2 Kronikas 8 - BIBLIA - traduson antigu in Krioulo

Utru tarbajus di Salomon

¹ Salomon leba vinti anu pa kumpu kasa di SIÑOR ku kasa di si renansa.

² Dipus, i torna kumpu utru prasas ku rei Iron dalba; i pui jinti di Israel pa e bai mora la.

³ Mas tardi, Salomon bai pa prasa di Amat-Zobá, i tomal.

⁴ I kumpu prasa di Tadmor, na lala, ku tudu prasas di armazens na reẑion di Amat,

⁵ suma tambi Bet-Oron di altu ku Bet-Oron di bas, prasas forti ku muras, portas ku trinkus.

⁶ Salomon kumpu Baalat ku tudu prasas di armazens nunde ki ta guardaba kusas, ku tudu prasas di karu ku di kabalus. I kumpu tudu ki mistiba kumpu, na Jerusalen, na Líbanu, ku tudu tera ki na mandaba riba del.

⁷ Tudu jinti ku sobraba di eteus, amoreus, perizeus, eveus ku jebuseus, ku ka seduba fijus di Israel,

⁸ se fijus ku sobraba, ku pobu di Israel ka kaba mata, Salomon pui elis na tarbaju obrigatoriu; e fika asin te aos.

⁹ Ma Salomon ka pui kualker israelita pa i fasi tarbaju obrigatoriu. Elis e seduba omis di gera, ŝefis di kapitons, ŝefis di si karus ku kabalerus.

¹⁰ I tenba duzentus i sinkuenta ŝef riba di jinti ku ta tarbajaba na obras.

¹¹ Salomon leba si minjer, fiju di Faraó, di prasa di Davi te na kasa ki kumpuba pa el. I fala: “Ña minjer ka na mora na kasa di Davi, rei di Israel, pabia kualker kau ku arka di SIÑOR yentra nel i kau sagradu.”

¹² Salomon pursenta ofertas kemadu pa SIÑOR riba di altar ki kumpuba dianti di baranda di entrada di templu.

¹³ I da ki ofertas di kada dia konformi ordis di Moisés, tambi na dias di diskansu, lua nobu, ku ki tris festival kada anu ku sedu di pon sin fermentu, di semanas ku di barakas.

¹⁴ Konformi ordi di Davi, si pape, i organisa grupus di saserdotis pa se sirvis, suma tambi skalas pa tarbaju di kada dia di levitas ku ta ngaba Deus, e juda saserdotis na se tarbaju. I fasi skala pa grupus di porterus tambi, pa sirvis na kada porton, pabia asin ku Davi, omi di Deus, daba ordi.

¹⁵ Saserdotis ku levitas e ka disvia di ordi ku rei da elis aserka di armazens, nin na kualker utru kusa.

¹⁶ Tudu tarbaju di Salomon i fasidu diritu, disna di dia ke kumsa pui alisersu di kasa di SIÑOR tok i bin kaba. Asin, kasa di SIÑOR kompletadu.

¹⁷ Mas tardi Salomon bai pa Ezion-Jeber ku Elot, na praia di mar na tera di Edon.

¹⁸ Rei Iron mandal barkus bas di si kapitons, ku mariñerus ku kunsiba mar diritu. E bai ku omis di Salomon pa Ofir, e toma di la disaseis tonolada di uru, e lebal pa rei Salomon.