2 Reis 17 - BIBLIA - traduson antigu in Krioulo

Oseias, ultimu rei di Israel

¹ Na anu 12 di renansa di Akaz, rei di Judá, Oseias, fiju di Elá, kumsa rena na Israel, ku si moransa na Samaria; i rena novi anu.

² I fasi mal dianti di SIÑOR, ma i ka suma utru reis di Israel ku rena antis del.

³ Salmaneser, rei di Asiria, bai pa geria ku el; Oseias fika bas del, i fika i na pagal mpustu.

⁴ Ma rei di Asiria diskubri kuma Oseias mistiba lanta kontra el, pabia i mandaba jinti pa So, rei di Ejitu; tambi i paraba paga ki mpustu ki kustumaba paga na mon di rei di Asiria kada anu. Asin, Salmaneser pañal, i fical na kalabus.

⁵ Dipus i yentra na tudu tera di Israel, i bai te na Samaria, i tajal tris anu.

⁶ Na nonu anu di renansa di Oseias, rei di Asiria toma Samaria, i leba pobu di Israel pa Asiria, i pui pa e mora na Ala, ku Gozan, lungu di riu Abor; i pui utrus na prasas di Media.

Kusas ku pui israelitas pa e tiradu na se tera

⁷ E kusa sedu pabia fijus di Israel peka kontra SIÑOR se Deus, kil ku tira elis na tera di Ejitu, bas di mon di Faraó, rei di Ejitu. E bai na adora utru deusis,

⁸ e yanda na kustumus di rasas ku SIÑOR tiraba fora di tera oca ku fijus di Israel na yentraba; e yanda tambi na kustumus ku reis di Israel kumsaba.

⁹ E fasi kusas sukundidu kontra SIÑOR se Deus, kusas ku ka seduba diritu. E ranja kaus altu na tudu se prasas, desdi tori di bisia te na prasa fortifikadu.

¹⁰ E lantanda statuas ku idulus di Aserá na tudu montis altu, suma bas di tudu arvuri garandi.

¹¹ E kema nsensu na tudu kau altu, suma ku ki rasas ta fasiba ku SIÑOR tira fora di ki tera pa disa Israel yentra la. E fasi kusas fiu dimas, ku lantanda raiba di SIÑOR.

¹² SIÑOR falaba pa ka e adora idulus, ma e bai na adora elis.

¹³ SIÑOR avisa Israel ku Judá na boka di tudu si anunsiaduris ku videntis, i fala: “Bo konverti di bo mau kamiñus, bo obdisi ña mandamentus ku ordis, konformi tudu lei ku N manda bo papes, ku N ntrega bos na mon di ña servus anunsiaduris.”

¹⁴ Ma e ka seta obi, e ntema suma ku se papes fasiba ku ka fiaba na SIÑOR se Deus.

¹⁵ E nega si ordis, ku kontratu ki fasi ku se papes, ku avisus ki da elis. E adora idulus ku ka bali, tok elis propi e ka bin bali. E sigi kustumus di utru nasons na se roda, kontudu SIÑOR falaba elis pa ka fasi kusas suma kila.

¹⁶ E disa tudu mandamentus di SIÑOR se Deus, e kumpu imaẑens di dus bakasiñu di metal, e fasi un idulu di Aserá, e mborka dianti di tudu strelas di seu, e adora Baal.

¹⁷ E sakrifika se fijus, macu ku femia, na fugu. E ta fiaba na botaduris di sorti ku pauterus. E ntrega se kurpu pa fasi mal dianti di SIÑOR, pa lantanda si raiba.

¹⁸ Asin SIÑOR paña raiba ciu kontra Israel, i tira elis na si pursensa. Jorson di Judá son ku fika,

¹⁹ ma elis tambi e ka obdisi mandamentus di SIÑOR se Deus; e yandaba na kustumus ku Israel kumsaba.

²⁰ Asin SIÑOR bin nega tudu fijus di Israel, i kastiga elis, i ntrega elis na mon di jinti ku roba elis tudu kusas ke teneba; dipus i tira elis na si pursensa.

²¹ Oca ki tira Israel na mon di rei di jorson di Davi, e pui Jeroboan, fiju di Nebat, pa i sedu rei. Jeroboan separa Israel ku Judá, pa e ka sigi SIÑOR; i pui elis pa e fasi un pekadu garandi.

²² Asin fijus di Israel fika e na yanda na tudu pekadus ku Jeroboan fasiba; nunka e ka larga elis,

²³ tok SIÑOR tira elis na si pursensa, suma ki avisa elis ba na boka di si servus anunsiaduris. Israelitas tiradu na se tera, e lebadu pa Asiria; e sta la te aos.

Samaritanus

²⁴ Rei di Asiria tisi jinti di Babel, Kuta, Ava, Amat ku Sefarvain, i pui elis pa e mora na prasas di Samaria na lugar di fijus di Israel. Asin e toma Samaria suma se tera, e mora la na prasas.

²⁵ Oca ke kumsa mora la, e ka adora SIÑOR. SIÑOR manda lions na se metadi ku mata utru delis.

²⁶ Jinti fala rei di Asiria: “Ki jinti ku bu leba, bu pui pa e mora na prasas di Samaria, e ka kunsi kustumus di Deus di ki tera. Asin i manda lions na se metadi ku na mata elis, pabia e ka sibi manera di adora Deus di ki tera.”

²⁷ Rei di Asiria manda fala: “Bo leba un di saserdotis ku bo tira di la pa i pudi bai fika la; i ta nsina elis kustumus di Deus di ki tera.”

²⁸ Asin, un di saserdotis ku tiraduba na Samaria i riba i bai mora na Betel, i nsina jinti manera ke dibi di adora SIÑOR.

²⁹ Ma kada grupu nasional fasi se propi deusis, e pui elis na balobas ku jinti di Samaria kumpuba na kaus altu. Kada grupu fasi si deusis na prasas nunde ke moraba.

³⁰ Jinti di Babel kumpu idulus di Sukot-Benot; jinti di Kuta kumpu Nergal; kilis di Amat kumpu Asima;

³¹ aveus kumpu Nibaz ku Tartak; sefarvitas ta kemaba se fijus na fugu pa se deusis Adramelek ku Anamelek.

³² Asin e ta fasiba kultus pa SIÑOR, ma tambi e kuji kualker algin pa i sedu saserdoti pa sirbi na balobas di kaus altu.

³³ E ta adoraba SIÑOR, e ta adoraba se propi deusis tambi, konformi kustumus di rasas ke tiraduba na se metadi.

³⁴ Te aos e ta fasi konformi se kustumus antigu. E ka ta rispita SIÑOR, manera ke ka ta fasi konformi kustumus, ordis, leis ku mandamentus ku SIÑOR da fijus di Jakó, ku dadu nomi di Israel.

³⁵ Oca ku SIÑOR fasiba kontratu ku pobu di Israel, i da elis ordi, i fala: “Ka bo adora utru deusis, nin ka bo mpina se dianti; ka bo sirbi elis nin ka bo sakrifika pa elis,

³⁶ ma bo na adoran, ami, SIÑOR, kil ku distindi mon N tira bos na tera di Ejitu ku garandi forsa; ami ku bo na mpina si dianti, bo na sakrifika pa mi.

³⁷ Bo na pui sintidu pa obdisi sempri ki kustumus, ordis, lei ku mandamentus ku N skirbi pa bos. Ka bo adora utru deusis,

³⁸ nin ka bo diskisi di kontratu ku N fasi ku bos. Ka bo adora utru deusis,

³⁹ ma bo adoran, ami, SIÑOR bo Deus. Asin, N ta kaplinti bos na mon di tudu bo inimigus.”

⁴⁰ Ma e ka seta obi; e fasi konformi se kustumus antigu.

⁴¹ Asin ki jinti ta adoraba SIÑOR, ma e ta adoraba se idulus tambi; se fijus ku netus kontinua fasi mesmu kusas te aos.