2 Reis 15 - BIBLIA - traduson antigu in Krioulo

Azarias, rei di Judá, ku comadu tambi Uzias

¹ Na anu 27 di renansa di Jeroboan, rei di Israel, Azarias, fiju di Amazias, rei di Judá, kumsa rena

² ku disaseis anu di idadi, i rena na Jerusalen sinkuenta i dus anu. Si mame seduba Jekolia, di Jerusalen.

³ I yanda retu dianti di SIÑOR konformi tudu ku si pape Amazias fasiba,

⁴ ma kaus altu ka tiradu; pobu fika e na sakrifika, e na kema nsensu la.

⁵ SIÑOR kastiga rei ku mpincu ku fika nel tok i muri. I bai mora na un kasa separadu. Si fiju Jotan toma konta di kasa di rei, i guberna pobu di Judá.

⁶ Tudu utru kusas ku pasa na renansa di Azarias, ku tudu ki fasi, e sta skritu na libru di Storia di Reis di Judá.

⁷ Azarias diskansa, i nteradu lungu di si papes na prasa di Davi. Si fiju Jotan toma si lugar suma rei.

Zakarias, rei di Israel

⁸ Na anu 38 di renansa di Azarias, rei di Judá, Zakarias, fiju di Jeroboan, rena riba di Israel, na Samaria, pa seis mis.

⁹ I fasi mal dianti di SIÑOR suma ku si papes fasiba. Nunka i ka para fasi ki pekadus ku Jeroboan, fiju di Nebat, pui israelitas pa e fasi.

¹⁰ Salun, fiju di Jabes, lanta kontra el, i atakal dianti di pobu, i matal, i rena na si lugar.

¹¹ Tudu utru kusas ku pasa na renansa di Zakarias e sta skritu na libru di Storia di Reis di Israel.

¹² Asin palabra di SIÑOR pa Jeu bin sedu, suma ki falalba: “Bu fijus na sinta na tronu di Israel te na kuartu jorson.”

Salun, rei di Israel

¹³ Salun, fiju di Jabes, kumsa rena na anu 39 di renansa di Uzias, rei di Judá. I rena un mis ntidu na Samaria.

¹⁴ Menaen, fiju di Gad, bai di Tirza pa Samaria, i ataka Salun, fiju di Jabes, i matal, i rena na si lugar.

¹⁵ Tudu utru kusas ku pasa na renansa di Salun, ku manera ki lanta kontra rei, e sta skritu na libru di Storia di Reis di Israel.

¹⁶ Oca ku Menaen sai di Tirza, i ciga na Tifsa, e nega yabril porton. Asin, i ataka prasa, i kaba ku el, ku tudu jinti ku staba la, ku kilis ku staba na roda del. I yabri bariga di tudu preñadas.

Menaen, rei di Israel

¹⁷ Na anu 39 di renansa di Azarias, rei di Judá, Menaen, fiju di Gad, kumsa rena riba di Israel; i rena des anu na Samaria.

¹⁸ I fasi mal dianti di SIÑOR. Na tudu si tempu di renansa i ka para fasi ki pekadus ku Jeroboan, fiju di Nebat, pui pobu di Israel pa e fasi.

¹⁹ Pul, rei di Asiria, bin geria kontra Israel. Menaen dal 34 tonolada di prata pa i pudi judal, pa renu pudi sedu mas firmi na si mon.

²⁰ Menaen kobra Israel ki diñeru; tudu riku tenba ku da sinkuenta mueda di prata. Ki diñeru dadu pa rei di Asiria. Kila riba pa si tera, i ka fika na Israel.

²¹ Tudu utru kusas ku pasa na renansa di Menaen, ku tudu ki fasi, e sta skritu na libru di Storia di Reis di Israel.

²² Menaen bin diskansa; si fiju Pekaias rena na si lugar.

Pekaias, rei di Israel

²³ Na anu 50 di renansa di Azarias, rei di Judá, Pekaias, fiju di Menaen, kumsa rena na Israel; i rena dus anu na Samaria.

²⁴ I fasi mal dianti di SIÑOR; nunka i ka para fasi ki pekadus ku Jeroboan, fiju di Nebat, pui pobu di Israel pa e fasi.

²⁵ Si kapiton, Peka, fiju di Remalias, lanta kontra el. I leba sinkuenta omi di Jilead, i bai ataka rei na Samaria, na kuartu forti dentru di kasa di rei, i matal, juntu ku Argob ku Arié; i rena na si lugar.

²⁶ Tudu utru kusas ku pasa na renansa di Pekaias, ku tudu ki fasi, e sta skritu na libru di Storia di Reis di Israel.

Peka, rei di Israel

²⁷ Na anu 52 di renansa di Azarias, rei di Judá, Peka, fiju di Remalias, kumsa rena riba di Israel; i rena vinti anu na Samaria.

²⁸ I fasi mal dianti di SIÑOR; nunka i ka para fasi ki pekadus ku Jeroboan, fiju di Nebat, pui pobu di Israel pa e fasi.

²⁹ Na tempu di Peka, rei di Israel, Tiglat-Pileser, rei di Asiria, bin, i toma Ijon, Abel-Bet-Maaka, Janoa, Kedes, Azor, Jilead, Galileia ku tudu tera di Naftali; i leba jinti di ki lugaris pa Asiria.

³⁰ Oseias, fiju di Elá, lanta kontra Peka, fiju di Remalias, i atakal, i matal, i rena na si lugar, na anu 20 di renansa di Jotan, fiju di Uzias.

³¹ Tudu utru kusas ku pasa na renansa di Peka, ku tudu ki fasi, e sta skritu na libru di Storia di Reis di Israel.

Jotan, rei di Judá

³² Na sugundu anu di renansa di Peka, rei di Israel, fiju di Remalias, Jotan, fiju di Uzias, rei di Judá, kumsa rena,

³³ ku vinti i sinku anu di idadi; i rena disaseis anu na Jerusalen. Si mame seduba Jerusa, fiju di Zadok.

³⁴ I yanda retu dianti di SIÑOR, suma ku si pape Uzias fasiba,

³⁵ ma kaus altu ka tiradu; jinti fika e na sakrifika, e na kema nsensu la. Jotan kumpu porton altu di kasa di SIÑOR.

³⁶ Tudu utru kusas ku pasa na renansa di Jotan, ku tudu ki fasi, e sta skritu na libru di Storia di Reis di Judá.

³⁷ Na ki dias SIÑOR kumsa na manda jinti kontra Judá, ku sedu Rezin, rei di Siria, ku Peka, fiju di Remalias.

³⁸ Jotan bin diskansa, i nteradu lungu di si papes na prasa di si pape Davi. Si fiju Akaz rena na si lugar.