2 Pedru 3 - BIBLIA - traduson antigu in Krioulo

Siñor na bin

¹ Ña kiridu ermons, es ja i sugundu karta ku N skirbi bos. Na tudu dus N na lembranta bos e kusas, pa disperta bos pa bon pensamentu.

² N misti pa bo lembra di palabras ku anunsiaduris di Deus fala disna, ku mandamentus ku bo apostolus risibi di Siñor i Salbadur, e da bos.

³ Purmeru, bo dibi di sibi kuma, na dias di kabantada, i na parsi diskarnosis ku na yanda konformi se vontadi mau,

⁴ e na ba ta punta: “I ka fala kuma i na bin? Nunde ki sta? Desdi ku no papes muri, tudu kusas sta inda suma na tempu ku mundu kumpudu.”

⁵ E ka misti lembra kuma seu ku tera tenba na antigamenti. Deus papia son; tera sai na metadi di yagu; yagu rodial.

⁶ Ki mundu di antigu kabadu ku el ku yagu; yagu di diluviu kubril,

⁷ ma seu ku tera di aos, ki mesmu palabra di Deus na guardal pa fugu; i na guardadu suguru pa dia di juisu, ora ku jinti ku nega Deus na kabadu ku el.

⁸ Ña kiridu ermons, es i un kusa ku bo ka dibi di diskisi, kuma un dia pa Siñor i suma mil anu; mil anu i suma un dia.

⁹ Siñor ka ta tarda ku kusa ki purmiti, suma utrus ta oja kuma i ta tarda, ma i pasenseru nan ku bos; i ka misti pa ningin pirdi, ma pa tudu pudi ripindi.

¹⁰ Dia di Siñor na bin suma ladron. Na ki dia seu na disparsi ku garandi baruju. Strelas na yardi, e na pajiga. Tera ku tudu kusa ku sta nel i na kemadu.

¹¹ Suma ku tudu e kusas ten ku pajigadu, kal koldadi jinti ku bo dibi di sedu? Bo dibi di tene vida limpu, son pa Deus,

¹² ora ku bo na pera Dia di Deus. Bo ba ta fasi forsa pa ki dia ciga dipresa, ku seus na kema, e na pajiga; strelas na yardi, e na ribi.

¹³ Ma anos, suma ki fala na si purmesa, no na pera nobu seu ku nobu tera, nunde ki son ben ku na fasidu.

¹⁴ Asin, ña kiridu ermons, suma ku bo na pera e kusa, bo fasi mpeñu pa bo ojadu sin manca, sin kulpa, ku pas si dianti.

¹⁵ Bo lembra kuma pasensa di no Siñor i pa no salbason, suma tambi ku no kiridu ermon Paulu skirbi bos ku ki jiresa ki dadu.

¹⁶ I asin ki fala na tudu si kartas oca ki na fala de asuntu. Utru kusa ki skirbi i ta kansadu pa ntindi; kilis ku ka sibi, o ku ka sedu firmi, e ta tursil, suma e ta fasi tambi ku utru Skrituras, pa se propi danu.

¹⁷ Asin, ña kiridu ermons, suma ku bo jumna bo sibi es, bo toma sintidu pa ka bo kai na bo firmesa, lebadu pa nganu di omis malandru.

¹⁸ Mas minjor bo bai dianti na fabur ku kuñisimentu di no Siñor i Salbadur Jesus Kristu. El pa i dadu gloria, disna di gosi, suma pa tudu sempri. Amen.