2 Kronikas 4 - BIBLIA - traduson antigu in Krioulo

Altar ku bañera di kobri

¹ Rei Salomon kumpu un altar di kobri di 9 metru di kumprimentu ku di largura, ku 4,5 metru di altura.

² I kumpu tambi bañera di kobri formadu, rodondu, di 2,3 metru di altura ku diametru di 4,5 metru. Pa rodial, i pirsis ba un korda di 13,5 metru.

³ Bas di borda i tenba dus filera di fajamentu, suma turus, ku da volta di bañera tudu, vinti turu na kada metru. Na fundison, ki turus e formadu tudu juntu ku bañera.

⁴ Bañera firmantadu riba di dozi turu, tris ku na viraba rostu pa norti, tris pa ladu di kaida di sol, tris pa sul ku tris pa lesti. Tudu se rabus staba pa ladu di dentru; bañera sintaba riba delis.

⁵ Grosura di bañera i 8 sentimetru; si borda parsiba suma borda di un kopu o suma flor di liriu. I ta lebaba serka di sesenta mil litru.

⁶ I kumpu tambi des basia, i pui sinku na ladu direita ku sinku na skerda. Tudu ku usadu pa oferta kemadu i ta labaduba nelis, ma bañera seduba pa saserdotis laba nel.

⁷ I kumpu tambi des kanderu di uru, konformi modelu, i pui elis na templu, sinku na ladu direita, sinku na skerda.

⁸ I kumpu des mesa, i pui elis na templu, sinku na ladu direita, sinku na skerda. I kumpu tambi sen basia di uru.

⁹ I kumpu kintal pa saserdotis ku utru kintal garandi, ku portas na metadi delis ku kubridu ku kobri.

¹⁰ I pui bañera na ladu sudesti di templu.

¹¹ Uran kumpu tambi kalerons, pás ku basias. Asin i kabanta tarbaju ki fasi pa rei Salomon na kasa di Deus:

¹² dus kuluna; dus kapitel ku staba riba di kada kuluna; dus redi pa faja ki kapitel ku staba riba di kada kuluna;

¹³ kuatrusentus roman na dus filera pa kada un di ki dus redi ku faja kapitel ku staba riba di kada kuluna;

¹⁴ des stanti ku se des basia riba delis;

¹⁵ un bañera ku dozi turu bas del;

¹⁶ kalerons ku pás ku garfus. Tudu ki kusas ku Uran-Abiu kumpu pa rei Salomon, pa kasa di SIÑOR, e seduba di kobri pulidu.

¹⁷ Rei manda forma elis na un kau ku teneba manga di lama, entri Sukot ku Zeredá, pertu di riu Jordon.

¹⁸ Tudu ki kusas ku Salomon manda kumpu e ciu dimas; asin pesu di kobri nunka i ka sibidu.

¹⁹ Salomon kumpu tambi tudu mobilia pa kasa di Deus, suma altar di uru, mesas pa pui pon sagradu riba delis,

²⁰ kanderus ku se lampadas di uru finu, pa sindi konformi kustumu, dianti di kau mas sagradu di tudu;

²¹ floris, ku kanderus, ku tenaz, tudu di uru puru,

²² suma tambi tisora pa kumpu paviu, basias, kujeris, tiẑelas pa nsensu, tudu di uru finu. Portas di entrada di templu ku portas di kau mas sagradu e seduba di uru.