2 Samuel 1 - BIBLIA - traduson antigu in Krioulo

Davi obi noba di mortu di Saul

¹ Dipus di mortu di Saul, Davi riba di si vitoria riba di amalekitas, i fika na Ziklag dus dia.

² Na terseru dia un omi bin di kampamentu di Saul, ku si ropa rumpidu, ku reia na kabesa. I ciga nunde Davi, i mpina te na con si dianti.

³ Davi puntal: “Nunde ku bu sai?” I falal: “N kapli na tropas di Israel.”

⁴ Davi falal: “Kontan ke ku kontisi la.” I ruspundil: “Tropas kuri di gera; manga delis kai mortu; tambi Saul ku si fiju Jonatas matadu.”

⁵ Davi punta ki rapas ku tisil noba: “Kuma ku bu sibi kuma Saul ku si fiju Jonatas muri?”

⁶ Rapas falal: “Mbon, i kontisi ku N ciga na montaña di Jilboa, N oja Saul ngostadu na si kañaku. Karus ku kapitons di kabalus e staba kuas pa pañal.

⁷ I rabida pa tras, i ojan, i coman. N kudil N fala: ‘Alin li.’

⁸ I puntan ami i kin. N falal kuma ami i amalekita.

⁹ I falan: ‘Di fabur, ciga li, bu matan, pabia N sta na agunia, ma vida sta na mi inda.’

¹⁰ “Asin N bai pa el, N matal, pabia N sibiba kuma i ka pudi vivi, manera ki sta mal asin. N toma koroa na si kabesa, ku brasleti na si mon, N tisi elis li pa Ñu.”

¹¹ Davi ku tudu omis ku staba ku el e rumpi se ropa,

¹² e miskiña, e cora, e junjuŋa te di tardi pa Saul ku si fiju Jonatas, tambi pa pobu di SIÑOR, manera ku manga di tropa di Israel muri na gera.

¹³ Davi punta ki rapas ku tisil noba: “Abo i di nunde?” I falal: “Ami i fiju di un omi stranjeru, amalekita.”

¹⁴ Davi puntal: “Kuma ku bu ka ten medu di distindi mon pa mata unjidu di SIÑOR?”

¹⁵ Davi coma un di si omis, i falal pa i ciga i matal. Asin i dal ku spada; i muri.

¹⁶ Davi falal: “Abo bu ranja mortu pa bu kabesa, pabia i bu boka propi ku kondenau oca bu fala kuma bu mata unjidu di SIÑOR.”

Kantiga tristi di Davi pa Saul ku Jonatas

¹⁷ Davi miskiña Saul ku si fiju Jonatas ku e kantiga tristi,

¹⁸ i da ordi pa i nsinadu pa fijus di Judá. (I sta skritu na Libru di Jasar.)

¹⁹ “O Israel, na bu montis bu gloria sta mortu! Jubi kuma ku balentis kai!

²⁰ Ka bo kontal na Gat, nin na ruas di Askelon, pa minjeris di filisteus ka fika alegri, nin pa bajudas stranjeru ka jukuta ku kontentamentu.

²¹ “Montis di Jilboa, i bon pa bo ka tene nin serenu nin cuba, nin lugaris ku ta pruduzi kusa di kume, pabia i la ku tajaderas di balentis botadu na disprezu; tajadera di Saul, gosi i ka na lampra ku oliu.

²² Mansasa di Jonatas nunka ka rakua di sangi di mortus, nin di karni di balentis. Spada di Saul ka ta ribaba limpu.

²³ “Saul ku Jonatas, amadus, na se vida jinti gostaba delis; na mortu tambi e ka separa; e seduba mas lestu di ki agia, mas forti di ki lion.

²⁴ “Abos minjeris di Israel, bo cora Saul, kil ku ta bistiba bos ku ropa di luŝu, burmeju, ku ta faja bo bistidus ku joias di uru.

²⁵ “Jubi kuma ku balentis kai na gera! Jonatas sta mortu la na montis!

²⁶ Jonatas ña ermon! N sta tristi dimas pabia di bo; N amauba ciu dimas! Bu amor seduba maravilyosu pa mi, mas di ki amor di minjeris.

²⁷ “Jubi kuma ku balentis kai! Feramentus di gera bandonadu.”