2 Reis 13 - BIBLIA - traduson antigu in Krioulo

Jeoakaz, rei di Israel

¹ Na anu 23 di renansa di Joás, fiju di Akazias, rei di Judá, Jeoakaz, fiju di Jeu, kumsa rena riba di Israel, na Samaria; i rena disaseti anu.

² I fasi mal dianti di SIÑOR, pabia i yanda na pekadus ku Jeroboan, fiju di Nebat, pui Israel pa i fasi; i ka larga elis.

³ Asin raiba di SIÑOR yardi kontra Israel; i ntrega elis na mon di Azael, rei di Siria, ku di si fiju Ben-Adad, pa manga di tempu.

⁴ Jeoakaz bai dianti di SIÑOR, i rogal. SIÑOR obi si orason, pabia i oja manera ku rei di Siria na kalka Israel dimas.

⁵ SIÑOR da Israel un libertadur; e kapli na mon di sirianus. Asin, fijus di Israel bin mora na se kasas, suma purmeru,

⁶ ma e ka larga pekadus ku rei Jeroboan pui Israel fasi; e kontinua yanda nelis. Ki idulu di Aserá fika inda firmadu na Samaria.

⁷ Rei di Siria ka disa Jeoakaz ku tropas, si i ka son sinkuenta kabaleru, des karu ku des mil omi di pe; i kaba ku restu, i masa elis suma reia.

⁸ Tudu utru kusas ku pasa na renansa di Jeoakaz, ku tudu ki fasi, ku si puder, e sta skritu na libru di Storia di Reis di Israel.

⁹ Jeoakaz bin diskansa; e nteral na Samaria. Si fiju Jeoás rena na si lugar.

Jeoás, rei di Israel

¹⁰ Na anu 37 di renansa di Joás, rei di Judá, Jeoás, fiju di Jeoakaz, kumsa rena riba di Israel na Samaria, i rena disaseis anu.

¹¹ I fasi mal dianti di SIÑOR, i ka larga ki pekadus ku Jeroboan, fiju di Nebat, pui pobu di Israel pa e fasi; i kontinua yanda nelis.

¹² Tudu utru kusas ku pasa na renansa di Jeoás, ku tudu ki fasi, ku si puder, manera ki geria kontra Amazias, rei di Judá, e sta skritu na libru di Storia di Reis di Israel.

¹³ Jeoás bin diskansa, i nteradu na Samaria, lungu di reis di Israel. Jeroboan toma si lugar na tronu.

Eliseu duensi, Jeoás bai visital

¹⁴ Eliseu duensiba un duensa ku bin matal. Jeoás, rei di Israel, i bai pa el, i cora riba del, i fala: “Ña pape! Ña pape! Karus di Israel ku se kabalerus!”

¹⁵ Eliseu falal: “Toma mansasa ku si fleŝas.” I tomal.

¹⁶ Eliseu falal: “Pega na mansasa.” I pega nel. Eliseu pui si mon riba di mon di rei.

¹⁷ I falal: “Yabri janela pa ladu di saida di sol.” I yabril. Eliseu falal: “Ferca!” I ferca. Eliseu fala: “Fleŝa di vitoria di SIÑOR i fleŝa di vitoria riba di sirianus! Bu na mata elis na Afeka tok bu kaba ku elis.”

¹⁸ I fala mas: “Toma fleŝas.” I toma elis. I falal: “Bati elis na con.” I batil tris bias, i para.

¹⁹ Omi di Deus paña raiba ku el, i falal: “Bu dibi di batiba na con sinku o seis bias; asin bu na ngañaba sirianus tok bu kaba ku elis, ma gosi bu na ngaña elis son tris bias.”

Mortu di Eliseu

²⁰ Eliseu muri; e nteral. Grupus di tropas moabita ta atakaba tera di Israel na entrada di kada anu.

²¹ Un dia, oca ku utru jinti di Israel na nteraba un omi, e oja un grupu di moabitas na bin. E bota ki kurpu na koba di Eliseu. Manera ku kurpu kai, i toka na os di Eliseu; vida riba na omi; i lanta, i firma.

Gera entri Israel ku Siria

²² Azael, rei di Siria, i fika i na kastiga Israel na tudu renansa di Jeoakaz,

²³ ma SIÑOR tenba miserikordia delis, i sinti pena delis, i mostra elis fabur, pabia di amor ki ten pa si kontratu ku Abraon, Isak ku Jakó. I ka mistiba kaba ku elis; te aos i ka tira elis si dianti.

²⁴ Azael, rei di Siria, muri. Si fiju Ben-Adad rena na si lugar.

²⁵ Jeoás, fiju di Jeoakaz, i bai geria, i toma mas ki prasas na mon di Ben-Adad, ku kila tomaba na mon di Jeoakaz. Jeoás ngañal tris bias, i toma mas ki prasas di Israel.