus bin mas mi forsa, bu ta bin sakuran; si amonitas bin mas bo forsa, N ta bai sakurau.

¹² Sedu forti! No geria ku koraẑen pa no pobu ku prasas di no Deus. SIÑOR ta fasi konformi si vontadi.”

¹³ Joab ku tropas ku staba ku el e avansa pa geria kontra sirus; sirus kuri se dianti.

¹⁴ Oca amonitas oja kuma sirus na kuri, elis tambi e kuri dianti di Abisai, e yentra na prasa. Joab riba di geria kontra amonitas, i bai pa Jerusalen.

¹⁵ Oca sirus oja kuma e pirdi gera ku Israel, tropas torna junta mas.

¹⁶ Adad-Ezer manda coma sirus ku staba na utru banda di riu Eufrates; e bin pa Elan. Sobak, ŝef di tropas di Adad-Ezer, i na marŝaba se dianti.

¹⁷ Oca jinti konta Davi, i junta tudu tropas di Israel, i kamba Jordon, i bai pa Elan. Sirus toma pusison di gera kontra Davi, e geria ku el.

¹⁸ Sirus kuri dianti di Israel. Davi mata setsentus delis, omis ku ta yandaba ku karu, ku mas korenta mil omi di kabalu. I molosta tambi Sobak, ŝef di tropas; kila bin muri la.

¹⁹ Oca tudu reis ku staba bas di Adad-Ezer oja kuma e staba ja mal dianti di Israel, e fasi pas ku elis, e fika bas delis. Sirus ka osa mas bai sakura amonitas.