2 Kronikas 9 - BIBLIA - traduson antigu in Krioulo

Visita di raiña di Sebá

¹ Oca ku raiña di Sebá obi di fama di Salomon, i bin pa Jerusalen pa probal ku purguntas kansadu. I ciga ku manga di jinti ku na sirbil, ku kamelus ku karga purfumus ku manga di uru ku pedras di balur. I ciga nunde Salomon, i papia di tudu kusa ki teneba na si sintidu.

² Salomon ruspundil tudu si purguntas; i ka sobra nada ki ka pudiba splikal.

³ Raiña di Sebá oja tudu jiresa di Salomon, ku kasa ki kumpuba.

⁴ I oja tambi kumida di si mesa, ku bon kau ku si ŝefis ta sinta nel, ku manera ku si kriadus ta sirbiba, ben fardadu, ku kilis ku ta sirbi mesa, ku ofertas kemadu ki ta da na kasa di SIÑOR. I fika dimiradu,

⁵ i fala rei: “Palabra ku N obi na ña tera aserka di bu jiresa, ku kusas ku bu ta fasi, i bardadi,

⁶ ma N ka fiaba na se palabras tementi N ka bin, N ojal ku ña uju. Gosi N oja kuma e ka kontan nin metadi di garandesa di bu jiresa; abo bu mas kil ku N obi.

⁷ Sortiadu i bu omis! Sortiadu i bu ŝefis ku sta sempri bu dianti, e na obi bu palabras di jiresa.

⁸ SIÑOR bu Deus dibi di ngabadu, ku fikaba kontenti ku bo, i pou pa bu sedu rei riba di si tronu, pa guberna pa SIÑOR bu Deus. Bu Deus ama Israel, i misti firmantal pa sempri; e ku manda i pou suma rei riba delis, pa bu pudi manti ordi ku justisa.”

⁹ I da rei kuatru tonolada di uru, ku manga di purfumu, ku pedras di balur. Nunka i ka tenba purfumus suma kilis ku raiña di Sebá da rei Salomon.

¹⁰ (Omis di rei Iron ku di Salomon, ku tisiba uru di Ofir, e tisi tambi madera di algumin ku pedras di balur.

¹¹ Rei usa ki madera di algumin pa kumpu skadas pa kasa di SIÑOR, tudu ku kasa di renansa. I kumpu tambi arpas ku violas pa kantaduris. Kusas suma kilas nunka ka ojaduba na tera di Judá.)

¹² Rei Salomon da raiña di Sebá tudu kusas ki pidil konformi si diseẑu; i dal mas di ki kil ku raiña tisilba. Dipus raiña riba pa si tera ku si jinti ku kumpañalba.

Rikesa di rei Salomon

¹³ Uru ku ta binba pa Salomon kada anu i ta pesaba vinti i tris tonolada,

¹⁴ fora di mpustu ku nogosiantis ta paga, ku kilis ku ta fasi nogos na utru teras. Reis di Arabia ku gubernaduris di reẑions di Israel e ta tisilba uru ku prata.

¹⁵ Salomon kumpu duzentus tajadera garandi di uru batidu; i manda pesa seti kilu di uru pa kada un.

¹⁶ I kumpu tambi trizentus tajadera mas justadu, di uru batidu, ku tris kilu di uru na kada un. Salomon pui elis na Kasa di Floresta di Líbanu.

¹⁷ Rei kumpu tambi un tronu garandi di marfin, i kubril ku uru puru.

¹⁸ Ki tronu teneba seis skada, ku kau kumpudu di uru pa diskansa pe, tudu pegadu ku tronu. Nkostu pa diskansa mon staba na kada ladu di asentu, ku un lion lungu di kada nkostu.

¹⁹ Dozi lion staba riba di ki seis skada, un na kada ladu di kada skada. Nunka i ka kumpuduba kusa suma kila na kualker utru renu.

²⁰ Tudu kopus di rei Salomon e seduba di uru; tudu losa di Kasa di Floresta di Líbanu i seduba tambi di uru puru. Na tempu di Salomon prata ka dadu balur.

²¹ Rei teneba utru barkus ku ta baiba bias ku mariñerus di rei Iron. Kada tris anu e ta riba di Tarsis, e ta tisi uru, prata, marfin, buẑius ku pavons.

²² Rei Salomon teneba mas rikesa ku mas jiresa di ki tudu reis di mundu.

²³ Elis tudu e mistiba bin jubi Salomon, pa obi jiresa ku Deus dal.

²⁴ Kada kin ku bin i ta tisilba pursenti — kusas di uru ku di prata, kusas di bisti, material di gera, purfumus, kabalus ku burus. Asin ki ta fasiduba kada anu.

²⁵ Salomon teneba kuatru mil kuartu pa kabalus ku karus, ku dozi mil kabalu di karu. I pui elis na prasas di karu, ma utrus fika ku rei na Jerusalen.

²⁶ I dominaba riba di tudu reis, desdi riu Eufrates te na tera di filisteus, te na frontera di Ejitu.

²⁷ Rei fasi Jerusalen pa i tene prata suma pedra, ku sedrus ciu suma figera brabu ku sta na matu.

²⁸ E ta tisiba kabalus pa Salomon di Ejitu ku tudu ki utru teras.

Mortu di Salomon

²⁹ Utru kusas ku pasa na renu di Salomon, disna di kumsada te na kabantada, e sta skritu na libru di Storia di Anunsiadur Natan ku na Anunsius di Aías di Siló. I sta tambi na Visons di Anunsiadur Idu ku ta trata di Jeroboan, fiju di Nebat.

³⁰ Salomon rena na Jerusalen riba di tudu Israel pa korenta anu.

³¹ I diskansa ku si papes, i nteradu na prasa di si pape Davi. Si fiju Reoboan rena na si lugar.