2 Reis 24 - BIBLIA - traduson antigu in Krioulo

¹ Na tempu di Jeoiakin, Nabukodonosor, rei di Babilonia, bin kontra Judá; Jeoiakin fika bas del pa tris anu; dipus i lanta kontra el.

² SIÑOR manda kontra el tropas di Babilonia, di sirianus, moabitas ku fijus di Amon; i manda elis kontra Judá pa kaba ku el, konformi palabra ku SIÑOR falaba na boka di si servus anunsiaduris.

³ Na bardadi e kusas kontisi ku Judá konformi kil ku SIÑOR manda, pa i pudi tiral si dianti pabia di tudu pekadus ku Manasés fasiba,

⁴ tambi manera ki mata jinti ku ka mersiba muri, i inci Jerusalen ku se sangi. SIÑOR ka pudiba purda ki kusas.

⁵ Tudu utru kusas ku pasa na renansa di Jeoiakin, ku tudu ki fasi, e sta skritu na libru di Storia di Reis di Judá.

⁶ Jeoiakin bin diskansa; si fiju Joakin rena na si lugar.

⁷ Nunka mas rei di Ejitu ka sai na si tera, pabia rei di Babilonia toma tudu si tera, desdi riu di Ejitu te na riu Eufrates.

Joakin (Jekonias o Konias), rei di Judá

⁸ Joakin teneba disoitu anu di idadi oca ki kumsa rena; i rena tris mis na Jerusalen. Si mame seduba Neusta, fiju di Elnatan, di Jerusalen.

⁹ I fasi mal dianti di SIÑOR konformi tudu ku si pape fasiba.

¹⁰ Na ki tempu ŝefis di Nabukodonosor bin kontra Jerusalen, e tajal.

¹¹ Nabukodonosor propi, rei di Babilonia, i bin ciga, oca ku si ŝefis tajaba ja prasa.

¹² Joakin, rei di Judá, sai pa rei di Babilonia, el ku si mame, si ŝefis, si garandis ku si funsionarius. Na oitavu anu di si renansa, rei di Babilonia leba Joakin prezu.

¹³ I tira tambi tudu rikesas di kasa di Deus ku kasa di rei, i kebra tudu vasus di uru ku Salomon, rei di Israel, fasiba pa templu di SIÑOR. Tudu bin sedu suma ku SIÑOR falaba.

¹⁴ I leba tudu jinti di Jerusalen, ku tudu garandis, tudu omis di gera, tudu karpinterus ku fererus, ku sedu, na tudu, des mil prezu. Ningin ka fika, si i ka jinti mas koitadi di tera.

¹⁵ Asin rei prindi Joakin i lebal di Jerusalen pa Babilonia, tudu ku si mame, si minjeris, si funsionarius, ku otridadis di tera.

¹⁶ Tudu omis forti trenadu pa gera, seti mil delis, ku mil karpinteru ku fereru, rei prindi elis, i leba pa Babilonia.

¹⁷ Rei di Babilonia pui Matanias, tiu di Joakin, pa i sedu rei na si lugar; i muda si nomi pa Zedekias.

Zedekias, rei di Judá

¹⁸ Zedekias teneba vinti i un anu di idadi oca ki kumsa rena; i rena onzi anu na Jerusalen. Si mame seduba Amutal, fiju di Jeremias, di Libna.

¹⁹ I fasi mal dianti di SIÑOR konformi tudu ku Jeoiakin fasiba.

²⁰ SIÑOR tenba raiba ciu kontra Jerusalen ku Judá, tok i nega elis, i tira elis si dianti. Zedekias bin ravolta kontra rei di Babilonia.