2 Reis 22 - BIBLIA - traduson antigu in Krioulo

Josias, rei di Judá

¹ Josias teneba oitu anu di idadi oca ki kumsa rena; i rena trinta i un anu na Jerusalen. Si mame seduba Jedida, fiju di Adaias, di Bozkat.

² Josias fasi kusa retu dianti di SIÑOR, i yanda na tudu kamiñu di si pape Davi; i ka disvia nin pa direita nin pa skerda.

³ Na anu 18 di si renansa, rei manda sekretariu Safan, fiju di Azalias, fiju di Mesulan, pa kasa di SIÑOR, i falal:

⁴ “Bai pa Ilkias, ŝef di saserdotis, bu falal pa i toma diñeru ku lebadu pa kasa di SIÑOR, ku porterus risibi na mon di jinti.

⁵ Diñeru ta ntregadu na mon di omis nkargadu di obras na kasa di SIÑOR, pa e pudi paga kilis ku na tarbaja la pa e kumpu kaus ku dana,

⁶ ku sedu karpinterus, edifikaduris ku pedrerus. E ta kumpra tambi madera ku pedras labradu pa repara kasa.

⁷ I ka pirsis pa nkargadus da konta di diñeru ke na ntregadu, pabia e sedu jinti retu.”

Libru di lei ojadu

⁸ Ilkias, ŝef di saserdotis, fala sekretariu Safan: “N oja libru di lei na kasa di SIÑOR.” Asin Ilkias dal libru; i leil.

⁹ Sekretariu Safan riba pa rei pa kontal ke ku kontisi; i falal: “Bu servus junta diñeru ku staba na kasa di SIÑOR, e ntregal na mon di kilis ku nkargadu di obras la.”

¹⁰ Dipus Safan fala rei: “Saserdoti Ilkias dan un libru.” Safan leil dianti di rei.

¹¹ Oca ku rei obi palabras di libru di lei, i rumpi si ropa,

¹² i da ordi pa saserdoti Ilkias, ku Aikan, fiju di Safan, ku Akbor, fiju di Mikaias, ku sekretariu Safan, ku Asaias, judadur di rei, i fala elis:

¹³ “Bo bai konsulta SIÑOR pa mi ku tudu pobu di Judá, aserka di palabras de libru ku ojadu, pabia raiba di SIÑOR ku na yardi kontra nos i garandi, manera ku no papes ka seta obi palabras de libru, pa fasi konformi tudu ku sta skritu pa nos.”

¹⁴ Asin saserdoti Ilkias, ku Aikan, Akbor, Safan ku Asaias, e bai pa sugundu bairu di Jerusalen, pa kasa di anunsiadur Ulda, (si maridu Salun, fiju di Tikvá, fiju di Arás, i ta rakadaba ropa di templu) e papia ku el.

¹⁵ Ulda fala elis: “SIÑOR, Deus di Israel, i fala pa bo riba pa omi ku manda bos pa mi, bo falal:

¹⁶ ‘Asin ku SIÑOR fala: N na tisi mal riba de lugar ku si moraduris, konformi tudu palabras di libru ku rei di Judá lei.

¹⁷ Suma ke disan, e kema nsensu pa utru deusis, e lantanda ña raiba ku tudu idulus ke kumpu ku se mon, asin ña raiba na yardi kontra e lugar; i ka na paga.’

¹⁸ Bo na fala rei di Judá ku manda bos pa konsulta SIÑOR: ‘Asin ku SIÑOR, Deus di Israel, fala aserka di palabras ku bu obi:

¹⁹ Manera ku bu korson staba pruntu, bu baŝa dianti di SIÑOR oca ku bu obi ke ku N fala kontra e lugar ku si moraduris, kuma stragu ku maldison na pera elis, bu rumpi bu ropa, bu cora ña dianti, ami tambi N obiu.

²⁰ Asin N na disau pa bu muri ku pas, bu nteradu lungu di bu papes; bu ujus ka na oja tudu mal ku N na tisi riba de lugar. Asin ku SIÑOR fala.’ ” E riba pa rei ku ki rasposta.