2 Pedru 2 - BIBLIA - traduson antigu in Krioulo

Pursoris falsu

¹ Suma i tenba anunsiaduris falsu antigamenti na metadi di jinti, asin tambi i na ten pursoris falsu na bo metadi. E na miti nsinamentu ki ka bardadi, ku ta dana; e ta nega Mestre ku liberta elis; e ta tisi danu di repenti riba di se kabesa.

² Manga di jinti ta sigi se mau vida. Pabia delis, jinti ta fala mal di kamiñu di bardadi.

³ Ku vontadi di ngaña diñeru e ta splora bos ku palabra di mintida. Se julgamentu ku markadu disna i ka na tarda. Se pirdison na pera elis ku uju abertu.

⁴ Deus ka purda anjus ku peka, ma i bota elis na nfernu, i mara elis ku korenti na kau sukuru, guardadu pa dia di juisu.

⁵ I ka purda mundu antigu, kontudu i guarda Noe (ku konta jinti kuma e dibi di yanda diritu) ku mas seti jinti; i manda diluviu riba di kilis ku negal.

⁶ I kondena prasas di Sodoma ku Gomora pa stragu kompletu; i bidanta elis sinsa; i fasi elis isemplu pa kilis ku ka ta mporta ku Deus.

⁷ I libra Lo, omi bon, ku staba abursidu pa mau vida di ki jinti ku ta yanda sin lei.

⁸ Ki omi bon moraba na se metadi, i na oja, i na obi tudu dia ki kusas mau ke na fasi; si bon korson ta fika fadigadu.

⁹ Asin Siñor i sibi libra di tentason kilis ku rispital; i ta guarda ki maus te dia di juisu pa e kastigadu.

¹⁰ Riba di tudu, i na kastiga kilis ku na yanda na susidadi di vontadi di se kurpu, e na njuti otridadi, e sedu kunfiadu, e ta yalsa ombra, e ka medi fala mal di kriaturas ku sta na seu.

¹¹ Anjus propi ku ten mas forsa ku puder e ka ta akusa elis ku nsultus dianti di Siñor,

¹² ma e omis ta yanda suma ke misti, suma limarias ku ka ta pensa, ku padidu pa kria pa mata. E ta fala mal di kusas ke ka ntindi. E na kabadu ku el suma limarias.

¹³ E na pagadu ku sufrimentu pa sufrimentu ke fasi utru. Ki koldadi jinti gosta di fasi kusas di borgoña na lus di dia. Ora ke sinta ku bos na bo festa, e ta sedu un manca susu; e ta kontenti na se finjimentu.

¹⁴ E pui se uju son na minjeris di mau vida, ujus ku ka ta para peka. E ta ngoda jinti ku ka sta firmi; e ta faima pa tene; maldison sta riba delis.

¹⁵ E disa kamiñu diritu, e yara, e bai pa kamiñu di Balaon, fiju di Beor, ku staba pruntu pa risibi pagamentu pa fasi mal,

¹⁶ ma ku raprindidu pa si pekadu. Buru mudu papia ku fála di omi, i tuji anunsiadur fasi tulesa.

¹⁷ E jinti i suma fonti sin yagu, nuven ku turbada ta leba; sukuru meduñu na pera elis.

¹⁸ E ta fala palabras di njatamentu ku ka ten balur. Na se diseẑu mau di kurpu ku se vida susu e ta ngoda kilis ku kumsa na kapli nan di jinti ku na yanda mal.

¹⁹ E fala e na da elis liberdadi, ma elis propi e sedu katibu di visius ku na dana elis, pabia un algin i katibu di kil ku na manda nel.

²⁰ Si jinti, dipus de kapli di podrisa di mundu pabia di kuñisimentu di Siñor i Salbadur Jesus Kristu, e torna fika rodiadu, tok ki kusas bin vensi elis mas, se stadu di kabantada ta sedu pior di ki di purmeru.

²¹ I minjor pa e ka kunsi kamiñu diritu, te pa e kunsil, e bin disvia di santu mandamentu ke dadu.

²² Kil ku kontisi ku elis i ta mostra kuma ditu i bardadi ku fala: “Kacur ta riba pa si ramasadura;” kuma tambi: “Purku labadu i ta riba pa rola na lama.”