2 Kronikas 36 - BIBLIA - traduson antigu in Krioulo

Rei Jeoakaz di Judá

¹ Pobu di Judá toma Jeoakaz, fiju di Josias, e fasil rei na Jerusalen, na konta di si pape.

² Jeoakaz teneba idadi di vinti i tris anu oca ki yentra na renansa, i rena tris mis na Jerusalen.

³ Rei di Ejitu tiral na renansa na Jerusalen, i pui Judá paga mpustu di 3,4 tonolada di prata ku 34 kilu di uru.

⁴ Neku, rei di Ejitu, pui Eliakin, ermon di Jeoakaz, pa i rena riba di Judá ku Jerusalen, i muda si nomi pa Jeoiakin. I toma si ermon Jeoakaz, i leba pa Ejitu.

Jeoiakin, rei di Judá

⁵ Jeoiakin teneba idadi di vinti i sinku anu oca ki yentra na renansa, i rena onzi anu na Jerusalen. I fasi mal dianti di SIÑOR si Deus.

⁶ Nabukodonosor, rei di Babilonia, i bin atakal, i maral ku korentis pa lebal pa Babilonia.

⁷ Nabukodonosor toma tambi utru kusas di kasa di SIÑOR, i leba elis, i bai pui na si kasa na Babilonia.

⁸ Restu di kusas ku Jeoiakin fasi, si kustumus nujenti ku kulpa ku ojadu nel, i sta skritu na libru di Storia di Reis di Israel ku di Judá. Si fiju Joakin bin rena na si konta.

Joakin (Jekonias o Konias), rei di Judá

⁹ Joakin teneba idadi di disoitu anu oca ki yentra na renansa, i rena tris mis ku des dia na Jerusalen. I fasi mal dianti di SIÑOR.

¹⁰ Na nobu anu, rei Nabukodonosor manda jintis pa e lebal pa Babilonia, tudu ku kusas di mas balur di kasa di SIÑOR. Nabukodonosor pui Zedekias, tiu di Joakin, pa i rena riba di Judá ku Jerusalen.

Zedekias, rei di Judá

¹¹ Zedekias teneba idadi di vinti i un anu oca ki yentra na renansa, i rena onzi anu na Jerusalen.

¹² I fasi mal dianti di SIÑOR si Deus, nin i ka baŝa dianti di anunsiadur Jeremias ku papia palabra di SIÑOR.

¹³ Fora di kila, i lanta kontra rei Nabukodonosor ku pulba pa i jurmenta na nomi di Deus. I risu ba kabesa, i ntemus na si korson, i nega konverti pa SIÑOR, Deus di Israel.

¹⁴ Tambi tudu ŝefis di saserdoti, ku pobu, e na buriba se pekadu kada bias mas, e fasi kusas nujenti suma jinti di utru nasons. E kontamina kasa di SIÑOR ku el propi i konsagraba na Jerusalen.

¹⁵ SIÑOR, Deus di se papes, i ta mandaba elis si palabra tudu ora na boka di si anunsiaduris, pabia i sinti pena di si pobu ku si kasa,

¹⁶ ma e ri jinti ku Deus manda, e njuti si palabra, e fasi trosa di si anunsiaduris, tok raiba di SIÑOR torna forti dimas kontra si pobu; remediu ka tenba ja pa elis.

¹⁷ Asin Deus manda rei di kaldeus pa i ataka elis. Rei mata se jovens ku spada dentru di kau sagradu; i ka sinti pena di jovens macu nin femia, nin di garandis nin di bejotis. Deus ntrega elis tudu na mon di ki rei.

¹⁸ Tudu kusas garandi ku kusasiñus di kasa di Deus, ku rikesas di templu, di rei ku si ŝefis, i leba tudu pa Babilonia.

¹⁹ E kema kasa di SIÑOR, e bati muras di Jerusalen, e kema tudu palasius ku fugu, e dana tudu kusas di balur.

²⁰ Kilis ku kapli spada e lebadu pa Babilonia, e bai sedu katibu di rei ku si familia te na tempu di renansa di Persia.

²¹ Asin, palabra di SIÑOR, ki fala na boka di Jeremias, i bin sedu; con fika i goza si dias di diskansu duranti tudu ki tempu ki fika bandonadu, tok ki setenta anu kompleta.

Siru ribanta judeus pa se tera

²² Na purmeru anu di Siru, rei di Persia, SIÑOR kumpri ki palabra ki falaba na boka di Jeremias; i disperta spiritu di Siru. Asin Siru da un ordi ku skirbidu, i mandadu pa tudu si renu, i kontadu pa tudu jinti. Ordi fala asin:

²³ “Es i palabra di Siru, rei di Persia. SIÑOR, Deus di seu, i dan tudu renus di mundu, i nkargan di kumpul un kasa na Jerusalen, na Judá. Kualker na bo metadi ku sedu di si pobu, i ta bai pa la; si Deus i ta sta ku el.”