2 Reis 25 - BIBLIA - traduson antigu in Krioulo

¹ Na nonu anu di renansa di Zedekias, na dia 10 di desimu mis, Nabukodonosor, rei di Babilonia, bin kontra Jerusalen ku tudu si tropas, i kampa fora di prasa; e lantanda rampas di kamba na roda.

² Prasa fika tajadu te na anu 11 di renansa di Zedekias.

³ Na dia 9 di kuartu mis, oca ku fomi toma konta di prasa, kumida ka tenba pa pobu,

⁴ prasa rombadu. Omis di gera kuri tudu, di noti, e pasa na porton na metadi di dus mura, lungu di jardin di rei. Tropas di Babilonia staba tudu na roda di prasa, ma e pasa na kamiñu di kobon di Jordon.

⁵ Tropas di Babilonia serka rei, e pañal na kau rasu lungu di Jerikó. Si tropas pajiga tudu.

⁶ E toma rei, e lebal pa rei di Babilonia na Ribla; si kasu julgadu.

⁷ E mata si fijus si dianti; dipus e rinka ujus di Zedekias, e maral ku korenti di bronzi, e lebal pa Babilonia.

Templu danadu

⁸ Na dia 7 di kintu mis di anu 19 di renansa di Nabukodonosor, rei di Babilonia, Nebuzaradan, kapiton di guarda, ku sedu tambi ŝef di rei di Babilonia, i bin pa Jerusalen,

⁹ i kema kasa di SIÑOR, kasa di rei, ku tudu kasas di Jerusalen. Kasas importanti kemadu tudu.

¹⁰ El ku tudu tropas di Babilonia e bati muras ku rodiaba Jerusalen.

¹¹ Nebuzaradan leba prezu ki jinti ku sobraba na prasa, ku kilis ku baiba pa ladu di rei di Babilonia pa rindi, ku tudu restu di jinti,

¹² ma i disa utrus di jinti mas koitadi pa e tarbaja na ortas di uva ku lugaris di labur.

¹³ Tropas di Babilonia kebra ki kulunas di kobri ku staba na kasa di SIÑOR, suma tambi ki stantis ku bañera di kobri; e leba se bronzi pa Babilonia.

¹⁴ E leba tambi kalerons, pás, apagaduris, tiẑelas ku tudu vasus di kobri ku ta usaduba na sirvis di templu.

¹⁵ Kapiton di guarda toma tambi ki braserus ku basias, tudu ku kumpudu di uru o di prata.

¹⁶ Kobri di ki dus kuluna ku bañera ku stantis ku Salomon kumpuba pa kasa di SIÑOR, i ciu ba dimas pa pesa.

¹⁷ Kada kuluna teneba 8,2 metru di altura. Kapitel di kobri riba di kada un teneba 1,4 metru di altura. Redi ku romans ku rodiaba kapitel e seduba tudu di kobri. Ki dus kuluna ku se redi e parsiba.

¹⁸ Kapiton di guarda toma prezu tambi Seraias, ŝef di saserdotis, ku Sofonias si sugundu, ku tris porteru.

¹⁹ Di prasa i leba un funsionariu ku nkargaduba di jinti di gera, ku sinku omi ku staba inda la ku ta daba rei konsiju, suma tambi ŝef ku ta mobilisa jinti pa tropa, i skirbi se nomis, ku mas sesenta omi importanti.

²⁰ Nebuzaradan, kapiton di guarda, i toma ki jinti, i leba elis pa rei di Babilonia na Ribla,

²¹ na tera di Amat. Rei manda pa e sutadu, e matadu la. Asin pobu di Judá lebadu prezu fora di se tera.

Jedalias, gubernadur di Judá

²² Nabukodonosor, rei di Babilonia, pui Jedalias, fiju di Aikan, fiju di Safan, pa i sedu gubernadur riba di ki jinti ku fikaba na tera di Judá.

²³ Oca ku kapitons di tropas ku se omis obi kuma rei di Babilonia pui Jedalias pa i sedu gubernadur, e bai nunde el na Mizpá; ki ŝefis seduba Ismael, fiju di Netanias, Joanan, fiju di Kareá, Seraias, fiju di Tanumet di Netofá, ku Jazanias di Maaka.

²⁴ Jedalias jurmenta, i fala elis ku se omis: “Ka bo ten medu di ŝefis di Babilonia. Bo fika na tera, bo sirbi rei di Babilonia; asin tudu na kuri bos diritu.”

²⁵ Na setimu mis Ismael, fiju di Netanias, fiju di Elisama, di familia di rei, i bin ku mas des omi, e ataka Jedalias, e matal, tudu ku judeus ku jinti di Babilonia ku staba ku el na Mizpá.

²⁶ Tudu pobu lanta, koitadis ku garandis, ku kapitons di tropa, e bai pa Ejitu, pabia e tenba medu di jinti di Babilonia.

Joakin largadu

²⁷ Oca ku Joakin, rei di Judá, na fasiba kuas trinta i seti anu prezu, Evil-Merodak kumsa rena na Babilonia. Na dia 27 di mis di 12, rei tira Joakin di kalabus,

²⁸ i papia diritu ku el, i dal lugar mas altu di ki utru reis ku staba ku el na Babilonia.

²⁹ Asin Joakin disa di bisti ropa di kalabus; pa restu di si vida i ta kumeba na mesa di rei.

³⁰ Kada dia i ta risibiba si sustentu na mon di rei pa tudu si vida.